Fuldmægtigi/konsulenti aningaasaqarnikkut misissueqqissaarinermut aamma nutarterinermut sulinermut Kalaallit Nunaanni

Kalaallit Nunaanni aaqqissuusseqqinnermik sulinermi aningaasaqarnikkut misissueqqissaarnernut fuldmægtigi/siunnersorti 

Pingaarutilinnik aaqqissuusseqqinnerni toqqammavissiissumik aningaasaqarnikkut misissueqqissaarnermik policynillu ineriartortitsinermi suliaqarusussiinnaavit? Misissueqqissaarnermik annertuumik piginnaasaqarpit, paasissutissanillu aallaavilinnik misissueqqissaarnernit misilittagaqarlutit, naalakkersuinikkullu aalajangiisartunut qanillutik sulerusuppit? Taava immaqa Aningaasaqarnermut Naalakkersuisoqarfimmi Aningaasaqarnikkut Pilersaarusiornermut Immikkoortumi suleqatissaraatsigit.

Atorfik pillugu 

Kalaallit Nunaat aaqqissuussaanikkut unammilligassanik arlalinnik sukumiisunik misissueqqissaarnernik pisortallu ingerlatsiviata nutaamik eqqarsarfiginissaanik pisariaqartitsiviusunik suliassaqarpoq. Aningaasaqarnermut Naalakkersuisoqarfimmi sulisutut Naalakkersuisut aningaasaqarnermik politikianni aaqqissuusseqqinnermillu suliaqarneranni sullivimmi suleqataalissaatit.

Aningaasaqarnikkut aaqqissuussaanikkullu misissueqqissaarnernik malitseqaataasumillu politikikkut isummernissanut tunngavissianik suliaqarnermi qitiusumik inissisimassaatit – tassani Naalakkersuisut Attassinissamut Siuariartornissamullu Pilersaarutaannik 2-mik malitseqartitsinermut atatillugu kiisalu aaqqissuusseqqinnermik isumalioqatigiissitassamut atatillugu. Aaqqissusseqqinnermik suliaqarneq ilaatigut pisariinnerusumik, ataqatigiinnerusumik siunissamullu isumannaakkamik pisortat ingerlatsiviannik pilersitsinissamik aallussissaaq, tassani qitiusumik allaffeqarfissuarmik, kommuninik peqateqarnermik innuttaasunullu qanittunik suliassanut isumalluutinik atugassanngortitsisinnaanermut periarfissanik misissueqqissaarnertigut. Taamaalillutit misissueqqissaarnernik politikikkut pingaarnersiuinermut Kalaallillu Nunaanni pisortat ingerlatsinerata ineriartorneranut Naalakkersuisullu pingaarnersiuinerannut toqqaannartumik sunniuteqartunik suliaqassaatit.

Sulinermi annertussutsinik pitsaassutsinillu periutsinik atuinermik malitseqarpoq, tassani paasissutissanik annertuunik misissueqqissarnerit aalajangiisartunullu inernerinik ingerlatitseqqiinerit. Atorfik politikikkut aalajangiisarnermut qanittumi aningaasaqarnikkut misissueqqissaarnerni periusissiornernilu ilisimasatigut ineriartornissamut pitsaasunik periarfissaqarpoq.

Suliassatit

Piginnaasatit apeqqutaatillugit ilaatigut makku suliarissavatit:

• Aningaasaqarnikkut misissueqqissaarnernik suliaqarneq, tassani aningaasartuutinik, aaqqissuussaanermik sunniutinillu misissueqqissaarnerit ilanngullugit

• Aaqqissuusseqqinnermik isumalioqatigissitap sulineranut attuumasunik misissueqqissaarnernik aalajangernissamullu tunngavissianik ilapittuineq

• Namminersorlutik Oqartussat kommunillu akornanni isumagisassat agguarsimanerinik misissueqqissarnerit

• Aaqqissuusseqqinnernik siunnersuutit kinguneqaataasa inuiaqatigiit aningaasaqarneranni kingunerannik naliliinerit

• Paasissutissanik annertuunik passussineq misissueqqissaarnerlu

• Misissoqqissaakkanik siunnerfinnut ilinniagalinnut ilinniagaqanngitsunullu ingerlatitseqqiinerit

• Akimuisunik misissueqqissaarnernik suliaqarnerni peqataaneq

• Aalajangiinernut atatillugu misissoqqissaakkanik inernernillu saqqummiinernut ilapittuineq

Namminersorlutik misissueqqissaarnernik suliaqarnermik suleqatinillu avataanilu ingerlatsisunik suleqatiginninnissamut periarfissaqassaatit.

Illit 

Takorloorparput illit:

• Naapertuuttumik inuiaqatigiilerinermi kandidatitut ilinniagaqartutit (soorlu aningaasarsiornermi, statskundskabimi assigisaanilluunniit)

• Misissueqqissaarnerni nukittuunik piginnaaneqartutit kisitsisinillu misissueqqissaarnernik misilittagaqartutit – ajornanngippat paasissutissanik annertuunik suliaqartarnernit

• Paasissutissanik passussinermik misilittagaqartutit

• Misissoqqissaakkanik pisariusunik paasinartumik erseqqissumillu siunnerfinnut assigiinngitsunut ingerlatitseqqiisinnaasutit

• Aaqqissuulluakkamik suleriaaseqartutit ajornartorsiutinillu nutaanik sukkasuumik paasinnittartutit

• Politikikkut aalajangiisarnernut qanimut suliaqarnissannut soqutiginnittutit

Pisortani suliffeqarfimmi siunnersortilluunniit suliffeqarfianni misissueqqissaarnernik suliaqarnermit misilittagaqarneq iluaqutaassaaq, piumasaqaataanngilarli.

Ilinniakkamik naammassinnerlaat ilinniarnermik nalaanni suliffimmit praktikernermiluunniit misilittagaqartut aamma qinnuteqarnissamut kaammattorneqarput.

Naalakkersuisoqarfik suliffittut

Aningaasaqarnermut Naalakkersuisoqarfik Naalakkersuisut aningaasaqarnikkut sulinerannik aningaasaqarnermilu politikikkut suliaannik ataqatigiissaarisutut inissisimanermik suliaqarpoq. Tassunga ilaatigut ukiumoortumik aningaasanut inatsimmik, Namminersorlutik Oqartussat aningaasartuutaannut isertitaannullu missingersuutit taaneqartumik suliaqarneq ilaavoq.

Naalakkersuisut aningaasaqarnikkut politikimik attanneqarsinnaasumik, siuariarnermik, tunisassiorsinnaassusermik atugarissaarnermillu nukittorsaasumik ingerlatsinissamut pitsaanerpaamik toqqammavissaqarnissaat suliassaraarput, pisortallu ingerlatsiviata pisariitsumik ingerlanneqarneranut ikorfartuineq – tassani siunissamut qaninnermut akisussaassuseqartumik aningaasaqarnikkut aqutsinikkut kiisalu ungasissumut aaqqissuussaanikkut attassisinnaanermik unammilligassat iliuuseqarfiginninnikkut. Suliassavut siammasissuupput, aalajangiisarnernut politikimillu ingerlatsisunut qanippugut. Peqatigisaanik pasissutissanik aallaaveqartumik misissueqqissarnernillu politikikkut aalajangernissanut toqqaannartumik toqqammavissanngortartunik annertuumik sulisarpugut. Aningaasaqarnermut Naalakkersuisoqarfimmi atorfeqarneq taamaammat misissueqqissaarnernik suliaqarnernik ingerlatitseqqiinernillu politikikkullu aalajangiinissanut tunngavissianik suliaqarnernut atatillugu annertuumik sunniuteqarnikkut akisussaaffeqarnermillu aamma ilisarnaateqarpoq.

Naalakkersuisoqarfiup Aningasaqarnikkut Pilersaarusiornermut immikkoortuani sulilissaatit, misissueqqissarnernillu suleqatigiissuteqarnikkut aalajangiinissanullu tunngavissianik Inatsisilerinermut Nunalu tamakkerlugu pilersaarusiornermut immikkoortumik suleqateqartassallutit. Tamatuma saniatigut immikkoortoq ingerlaavartumik Akileraartarnermut Aqutsisoqarfimmik, Aningaasaqarnermut Sulisoqarnermullu Aqutsisoqarfimmik kiisalu Kalaallit Nunaanni Naatsorsueqqissaartarfimmik, Naalakkersuisoqarfiup ataani immikkoortutut namminersortutut ilaasumik ingerlaavartumik suleqateqarpoq. Tassunga atatillugu illumi namminermi avataanillu ingerlatsisut suleqatigalugit paasissutissanik, misissueqqissaarnernik piareersaasiornernillu suliaqarnissamut periarfissaqassaatit.

Aningaasarsiatigut atorfinitsitaanermilu atugassarititaasut

Namminersorlutik Oqartussat sulisartullu kattuffiata attuumassuteqartup akornanni isumaqatigiissutit malillugit atorfinitsinneqassaatit, fuldmægtigitullu imalluunniit atorfeqarsimanernut piginnaasannullu paasissutissat uppernarsarneqartut tunuliaqutaralugit special-/chefkonsulentitut atorfimmi inissisimassaatit.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Naalagaaffimmi atorfeqartut – isumaqatigiissutit apeqqutaatillugit – Namminersorlutik Oqartussani atorfeqarnerminnut atatillugu aningaasarsiaqarnatik sulinngiffeqarsinnaanermut pisinnaatitaaffeqarput. Taamattaaq Namminersorlutik Oqartussani atorfininnermut atatillugu aningaasarsiaqarnani sulinngiffeqarnissamut qinnuteqaatinik akuersaartuunissaq naalagaaffiup kommuninut regioninullu inassutigaa. Sulinngiffeqarnernut aalajangersakkani aamma inunnut Namminersorlutik Oqartussani atorfinitsinneqartunut katissimasatut aapparisanut inooqatinullu atuuppoq.

Oqaloqatiginnissinnaanermut atatillugu naatsumik sulianut tunngasunut apeqqutinik allattariarsiornikkut misilinneqarnissat piareersimaffigissavat.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat allat

Atorfik pillugu paasisaqarnerujumaguit immikkoortumi pisortamut Michael Pedersenimut, oqarasuaat 34 69 28, emaililuunniit: micp@nanoq.gl atorlugu saaffiginninnissamut tikilluaqqusaavutit.

Qinnuteqaat

Qinnuteqaatit CV-mik, misilitsinnermut uppernarsaatinik karakterit allattorsimaffiannik ilaqartumik ilanngussanillu ilaqartoq, toortagaq ”Qinnuteqaatit nassiuguk” atorlugu nassiunneqartoq kingusinnerpaamik ulloq 11. maj 2026 tigussallugu qilanaaraarput.

Oqaloqatiginninnerit ingerlaavartumik ingerlannissaat naatsorsuutigaarput, suleqatissarpullu nutaaq piaarnerpaamik imaluunniit isumaqatigiissuteqarnikkut ilinnut naalakkersuisoqarfimmullu piffissaq pitsaanerpaaq aallaavigalugu piaarnerpaamik tikilluaqqunissaa neriuutigaarput. 

Aningaasaqarnermut Naalakkersuisoqarfiup aasigiinngiiaassuseq nukittoqqutitut isigaa soqutiginnittullu tamaasa inuttut tunuliaqutaat apeqqutaatinnagu qinnuteqarnissaannut kaammattorlugit. Qinnuteqaativit atuarnissaa qilanaaraarput.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.