Atorfimmik inuttassarsiuineq: Kommune Kujallermi isumaginninnermut pisortaq

ALLAGARSIUTEQQITAQ:

Suliniuteqallaqqissutut kajumissuseqalersitsisartullu imminut isigivit? Aqutsisutut ataatsimoorluni pilersitsisartuuit aammalu sinaakkutissatut aalajangersakkat iluanni innuttaasunut kajungernartunik neqerooruteqarnissap pingaassusianik ilisimaarinnippit? Aaqqissugaanermi politikkikkut aqunneqartumi iluarusullutit sulisinnaavit aamma Kommune Kujalliup ineriartortinneqarneranut peqataarusuppit?

Taamaappat pisariaqartitarput illerpiaasimassaaq!

Atorfik pillugu

Isumaginninnermi pisortatut isumaginnittoqarfiup oqartussatut sulinera, ingerlanneqarnera, ineriartorneralu akisussaaffigilissavatit. Politikkikkut aalajangikkat, inatsisit missingersuusiallu suliatigut piviusunngortinneqarnissaat qularnaartassavat. Aqutsisutut saqqumilaartuussaatit, maligassiuilluarlutit kiisalu sulisunnik ineriartortitsinnaassallutit sulisut isumaginninnikkut qaffasissumik sulisussanngorlugit.

Kommunimi pisortaqatigiinnut ilanngutissaatit taavalu kommunip pisortaanera, pisortat allat kiisalu politikkimik suliallit Kommune Kujallermi aningaasaqarnermut malinnaaneq, ineriartortitsineq aporfiillu pillugit qanimut suleqatigisassallugit. 

Atorfik Kommune Kujallermut tamarmut tunngavoq Qaqortumilu inissisimalluni.

Ikaarsaarnermi pissutsit - ajornartorsiutit immikkut ittut

Kommune Kujallermi isumaginninnermi suliat ilaat massakkut naalakkersuisunit aqunneqalersimapput taavalu meeqqanut innarluutilinnullu tunngasut taakkunannga akisussaaffigineqalersimallutik. Suliassat isumagineqarneranni, sulisussarsiornermi suliffeqarfiullu aaqqissugaanerata assut ajornartorsiorfiunerannik tamanna pissuteqarpoq.

Taamaammat Isumaginninnermi pisortatut nutaatut makkunani qitiusumik inissisimassaatit:

• Suliassat akisussaaffigiunnaarallarneqarsimasut pillugit Naalakkersuisunik suleqateqarneq

• Akisussaaffik kommunimut utertikkiartorneqarsinnaanngorlugu Isumaginnittoqarfimmik ineriartorteqqinneq nukittorsaanerlu

• Piffissami allanngoriartorfiusumik sulisunik, innuttaasunik suleqatinillu toqqissisimalersitsineq

Nunatsinni isumaginninnermik ineriartortitsinerup sunniuteqarfiginissaanut taavalu innuttaasunut inuiaqatigiinnullu pingaaruteqaqisumik ilorraap tungaanut aallartitsinissamut immikkuullarissumik periarfissaqarpoq.

Suliassat pingaarnerit

• Isumaginninnermi siunnersortimik kommunalbestyrelsimillu qanimut suleqateqarneq

• Isumaginninnermut tunngasuni ataatsimiititalianut allattoqarfittut sullissineq

• Inatsisit naapertorlugit suliassat eqqortumik ingerlanneqarnerannik, aalajangiisarmi tunngavinnik kiisalu aqutsisutut nakkutilliinermik qularnaarineq 

• Isumaginninnermut Ataatsimiititaliamut inassuteqaateqartarnerup oqartussaaffinnik agguataarineq naapertorlugu pisarnissaa akisussaaffigissallugu

• Isumaginninnermut tunngasutigut politikkikkut aalajangikkanik timitaliineq

• Qaammammoortumik aningaasarneq pillugu nalunaarusiortarneq kiisalu atuinermi sippuinerit atuinikippallaarnerluunniit iliuuseqarfigineqarneri

• Suliniutinik inuttaasunut iluaqutaasussanik aallarniisarneq ineriartortitsisarnerlu

• Kommunimi suliniutinik annikitsunik annerusunillu ineriartortitsinermut sammisunik siulersuineq 

Pisinnaasat

• Pinngitsoornani piginnaasassat:

• Suliassaqarfimmi assingusumi aqutsisutut misilittagaqarneq uppernarsagaq

• Kalaallit Nunaanni isumaginninnermi inatsisinik ilisimasaqarluarneq

• Aningaasaqarnermik aqutsinermut missingersuutillu malinneqarnerinik nakkutilliinermut misilittagaqarnerq

Kissaatit:

• Suliffeqarfimmi politikkikkut aqutaasumi sulinermut misilittagaqarneq

• Suliassaqarfiit assigiinngitsut akornanni suleqatigiinnermik suliniutinillu aqutsinermut misilittagaqarneq

• Marluinnik kalaallisut/danskisullu oqaaseqarnissat iluaqutaassaqaaq kisianni piumasaqaataanngilaq.

Qanoq ittuunerit

• Angusaqarnissaq isigalugu periusissiortartoq ataatsimullu isiginnittartoq

• Maligassiuisoq, kajumissaasoq ataatsimoorlunilu pilersitsisartoq

• Suliffiup iluani avataanilu tatiginninnermik suleqatigiinnermillu pilersitsillaqqissoq

• Patajaatsoq, suliassatigut eqaatsoq kiisalu ikaarsaarfimmi pisassarpassuaqarfiusumi akisussaaffimmik tigusinissamut piareersimasoq

Neqeroorutigaavut

• Suliffik soqutiginartoq suliassatigut inuttullu qaqiniagassarpassualik

• Ikaarsaarfimmi pingaarutilimmi isumaginninnermut tunngasutigut ineriartortitsinermut periarfissaqarneq

• Suleqatit pikkorissut kiisalu suliffimmi avatangiisit suleqatigiinnermik qitiutitsiviusut

• Pinngortitaq, kangerluit, qaqqallu nalissaqanngitsut tikivillugit Kujataani inuuneq - asiartarnissamut, ilaqutariittut sammisaqarnissamut ulluinnarnilu eqqissisimanissamut periarfissagilluinnartoq 

• Ukioq kaajallallugu sunngiffimmi sammisassat: pisummik angalaarneq, immakkut angalaneq, piniarneq aammalu Kalaallit Nunaanni avatangiisini kusanarnerpaani misigisassat

Meeqqanik pinerliisimannginnermut uppernarsaat

Atorfik una inatsimmut meeqqanik pinerliisimannginnermut uppernarsaammik pissarsinissamik pisussaatitaanermut tunngasumut ilaatinneqarpoq. Inatsit naapertorlugu kommunip pinerlussimannginnermik uppernarsaatip tigunerata kingorna aatsaat atorfinittoqarsinnaavoq. 

Atorfinitsitassamik toqqaaniarnermi meeqqanik pinerliisimannginnermut uppernarsaat kommunimi naliliinermut ilaatinneqassaaq.

Aningaasarsiat atorfeqartitaanermilu atugassarititaasut

• ASG-ip pisortanut isumaqatigiissutaa naapertorlugu atorfik akissarsiaqartitsiviussaaq. 

• Tjenestemanditut atorfinitsinneqarnissamut periarfissaq• Atorfimmut atasumik inissaqartisisoqarsinnaavoq malittarisassat atuuttut naapertorlugit nammineq akiliuteqarfigineqartartussamik

• Angalanermut pisattallu assartornerinut akiliussineq

Atorfik imarisaalu pillugit paasissutissanik sukumiinerusunik pissarsiniaraani attavigineqarsinnaavoq kommunip pisortaanerigallagaa Hans Jørgen Mørch mailikkut: hjmo@kujalleq.gl imaluunniit aningaasaqarnermut pisortaagallartoq Arne Andersen mailijkkut: arnd@kujalleq.gl

Qinnuteqaat, pineqaatissinneqarsimannginnermik uppernarsaatitalik, kiisalu ilinniagaqarsimanermut siusinnerusukkullu sulisimanermik paasissutissartalik, ilinniarsimanermut uppernarsaatit nuunnera, allallu pdf-inngorlugit Kingusinnerpaamik Novembarip ulluisa 12-at 2025-mi nittartagarput aqqutigalugu kommunimit tiguneqareersimassapput. 

MALUGIUK: Qinnuteqaatit pappilianngorlugit mailikkulluunniit tiguneq ajorpavut, qinnuteqaatit nittartagaq aqqutigalugu nassiunneqarnissaat inussiarnersumik piumasarineqarpoq.

”Inuit peqqinnerulernissaat aallukkumallugu kommunimi sulinerup nalaani pujortartoqartannginnissaa Kommune Kujallermiit atuutsinneqarpoq. Tamanna januaarip aallaqqaataani 2018-imi atuutilerpoq. Paasissutissat sukumiinerusut Sulisoqarnermut Immikkoortortaqarfimmut piniarneqarsinnaapput ”