Great Greenland A/S-mut Pisortaaneq

Great Greenland sapiissusilimmik ineriartortitserusussuseqartumillu pisortaanissarsiorpoq, pisortatut misilittagaqarluartumik kisitsisinillu paasisimasaqarluartumik, najukkami sunniuteqarluaatigaluni nunat tamalaat akornanni niuernermik ingerlatsisumik ingerlatseqatigiiffimmut siulersortaasinnaasumik. Suliffeqarfimmut ileqqunut pioreersunut pingaartitsiffiusumut ineriartortitseqqinnissamut akisussaasunngussaatit, piniarnermik inuussutissarsiuteqarnermut qitiusutut inissisimasumut, ullutsinnilu puisit amiinik atisaliornermi nutaaliaasunik, aammalu nunatta avataani ilusilersuinermi ineriartornermut tulluussakkanik pilersitsiviusumut. Puisip amia kalaallit kulturikkut kinaassutsikkullu pingaartitarivaat pisortaanertullu illit kingornussap taassuma piuinnarnissaa, akisussaassusilimmik atorneqarnissaa kinguariinniillu nutaanit naleqartinneqarnissaa qulakkeerinneqataaffigissavat.

Atorfiup sumiiffia: Qaqortoq Atorfininissaq pissaaq: 1. novemberi 2025, imaluunniit isumaqatigiissuteqarneq naapertorlugu.

Great Greenland A/S Qaqortumi qullersaqarfeqarpoq, tassani ingerlatseqatigiiffiup qitulisaavia, takutitsivia, allaffeqarfia, mersortarfia pisiniarfialu kattusimallutik. Taassuma saniatigut Great Greenland Glostrup-imi immikkoortortaqarfeqarpoq, tassani ingerlatseqatigiiffiup Danmarkimi nunallu tamalaat akornanni suliai ingerlanneqarlutik.

Suliassatit

• Siulersuisut qanimut suleqatigalugit ingerlatseqatigiiffiup ulluinnarni aalajaatsumik aqunneqarnissaa qulakkiissallugu.
• Periusissiap piviusunngorsarnissaa suliniuteqarfigineqartullu sisamat nukittorsarnissaat: Tunitsiveqarneq, Qitulisaaneq ammillu pitsaassusaat, Takutitsivik aamma Tuniniaaneq.
• Niuernerup pitsanngorsaanikkut, nioqqutit ineriartortinnerisigut, siunnerfilimmik nittarsaassinikkut nunallu tamalaat akornanni tuniniaanikkut ineriartortinnissaa.
• Piniarnermut inuussutissarsiuteqarnermut ataqatigiissaarisutut inissisimaneq, piniartullu peqatigiiffiinut sinerissamilu tunitsivinni sulisunut qanimut suleqatiginninnerup nukittuup tigummiinnarnissaa.
• Ammit nioqqutissallu naammasseriikkat pitsaassusaat ukkataralugu, kiisalu saqqummersitat ilusilersukkallu ineriartorteqqinneri.
• Aningaasatigut aqutsinerup, naatsorsuutit killiffissiortarnissaat siulersuisunullu nalunaarusiortarnissap qulakkeernissaat. Sulisunik ineriartortitsinerup, piginnaasat suliffimmillu iluarisimaarinninnerup pitsanngorsarnissaat aqutsisuuffigalugu.
• Pilersuinerup niuernerullu iluani qaffasissutsit malittarisassaasullu atuuttut eqquutsinneqarlutillu akisussaaffigineqarnissaasa qulakkeernissaat.
• Suliffeqarfiup ineriartortinnissaa, piginnaasat qaffassarnissaat, iluarisimaarinninnerup angusallu pitsanngorsarnissaat.

Naatsorsuutigaarput

• Pisortatut patajaatsumik misilittagaqartuuneq, siunnerfiliisinnaasoq angusanillu takutitsisinnaasoq.
• Periusissiamik piviusunngorsaanermi iluatsitsisimanermut uppernarsaateqarneq, aningaasatigut paasisimasaqarluartoq naatsorsuinermillu ilisimasaqarluartoq.
• Attaveqatigiinnermut- suleqateqarsinnaanermut piginnaasaqarluartoq – iliuuseqallaqqissoq, tusarnaarsinnaasoq katersuuffiusinnaasorlu.
• Attaveqatigiiffinnik pilersitsisinnaasoq sunniuteqarluarsinnaalluni nunatta iluani nunallu tamalaat akornanni, oqartussanut, piniarnermut inuussutissarsiuteqartunut atuisunullu.
• Kalaallit Nunaanni piniarnermut inuussutissarsiornermut kulturimullu ingerlatseqatigiiffiup pingaassusaanik paasisimasaqarluartuuneq.
• Tunisassiornermut, ammerinermut imaluunniit ammit tuniniarnerinut ilisimasaqarneq imaluunniit misilittagaqarneq, ammit tunisassiarisarneri ilisimasaqarfigigaanni aamma pitsaaqutaassaaq. 

Pingaartipparput

• Pisortaq kulturikkut inuiaqatigiinnilu pisunut malinnaasoq.
• Sapiissusilik, alapernaatsoq, siunnerfiliisinnaasoq, pingaarnersiuisinnaasoq attassisinnaasorlu.
• Aallussiumatooq, anguniagalik pimoorussisorlu.
• Pisortaq qanilaassusilik peqataatitsisorlu, tusarnaarsinnaasoq, sulisunut, suleqatigisanut, soqutigisaqarfinnut sineriammilu piniarnermik inuutissarsiuteqartunut angusaqarusussusilik.
• Tunitsiveqarfinnut piniarnermillu inuutissarsiuteqartunut ataavartumik oqaloqatiginnissinnaasoq.

Oqaatsit

Kalaallisut qallunaatullu – tuluttut piginnaasat pitsaaqutaassapput.

Neqeroorutigaarput

Ingerlatseqatigiiffimmi ileqqunik pioreersunik pingaartitsisumi Kalaallillu Nunaanni kulturikkut, inuiaqatigiinni inuutissarsiornikkullu pingaaruteqarluinnartumi qitiusutut pisortatut atorfik. Qaqortumi suliffeqarfimmi sulisut pimoorussisut ilagilissavaatit, tassani ingerlatseqatigiiffiup qitiusumik suliai ingerlanneqartuullutik saniatigut aamma ingerlatseqatigiiffiup imikkoortortaqarfia Glostrup-imiittoq Great Greenlandimik Danmarkimut nunanullu tamalaanut atassusiisoq qanimut suleqatigissavat.

Atorfininnissaq pissaaq 1. Novemberi aallarnerfigalugu, imaluunniit isumaqatigiissuteqarneq naapertorlugu Atorfik Qaqortumi inissisimavoq.

Qinnuteqaat innersuussiffittalik, uppernarsaatillu kingusinnerpaamik 26. Septemberi uunga nassiunneqassapput: job@great-greenland.gl

Nutsernermut aningaasartuutit malittarisassat atuuttut naapertorlugit neqeroorutigineqarsinnaapput.

Atorfik pillugu apeqqutinut attavigineqarsinnaavoq siulersuisuni siulitttaasoq: Juliane H. Heilmann +299 488148 imaluunniit job@great-greenland.gl