Ilinniartitaanermut Aqutsisoqarfik atuarfinnut siunnersortimik meeqqat atuarfianniit ikaarsaarnernik aamma suliniummi NUIKI-mi suliaqartussamik sulisussarsiorpoq

Kalaallit Nunaanni siunissami ilinniartitaaneq ilusilersuiffigeqataaffigerusuppiuk?

Ilinniartitaanermut Aqutsisoqarfik atuarfinnut siunnersortimik meeqqat atuarfianniit ikaarsaarnernik aamma suliniummi NUIKI-mi suliaqartussamik sulisussarsiorpoq

Ilinniartitaanermut Aqutsisoqarfik atuarfinnut siunnersortimik meeqqat atuarfiannik projektilerinernillu misilittagalimmik sulisussarsiorpoq. Qinnuteqartup misilittakkat taakkua saniatigut suliniummik NUIKI-mik ilisimasaqartuunissaa iluaqutaassaaq. Suliniutip NUIKI-p siunertaraa inuusuttut ilinniakkamikkut inuttullu piginnaasaqarfiinik nukittorsaanissaq, ilinniagaqalernissaminnut suliffeqarfinnilu sulilernissaminnut piareersimanissaat anguniagaammat.

Atuarfinnut siunnersorti team-imi, nunaqarfinni ungalliunerusunilu ilinniartitseqqiinernik piginnaasatigullu qaffassaalluni ineriartortitsinernik kiisalu pingaartumik inuusuttunut ilinniagaqanngitsunut imaluunniit suliffeqanngitsunut suliniutit ineriartortinneqarnerannik suliaqartumi, suleqataassaaq. Suliniutini pingaartumik kajumissuseqalersitsiniarneq, akisussaaqataaneq, peqatigiinneq, piginnaasanik ineriartortitsineq aammalu oqaloqatigiinneq tunngaviusutut pingaartinneqarput. Suliniutini inuusuttut unammillernartuutitaannik aammalu suliniutit sorliit ulluinnarni atorneqarsinnaanerinik itisuumik paasisimasaqarnissaq pisariaqartuuvoq. Taakkua saniatigut kommunini oqartussaasunik, meeqqat atuarfiinik attuumassuteqartunillu allanik ingerlaavartumik oqaloqateqartarnissaq piumasaqaataavoq. Angalasarnerit atorfiup ilagivai.

Atorfimmi projektinik aqutsineq, ilinniarnernik siunnersuineq imaluunniit inooqatigiinnikkut siunnersuineq pingaartillugit inuusuttunut suliniutinik immikkut ilisimasaqarnissaq naatsorsuutigineqarpoq.

Atuarfinnut siunnersortip suliassai ukuupput:

• Projektit pilersaarusiorneri, ingerlanneri aqunnerilu – taakkununnga ilanngullugit suliniut NUIKI, atuutsitsiniarneq aamma suliat ingerlanneqarnerannik malinnaaneq nakkutilliinerlu.
• Meeqqat atuarfianni ilitsersuinermik suliniutit nukittorsarneqarneranni peqataaneq.
• Sulianik ataasiakkaanik sukuiaaneq misissuinerlu.
• Nalunaarusialiorneq, taamatullu naliliinernik, allakkianik assigisaannillu suliaqarneq.
• Pitsaassutsimik qulakkeerinninneq
• Akimuisumik projektini sulianilu peqataaneq – atuarfinnut siunnersortit, immikkoortortaqarfiit allat kiisalu suleqatit avataaneersut suleqatigalugit.
• Suliassat ad-hoc-iusut.

Piginnaasaqarfiit:

• Inuiaqatigiinni kalaallini pissutsinik inuusuttullu unammillernartunik naapittagaannik itisuumik ilisimasaqarneq.
• Pingaartumik pissutsinut meeqqat atuarfiannut inuusuttullu atugaannut tunngasut pillugit suleqateqarluarsinnaassaatit suleqatinullu sunniuteqarluarsinnaassallutit.
• Suliatit aaqqissuulluarsinnaassavatit, akisussaassuseqarlutit, siumut isigisuullutit aaqqiissuteqarniarlutillu sulisinnaassaatit.
• Oqalulluni allagaqarlunilu attaveqaqatigiinnermut saqqummiinernilu pitsaasunik piginnaasaqassaatit.
• Team-ini suleqateqarluarsinnaassaatit, nammineerlutit aammalu piffissakillutit sulisinnaassallutit.
• Projektinik ineriartortitsillunilu sulianik misilittagaqassaatit.
• Suliffeqarfimmi politikkikkut aqunneqartumi sulineq ilisimasaqarfigilluassavat.

Ilinniartitaanermut Aqutsisoqarfik pillugu

Ilinniartitaanermut Aqutsisoqarfik tassaavoq suliffeqarfik politikkikkut aqunneqartoq, Naalakkersuisoqarfimmik politikkerinillu sullissisoq kiisalu inerisaanermik saqqummersitsinernillu suliaqartoq. Ilinniartitaanermut Aqutsisoqarfik maannakkut suliaminik suleriaatsiminillu nutarsaavoq – peqataaffigiumaagassannik. Suliffeqarfiuvugut amerlasuunik assigiinngitsorpassuarnillu suliaqartuulluta, aqutsisoqarfiit atuutereersut suliaasa nalinginnaasut saniatigut ilaatigut aamma saqqummersitsiveqarpugut, naqiteriveqarpugut, aammalu paasititsiniaanermut atorniartarnermullu tunngasunik katersugaateqarluta. Aqutsisoqarfiup annerusumik meeqqat atuarfiat, efterskolit højskolillu suliassaqarfigivai, nutaatullu GUX-imut, Attammut NUIKI-mullu tunngassuteqartut suliassaqarfigilerlugit. Suleqatigiit 50-it missaanniippugut, suliffeqarfimmilu pingaartorsiorpallaanngitsumi suliat pitsaasuunissaannik pingaartitsisuulluta.

Akissarsiat atorfeqarnermilu atukkat

”Naalakkersuisut aamma Ilinniartitsisut Meeqqat Atuarfianneersut Kattuffiata, IMAK-ip, meeqqat atuarfianni ilinniartitsisunut isumaqatigiissutaa”-ni isumaqatigiissutit aalajangersakkat naapertorlugit atorfinitsitsisoqassaaq. Qinnuteqartoq Kalaallit Nunaanni pisortat suliffeqarfiini tjenestemandinut inatsisit naapertorlugit atorfeqareersoq tjenestemandinut atugassarititaasut naapertorlugit atorfinitsinneqarsinnaavoq.

Akissarsiatigut aamma atorfeqartitaanermi atugassarititaasut, taakkununnga ilanngullugit atorfinikkiartorluni soraarlunilu angalasinnaatitaanermut aamma pequtit nuunneqarsinnaanerannut akiliunneqarneq, Namminersorlutik Oqartussat aamma pineqartup kattuffiata isumaqatiginninniarsinnaatitaasup akornanni isumaqatigiissutaasut/sulisunut isumaqatigiissutaasut atorfininnerup nalaani atuuttut, atuutsinneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Atorfininnerup aallartiffia

1. oktobari 2025 imaluunniit isumaqatigiissuteqarnikut.

Qinnuteqarneq

Qinnuteqaatit, CV-it nutartigaq, ilinniarsimasanut pikkorissarsimanernullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. Qinnguteqarfissaq kingulleq tassaavoq 8. august 2025. Augustip aallartisimalernerani oqaloqatiginnittoqassaaq.

Paasissutissat annertunerusut pisortap tulliugallartumut Salik Schmidt-imut saaffiginninnikkut pissarsiarineqarsinnaapput, oqarasuaat 34 64 77 / mail sach@nanoq.gl imaluunniit immikkoortortaqarfimmi pisortaamut Ellen J. Karlsen-imut, oqarasuaat 34 62 12 / mail eljk@nanoq.gl

Kalaallit Nunaat Namminersorlutillu Oqartussat pillugit annertunerusumik paasisaqarusukkuit Naalakkersuisut nittartagaanni taakkua ujartorsinnaavatit - Atorfiit  ataanni. Ilinniartitaanermut Aqutsisoqarfik mail-ikkut qinnuteqaatinik tigusineq ajorpoq.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk