Aningaasarsiornermik ilinniarsimasoq imaluunniit tamatigoortoq politikkimullu malussarissoq aamma piujuartitsinissamut saqikkiartornermi kisitsisinut pikkoriffilik

Nukissiornermut immikkoortortaqarfiup piujuartitsinissamik tunngaveqarnissaa sulissutigerusuppiuk nuannaralugulu politikkikkut pisoqarfimmiinnissat aammali periusissianik suliaqartarnissat kiisalu naalakkersuisoqarfiit kattuffiillu akimorlugit suleqateqarneq? Immaqa tassaavutit suleqatitaassarput.

Tamatigoortumik suleqatissarsiorpugut, makkuninnga piginnaasalimmik:

• Politikkikkut ineriartornermut atatillugu aningaasaqarnermik naatsorsuinermik misissuinermillu suliaqarsinnaasumik

• Isummerfigisassatut saqqummiussassanik kimilinnik suliaqarsinnaallunilu Naalakkersuisunik politikkikkut kiffartuussisinnaasumik

Peqataaffigissavat suliassani inuiaqatigiinni aningaasarsiornermut aningaasaliissutinullu tunngasuni naatsorsuisarnissaq, piujuartitsinissamut saakkiartornermut atatillugu kiisalu nukissiornermut tunngasut pillugit naalakkersuisumik kiffartuussisarnissaq. Suleqatissatut ujartukkavut arlaqarsinnaasut tassaapput suliassanik kivitsisinnaassusillit misissuillaqqissullu.

Immikkoortortaqarfimmi piginnaasatigut ikorfartoqatigiittarpugut qularutissaanngitsumillu suliassaaleqinngilagut. Suliassani tulliuttuni pingaarnerit akuuffigilersinnaasatit ilaatigut makkuupput: 

• Kalaallit Nunaanni erngup nukinganik nukissiorfissuanngorsinnaasunik suliariumannikkusussinnaasunut tunngavissiornissaq, ilaatigut misissuiffigineqassallutik isertitat qanoq ingerlaartarnerat, suliariumannittussarsiuussinermi atortussanik ineriartortitsineq kiisalu aningaasaliinissamik soqutiginnittunik ataavartumik attaveqarniarneq

• Nukissiornermut immikkoortortap ineriartortinnissaanut nutaamik pilersaarusiornissaq, piujuartitsinermi periarfissanik naatsorsuilluni misissueqqissaarlunilu, tassunga ilanngullugit taaneqarsinnaapput umiarsuit nunami innaallagissamik pilersorneqarsinnaalernissaannik misissuinerit, erngup nukinganit nukissiorfiit sarfamik sinneqartoorutaannik tuniniaanissaq, erngup nukinganit nukissiorfiit illoqarfimmut qanittut allissutissaannik misissuinerit. Taakkua saniatigut Kalaallit Nunaanni silaannaap allanngoriartornera pillugu siullerpaamik periusissiortussat silaannaallu allanngoriartornerani anguniagassanik suliaqartut qanimut suleqatigineqassapput.

• Nukissiornermut immikkoortortaqarfik oqartussaqarfinnilu allani attuumassutillit suleqatigalugit pilersuinerup isumannaatsuunissaa patajaatsuunissaalu sammisassaapput,tassani aningaasaqarniarnermi nukissiornerup iluani selskabit isumannaatsumik aningaasarsiortarnerannik paasisimasaqarnissat kisiisa samminagit aammali upalungaarsimanermi sungiusartitsisarnissat suliassat ilagaat.

Suleqatissaqqissoq:

Suligasuarsinnaaneq suliassallu sivisunerusumik ingerlatassat killissinnaasariaqarpatit, suliassatit paasillugit aammali ingerlarsorsinnaallutit. Misissuisinnaaneq pikkoriffigisariaqarpat kisitsillaqqissuullutillu. Iluarissavatsigit:

• Kisitsisinik suliaqarneq, paasissutissanik misissueqqissaarneq paasiuminaassinnaasunillu paasinarsaasinnaaneq erseqqissuliorsinnaanerlu piginnaasaqarfigigukkit.

• Kattuffiit oqartussaasullu akimorlugit suleqatigiittarneq misilittagaqarfigigukku.

• Suliassanik piareersaasarneq aamma/imaluunniit suliassanik aqutsineq misilittagaqarfigigukkit.

• Suliffeqarfimmi politikkikkut aqunneqartumi misilittagaqaruit.

• Iliuuseqarsinnaaneq, peqqissaartuuneq suliassanullu aaqqiissutissanut alapernaatsuuneq ileqqorigukkit.

• Kalaallisut aamma danskisut oqalussinnaaguit.

Kissaatigineqarpoq 1. marts 2026-mi atorfinitsitsinissaq imaluunniit tamatuma kingunitsianngua.

Qinnuteqarnissamut killigititaavoq 6. januaari 2026. Ulluni 8. aamma 9. januaari oqaloqateqassaagut.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut, Naligiissitaanermullu Naalakkersuisoqarfik pillugu

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut, Naligiissitaanermullu Naalakkersuisoqarfik arfineq-marlunnik immikkoortortaqarpoq. Nukissiornermut immikkoortortamiilissaatit tassanilu sulisutut atorfiit tallimaapput immikkoortortamilu pisortaqarluni ataatsimik. Immikkoortortami qanimut suleqatigaagut pisortat ingerlataat Nukissiorfiit, Kalaallit Nunaanni Innaallagiaqarnermut Oqartussaasut kiisalu NunaGreen A/S.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk