Ilinniartitaanermut Aqutsisoqarfik ilinniartitaanermut nakkutilliisussarsiorpoq

Ilinniartitaanermut nakkutilliisup suliassaasa pingaarnersaraat meeqqanut suli atualinngitsunut, meeqqat atuarfiannut, atuarfinnut namminersortunut, efterskolinut, højskolinut kiisalu immikkut atuartitsinermut aamma immikkut atuarfinnut politikkikkut allaffissornikkullu anguniagarineqartunik sullissinissaq. Ilinniartitaanermut nakkutilliisoq pisortaqatigiinnut, sussassaqarfiup ataani suliffeqarfinnut, kommuninut Ilinniartitaanermullu Naalakkersuisoqarfimmut siunnersortaassaaq. Ilinniartitaanermut nakkutilliisoq Ilinniartitaanermut Aqutsisoqarfimmi pisortaanerup tullersortaanit oqartussaaffigineqassaaq.

Ilinniartitaanermut Aqutsisoqarfiup ujartorpaa inuk ersarissumik piumassuseqarluarluni ineriartortitserusuttuusoq. Taassumap ilinniartitaanikkut iliuusissat aallartisartarsinnaavai ineriartortitseqataaffigalugillu, tamatumanilu suleqatigisassani Ilinniartitaanermullu Aqutsisoqarfimmi suleqataasut allat qanimut suleqatigisassallugit. Ilinniartitaanermut nakkutilliisup soqutigisaqarfiit arlallit akornanni ingerlatseqataallunilu, perorsaanikkut politikkikkullu tikkuussanik ineriartortitseqataasassaaq. Naalakkersuinikkut oqartussanik allatigullu suleqatigisat tungaanut qaammaasaqarluarluni suleqatiginnissuseqartuussalluni.

Qinnuteqaateqartup:

• Nunatsinni ilinniartitaanikkut pissutsit ilisimasaqarfigilluassavai, ilanngullugit naalakkersuinikkut anguniakkat taamatullu suliassaqarfimmut tunngatillugu inatsisitigut toqqammaviusut

• Sapinngisamik ilinniagartuujussaaq

• Pisortat ingerlatsiviini sulisutut misilittagaqartuussaaq

• Suleqatikkuminartuujutigaluni aalajangiisinnaassuseqassaaq taamatullu

• Oqaatsit attaveqatiginnittarnermullu tunngassuteqartut piginnaaneqarfigilluassallugit

• Taaneqartut saniatigut nammineersinnaassuseqarlunilu piffissakilliorfinni sullarissuussaaq.

Akisussaaffigisassat
Ilinniartitaanikkut nakkutilliisoq pisortaanerup tullersortaanut akisussaassuseqarluni piviusunngortitsinerit aammalu inatsisit toqqammavigalugit ilumut atuutsitsisoqarnersoq nakkutigisassarai.

Ilinniartitaanikkut pisortap allat suleqatigalugit suliniutit ineriartortitsinerillu allat aqutsisoqarfiup allalluunniit akisussaaffigisai suleqataaffigalugit ineriartortitseqataaffigissavai..

Ilisimasatigut atuagarsornikkullu sulerusussusilinnut peqataalerit
Ilinniartitaanermut Aqutsisoqarfimmi ilinniartitaanerup aaqqissuussaanerani tamarmi – meeqqat atuarfianniit inuusuttut ilinniarfiinut – pitsaassutsip qaffasissuunissaa qulakkeerniarlugu sulivugut. Illit suliffeqarfimmi allanngoriartortumi pingaarutilittut inissisimassaatit, ineriartortitsinermullu sunniuteqarnissamut periarfissaqarluassallutit.

Ilinniartitaanermut Aqutsisoqarfik pillugu 
Ilinniartitaanermut Aqutsisoqarfik tassaavoq suliffeqarfik politikkikkut ingerlatsiveqarfiusoq, Naalakkersuisoqarfimmik politikkerinillu sullissisoq kiisalu inerisaanermik saqqummersitsinernillu suliaqartoq. Suliffeqarfiuvugut assigiinngitsorpassuarnik suliaqarfiulluta, aqutsinerit atuutereersut saniatigut ilaatigut aamma saqqummersitsiveqarluta, naqiteriveqarluta paasititsiniaanermik atorniartarfimmillu katersugaateqarfeqarluta. Aqutsisoqarfiup meeqqat atuarfiat, efterskolit friskolit, GUX, Attat aamma NUIKI annerusumik sammisarpai. Suleqatigiit 50-it missaaniippugut, suliffeqarfimmi pingaartorsiorpallaanngitsumi suliat pitsaasuunissaannik pingaartitsisuulluta.

Atorfininnerup aallartiffia
1. december 2026 imaluunniit isumaqatigiissuteqarnikkut.

Paasissutissat allat
Atorfik pillugu annertunerusumik paasisaqarusukkuit : paasiniaafigineqarsinnaavoq Aqutsisoqarfimmi pisortaanerup tullersortaa Brita Toft Hyldgaard, oqarasuaat +299 34 6218  imal. e-mail: brth@nanoq.gl.

Qinnuteqarneq
Qinnuteqaat, CV, ilinniarnermut pikkorissarnermullu allagartat, kiisalu paasissutissat allat nassiutissapput “Qinnuteqaat nassiuguk” toorlugu. 

Qinnuteqarfissaq kingulleq: 24. oktober 2026.  

Aningaasarsiatigut atorfinitsitaanermilu atugassarititaasut
Atorfinitsitsineq, “Naalakkersuisut Ilinniartitsisullu Meeqqat Atuarfianneersut Kattuffiat, IMAK-ip akornanni Meeqqat atuarfianni ilinniartitsisut pillugit isumaqatigiissutaat” malillugu pissaaq. Qinnuteqartoq Kalaallit Nunaanni pisortat tjenestemandit pillugit inatsisaat malillugu tjenestemanditut atorfeqareersoq, tjenestemandinut atugassarititaasut atorlugit atorfinitsinneqarsinnaavoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.


Ilinniartitaanermut Aqutsisoqarfik E-mail-ikkut qinnuteqaatinik tigusineq ajorpoq.