Aqqusinertigut Angallannermut Aqutsisoqarfik Kalaallit Nunaanni biililerituumik nunakkut angallatinik misissuisartussarsiorpoq.

Mekaniker-itut ilinniagaqarpit? Takorloorsinnaaviuk biilileriffimmi sulinermiik allaanerusumik ulluinnarni sulisinnaallutit, unammillernartunillu suliaqarsinnaallutit? Kiffaanngissuseqarlutit sulerusuppit? Sullitat qanillugit suliaqarusuppit? Aamma Kalaallit Nunaat tamaat angalaarlugu misigisassarsiorfigerusussinnaallugu? Taava illerpiaasinnaavoq Kalaallit Nunaanni biilertunik nakkutilliisussatut ujartugarput.

Aqqusinertigut Angallannermut Aqutsisoqarfik Kalaallit Nunaanni nunakkut angallatinik nalunaarsukkanik misissuisartussatut aallartisarneqarpoq.

Biilit, qamuteralaat nunakkullu angallatit allat teknikkikkut ajunngitsuunissaasa qulakkeernissaat suliassatta pingaarnersarissavaat. Teknikkimi ajunngippat ajutoortarnerit ikinnerussapput. Suliani isumannaatsuunissaq kisimi ujartorneqanngilaq kisianni aamma silap qanoq issusiata ajunngitsumik sunnerneqarnissaa aamma anguniarneqarluni.

Kalaallit Nunaanni misissuinermik suliaqarnerup ilusissaa maanna politikkikkut suliarineqarpoq, ilimagaarpulli Kalaallit Nunaanni misissuinermik suliat Danmarkimiittut assigiinnarumaaraat.

Taamaammat nunakkut angallatinut misissuisartunik marlunnik Aqqusinertigut Angallannermut Aqutsisoqarfimmiussanik ujarlerpugut, aqqusinerni nunamilu isumannaatsuunissaq pillugu suliaqartussanik. Maanna nunakkut angallatinut misissuisartussatut atorfik siulleq qinnuteqarfissatut qaqipparput aappassaalu ukiaru 2026-imi aamma inuttassarsiorneqarumaarpoq.

Atorfik pillugu

Aqqusinertigut Angallannermut Aqutsisoqarfimmi nunakkut angallatinik misissuisartutut sulileruit mekanikeritut ilinniakkat allatut misilinnikuunngisannillu atorsinnaalissavat. Suliassavit pingaarnersarissavaat nunakkut angallatinik nalunaarsukkanik misissuineq. Taamaammat nunakkut angallatit assigiinngitsorpassuit pillugit suliaqartassaatit, qamuteralanniit sulinermut atatillugu angallatit assigisaallu pillugit suliassanik suliaqartassallutit.

Misissuinerit aqqusernup sinaani ingerlanneqartassapput. Nunami angallatit aqqusernup sinaanut usserarlugit illikartittarnissaat suliassarissavat. Misissuinerit Kalaallit Nunaata Politiivi peqatigalugit ingerlanneqartassapput, ingammik aallartereernermi piffissaq siulleq suleqatigineqartassallutik.

Nunakkut angallatit ajoquteqarnersut misissortassavatit, ajoqutaanillu nassaaruit angallatinik piginnittut qanoq iliornissaannik siunnersortassavatit. Taamaammat sullitarpassuit suliaqaqatillu amerlasuut oqaloqatigisarnissaat ilimagissavat.

Atorfeqarneq aqqutigalugu Kalaallit Nunaat tamaat angalaffigalugu misigisinnaanissaanik immikkuullarissumik periarfissinneqassaatit. Nuna tamakkerlugu illoqarfiit inoqarfiillu angalallutit suliffigisassagakkit. Taamaammat ullut angalaffissatit amerlassapput, kisianni soorunami suliffiup ilaqutariittullu inuunerup oqimaaqatigiissaarluarnissaat anguniarlugu misissuinissanik piffissaliinerit peqatigalutit pilersaarusiorneqartassapput.

Piffissap ingerlanerani suliat allaffissornermik aamma imaqaleriartorsinnaapput. Soorunami suliat aallartinnginneranni ilinniartilluaqqaarnissat isumagissavarput.

Saniatigut Aqqusinertigut Angallannermut Aqutsisoqarfiup qitiusumik allaffeqarfianut Danmarkimiittumut ukiumut ataasiarlutit imaluunniit marloriarlutit ataatsimiinnernut ilaasarnissat ilimagissavat.

Illit pillutit

Takorloorparput mekaniker-itut ilinniarsimasuussasutit imaluunniit nunami angallatit teknik-iat pillugu ilisimasaqartuullutillu suliaqarnermik misilittagaqariissasutit. Teknik pillugu annertuumik ilisimasaqarnissat pingaartinnerpaavarput angallannermillu isumannaatsumik angalasarnissamik anguniagaqataarusuttuunissat aamma pingaartillugu.

Saniatigut inuit assigiinngitsut oqaloqatiginissaat iluarisuuat taakkulu siunnersornissaat ikiornissaallu aallukkumasuussavat. Angallatini ajoqutinik nassaartoqarsimappat suunerannik kikkunnut tamanut paasinartumik nassuiaalluarsinnaassaatit taakkulu pillugit siunnersuisinnaassallutit. Teknikkimik ilisimasaqanngitsunut aamma paasinartumik.

Taassuma saniatigut aamma makkua piumasaraagut:

· namminersorlutit, aaqqissuussaalluartumik akisussaassuseqarpalaartumillu sulisassaatit

· suliffimmut atatillugu angalasaqattaartarnissaq allamilu sulisaqattaartarnissaq kajumiginartissavat

· sullitanik qanimut suleqateqarneq iluarissavat

· inuit assigiinngitsut oqaloqatigalugit nuannaralugulu naleqartutut isigissavat

· kalaallisut qallunaatullu allattarlutillu oqalussinnaassaatit

· sullitallu akornassinni isumaqatigiinnginnermi eqqissisimasinnaasuussaatit aaqqiagiinnginnermillu annikillisaallutit aaqqiiniiarsinnaassallutit

· suleqatinik qanittumik suleqateqarsinnaasuussaatit tatiginnissinnaallutillu

· minnerpaamik kategori B-mik biilinik ingerlatitsisinnaatitaanermut allagartaqassaatit

· Kalaallit Nunaanni najugaqartuussaatit

Makku neqeroorutigaagut

Atorfik Suleqatigiinni Synvirksomheder og Vejsidesyn-ip ataani inissisimavoq, synsinspektør-inik 18-inik taakkualu aqutsisuannik sulisoqarluni. Suleqatigiit Danmarkimi suliffeqarfiit misissuisarnermik ingerlatsisut nakkutiginissaat aammalu aqqusinermi biilinik teknikkikkut misissuinermik ingerlatsineq suliassaraat. Kisianni illit Nuummi allaffittaatsinni suleqatissallu allaffeqalissaatit tassaniittassallutillu aqqusinermiinngikkaangavit.

Suleqatinniit Danmarkimiittuniit misilittagaqarluartuniit sungiusarluarneqassaatit. Ilinniartitaanerit Kalaallit Nunaanni aamma Danmarkimi ingerlanneqarumaarpoq. Taamaammat atorfineqqammernerpit nalaani Danmarkimut angalaaqattaassallutit ilimagissavat.

Illit tassaaguit sulisoriligassarput aamma makku neqeroorutigisinnaavagut:

· suliffik pisunut tulluussaartuarsinnaasaq, kiffaanngissuseqarluni suliffiusinnaasoq ataatsimoorlunilu misissuinissanik pilersaarusiorfiusartoq

· ullormiit ullormut sulinerup piffissalerneqarneri allanngorartuussapput, misissuinermi silap qanoq innera ataqatigiissaarinerlu tunngavigalugu aaqqissugassat malillugit naleqqussartoqartassammat

· atorfik Kalaallit Nunaata Politiivinik qanittumik suleqateqarfiusoq

· angerlarsimaffimmi sulisarnissamut atortussanik tunineqarnissamut periarfissalik

· suleqatissallu suliffissinni biileqartinneqassaasi sulinissamullu atugassanik atortoqartinneqassallusi

· angalasaqattaartassaatit akunnittarfinnilu unnuisaqattaartassallutit

· angalanissanik pilersaarusioqataasassaatit, taamaalilluni illoqarfinni nunaqarfinnilu suliassat ajunngitsumik suliarilluagaasumillu ingerlanneqartarniassammata.

Akissaatinut atorfinitsitaanermullu tunngatillugu atugassarititaasut

Atorfimmi sapaatip akunnerata iluani akunnerit 40-t sulisarnissaq missiliorneqarpoq, kisiannili akunnerit suliffissat ilinniakkavit ataani kattuffiup isumaqatiginninniarsinnaatitaasup isumaqatigiissutai malillugit inissinneqassallutik. Atorfik 1. august 2026 sulilerfigineqassaaq.

Akissaatinut atorfinitsitaanermullu tunngatillugu atugassarititat ilinniakkavit ataani kattuffiup isumaqatiginninniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut malillugit inissinneqassapput. Atorfinitsitaanermi soraarnermilu angalanissamut akiliunneqarnissaq pisattallu nassiunneqarnerat eqqarsaatigalugu, kattuffiup suliffiullu akornanni isumaqatigiissutaasut atorfininnerup nalaani atuuttut naapertorlugit, sumilu najugaqarnerit tunngavigalugu, akiliunneqarsinnaatitaaguit taakku malillugit akiliunneqarsinnaassaatit.

Nuummi inissaqareernissat piumasaraarput suliffimmut atatillugu Nuummi inissaliisoqassanngimmat.

Paasissutissat amerlanerusut

Suliffeqarfik Sarfannguit 8B, 3900 Nuummi inissisimavoq. Suliaqarnerni aqqusernit sinaani sulisassaatit, angerlarsimaffimmiit sulisassallutit imaluunniit suliarnut attuumassuteqartumik angalasassallutit.

Arlaannik apeqqutissaqaruit suleqatigiinnut aqutsisoq Casper Adrian König oqarasuaatikkut +45 21 58 56 47-mut saaffigisinnaavat. Sms-ikkut allassinnaavutit taava periarfissaqaleruni erngerluni sianerfigiumaarpaatit.

Qinnuteqarfissaq

Qinnuteqarnissamut killigititaasoq tassaavoq 20. maj 2026.

Atorfik pillugu oqaloqatiginninneq siulleq Microsoft Teams-ikkut ingerlanneqassaaq 28. maj 2026.

Aappassaaneerluni oqaloqatiginninnissap Nuummi 19.-20. maj ingerlanneqarnissaa ilimagineqarpoq.

Atorfimmut qinnuteqarnermut atatillugu oqaaseqaatit aamma pinerlussimanermut allagartaq piniarneqarumaarput.

Atorfik soqutigigukku taava qinnuteqaatit, CV aamma ilinniakkamik naammassisaqarsimanermut allagartat nittartakkakkut qinnuteqarfissakkut nassiussinnaavatit ugguuna: www.fstyr.dk