Aqutsisut Allattoqarfiat qullersaqarfimmi allatsimik, qaffasissumik ataqatigiissaarinermik misilittagalimmik pissarsiorpoq

Allatsitut misilittagaqarluarpit, Aqutsisut Allattoqarfianni Naalakkersuisoqarfimmi Pisortaanermut aqutsisoqatigiinnullu, aammalu Naalakkersuisumut ulluinnarni ulapaarfinni qaffasissumik kiffartuussinermut qulakkeerinissamut, aammalu sulinermut atatillugu angalasarnissamut innuttaasunillu ataatsimiititsinermi ikiuuttarnissamut, Naalakkersuisullu allattaata sulinnginnerani paarlattaasarnissamut qunusuissuseqartoq?

Allatsimik, immikkoortortaqarfimmi sulisut aamma Naalakkersuisoqarfimmi aqutsisut suleqatigalugit aqutsisoqatigiit, Naalakkersuisoqarfimmi Pisortaanerup aamma Naalakkersuisup ulluinnarni kiffartuunneqarnerini suleqataasinnaasumik pissarsiorpugut. Ulluinnaat ulapaarfiusut, assigiinngitsorpassuarnik suliaqarfiusut suliffiginissaannut piginnaaneqaruit, aammalu Aqutsisut Allattoqarfianni suliassanik isumaginneqataanissamut qunusuissuseqaruit, illerpiaasimassaaq suleqatigiiusugut suleqatigerusutarput.

1. april 2026-mi imaluunniit isumaqatigiissuteqarnikkut piaarnerpaamik atorfinitsitsisoqassaaq.

Atorfik pillugu

Aqutsinermut Allattoqarfik Naalakkersuisoqarfimmi immikkoortortaqarfiit sisamaasut ilagaat, tassanilu ineqarneq, sanatitsisutut inissisimaneq, illunut oqartussaaneq, attaveqaasersuutit isorliunerusullu pillugit Naalakkersuisoqarfiup suliassai isumagineqartarput. Naalakkersuisoqarfimmi sulisut 45-t missaanniipput. Aqutsinermut Allattoqarfik arfineq pingasunik sulisoqarpoq, aammalu Naalakkersuisoqarfimmi sulisunut sullissiviulluni.

Immikkoortortaqarfimmi suliassat ilaatigut tassaapput Naalakkersuisoqarfimmut Naalakkersuisumullu saaffiginnissutinik ataqatigiissaarisarneq ingerlatitseqqittarnerlu, Naalakkersuisunut Inatsisartunullu aammalu taakkunanngaanniit suliassanik isumaginninneq, allakkat, tusarniaanerit, nutserinerit, pitsaassutsinik qulakkeerisarnerit, arkivimik aqutsineq, kiisalu sulianik aqutsineq ineriartortitsinermilu suliassat. Taakku saniatigut sammisaqartitsinernut, saqqummiinernut aamma assersuutigalugu suliani sullissinissamut suliffeqarfimmi ilitsersuutit, malittarisassat, suleriaatsit ilitsersuutillu pillugit sanilinut ilinniartitsinernut, pisiniartarnernut, kiffartuussinernut suliffeqarfiullu iluani suliassanut allanut pilersaarusiorneq ingerlatsinerlu ilaatinneqarput. Aamma imikkoortortaqarfimmi Naalakkersuisoqarfimmi qitiusumik IT-mut atortut suleriaatsillu digitaliusut ingerlanneqarneri, ataqatigiissaarneqarneri ineriartorteqqinneqarnerilu akisussaaffigineqarput, taakkununngalu atuisunut ikiuuttarneq, atortunik aqutsineq aaqqiissutissanillu ditigaliusunik nutaanik atulersitsisarneq ilaatinneqarput.

Qullersaqarfimmi allatsi aaqqissuussaanikkut Aqutsisut Allattoqarfianni inissisimassaaq aammalu Immikkoortortaqarfimmi Pisortaq qullersarissallugu.

Suliassat

Qullersaqarfimmi allatsip suliassai Immikkoortortaqarfimmi Pisortaq aamma Naalakkersuisoqarfimmi Pisortaaneq suleqatigalugit aalajangersarneqartassapput, taakkulu tassaasinnaapput:

• Aqutsisoqatigiit, Naalakkersuisoqarfimmi Pisortaanerup aamma Naalakkersuisup pitsaanerpaamik kiffartuunneqarnissaannut sullinneqarnissaannullu qulakkeereqataaneq.

• Aqutsisoqatigiit, Naalakkersuisoqarfimmi Pisortaanerup aamma Naalakkersuisup isumaqatigiissutaasa qaammatisiutaanilu allassimasut aqunneqarnerini isumaginneqataaneq.

• Aqutsisoqatigiit, Naalakkersuisoqarfimmi Pisortaanerup aamma Naalakkersuisup ataatsimiinnissaannut sulinerminnullu atatillugu angalasarnerinut pilersaarusiortarneq piareersaasarnerlu.

• Aqutsisoqatigiit, Naalakkersuisoqarfimmi Pisortaanerup aamma Naalakkersuisup allagaataasa isumagineqarnerini, imaqarniliat allakkiallu il.il. suliarineqarnerini allatsitut suliassat.

• Naalakkersuisoqarfimmi Pisortaanerup Naalakkersuisullu ataatsimiinnernut angalanernullu najoqqutassaannik piareersaasarneq.

• Aqutsisut Allattoqarfiani suliassaalersut, soorlu sulinermut atatillugu angalanerit aamma innuttaasut ataatsimiinnissaannut suleqataaneq, naalakkersuisup allattaata peqannginnerani taartaasarneq, kiisalu nutsigassat pitsaassutsimillu qulakkeerisarnerit annikinnerusut.

Qullersaqarfimmi allatsi aqutsisoqatigiit, Naalakkersuisoqarfiup Pisortaanerata aamma Naalakkersuisup suliassaataanik suliaqartinnani Naalakkersuisoqarfimmi suliassat allat isumagineqarnerini suleqataasarnissani piareersimaffigissavaa. Atorfimmut atatillugu angalasarnissaq naatsorsuutigineqartariaqarpoq.

Naatsorsuutigaarput

Ilinniartitaanikkut tunuliaquttatit aalajangiisuussanngillat, kisiannili ingerlaqqiffiusumik ilinniarsimanissat pingaartipparput. Tamatuma saniatigut naatsorsuutigaarput;

• Aaqqissuussisarnermik, sulianik paasisimaarinnissinnaanermik aammalu sulianik ataatsikkut amerlasuunik suliaqarsinnaanermik misilittagaqarluassasutit

• Naalakkersuinikkut sulianik aamma allaffissornermi qullersanik kiffartuussinermik misilittagaqarluassasutit, ajornanngippat naalakkersuisumut allatsitut

• Allattariarsornermik attaveqaqateqarnermillu piginnaaneqarluassasutit

• Kalaallisut danskisullu eqarinagit, ajornanngippallu tuluttut nalinginnaasumik qaffasissusilimmik allassinnaassasutit oqalussinnaassasutillu

• Ilakkuminartuussasutit, aammalu suleqatikkuminartuussasutit ileqqorissaartuussasutillu

• Allannguinissamut piareersimassasutit, qunusuissuseqassasutit suliffimmilu qullersaqarfiusumi aammalu aaqqissuussaanermi naalakkersuinikkut aqunneqartumi sulinissamut naleqqussarsinnaassasutit

• Kalaallit kulturiannik inuiaqatigiinnillu kalaallinik ilisimasaqassasutit

• Aaqqissuussamik, akisussaassusilimmik, siulliuniarfiusumik suliaqarnissamullu kajumissuseqartumik sulisinnaassasutit

• Tunniusimassasutit, naapertuilluartuussasutit aammalu suleqateqarlutit namminersorlutillu sulisinnaassuseqassasutit

• Ilikkartikkuminartuussasutit

• Ulapaarfimmi sulinermik nuannerisaqassasutit, artorsalerfinnilu aamma eqaatsumik aaqqiisinnaanermik takutitsisinnaassasutit

Naalakkersuinikkut sulianut aalajangiisarnerit, taakkununngalu Inatsisartut ataatsimiinneri, Naalakkersuisunit suliat ilanngullugit, misilittagaqarfigigukkit, aammalu suliani sullissineq pisortallu ingerlatsinerat misilittagaqarfigigukkit iluaqutaassaaq.

Aamma IT-mut sakkunik assigiinngitsunik iisimasaqarluaruit iluaqutaassaaq, taakkununngalu cBrain F2 Microsoft 365-ilu ilaatinneqarput.

Erseqqissaatigineqassaaq, matumani atorfik assigiinngitsorpassuarnik suliaqarfiusoq, aammalu annertuumik akisussaaffeqarfiusoq pineqarmat. Unnukkut sapaatillu akunnerisa naanerini sulisarnissaq, kiisalu piffissakilliorluni sulisarnissaq naatsorsuutigineqassaaq. Tamanna pingaartumik Inatsisartut ataatsimiinnerisa nalaanni pisassaaq.

Neqeroorutigaavut:

• Suliffik, naalakkersuinikkut aalajangiisarnerit qanillugit ingerlanneqartoq.

• Sullivimmi avatangiisit pingaartorsiorfiunngitsut, naalakkiisarnermi naatsunik aqquteqarfiusut aammalu tunniusimasunik, suliatigut qaffasissumik inissisimanermik ataqqinaatilinnik suleqateqarfiusut.

• Sullivimmi avatangiisit allanngorartut.

• Inuttut suliatigullu ineriartorneq.

Akissarsiat atorfeqarnermilu atugassarititaasut

Akissarsianut atorfeqarnermilu atugassarititaasunut, taakkununngalu atorfininnermut soraarnermullu atatillugu angalanernut pequtinillu nassiussinermut akiliunneqarsinnaatitaaneq ilanngullugu, piffissami atorfiniffiusumi Namminersorlutik Oqartussat aamma kattuffiup isumaqatigiinniniarsinnaatitaasup ilaasortaaffigisap akornanni isumaqatigiissut/isumaqatigiissutit atuuttut malinneqassapput.

Inissiaq

Atorfimmi sulisunut inissiamik innersuussisoqassanngilaq. Qinnuteqartoq Namminersorlutik Oqartussani atorfeqarnini aqqutigalugu sulisunut inissiami ineqareersimaguni, sulisunut inissiamut innersuunneqarsinnaatitaanini pigiinnassavaa. Sulisunut inissiaq atorfeqarnermut atasuuvoq, atorfeqarnerullu atorunnaarnerani qimanneqartussaalluni.