Ilisimatusarfik aningaasaqarnermut immikkoortartumi sulisussarsiorpoq / tullersortaanissarsiorpoq

- illit suleqatissaraatsigit? 

Atuisunik sullissilluarnissamik pingaartitsilluni saniatigullu ilinniaqqissinnaaffigisannik naatsorsuuserineq aningaasaqarnerlu suliarissallugit nuannaraagit? Taamaappat Ilisimatusarfimmi naatsorsuuserinermut immikkoortortaq ilinnut suliffissaqqissuussaaq.

Aningaasaqarnermik naatsorsuuserinermillu suliaqarfipput pitsanngorsarusukkatsigu naatsorsuuserinermut immikkoortortatsinni misilittagaqarluartumik aningaasaqarnermik immikkoortortami sulisussarsiorpugut / overassistentissarsiorpugut.

Assigiinngisitaarluartunik suliamullu tunngatillugu inuttullu soqutiginarluartunik suliassaqartassaatit.

Naatsorsuuserinermik immikkoortortatsinni suleqatigiiuvugut pingasut piumassuseqarluartut (naatsorsuuserinermut pisortaq controllerillu marluk), atuisutsinnullu sullissilluarnissamik aalajangiusimannittumik ukkatarinnissinnaalluartumillu pikkorissumik suleqatissarsiorpugut.

Neriuppuguttaaq suliassanut aaqqiissutissanut tunngatillugu suleqatinnik siunersiuillaqqissuusutit suleqatigiittut naatsorsuuserinermut immikkoortortaq pitsanngorsaajuartarniassagatta.

Suliassatit ukuunerussapput:

• Naatsorsuusiorfiup Ilisimatusarfimmi suleqatigisartagaanik siunnersuineq

• Ilisimatusarfiup ukununnga tunngatillugu ulluinnarni aningaasaqarneranik nakkutilliillunilu malittarinninneq

• Naatsorsuusiornermi bilaginik tamanik nalunaarsuillunilu allattuineq

• Ilaatigut bank aningaasanillu tigoriaannarnik naligiissaarinermi suliassat

Taakkua saniatigut naatsorsuutigaarput ukuninnga suliaqartassasutit:

• Suleriutsinik nakkutilliineq allaffissornikkullu periutsinik inerisaajuarneq piuartitsinerlu

• Suliassat tamalaat naatsorsuuserinermut aningaasaqarnermullu tunngassutillit

Naatsorsuuseriviup suliassaanik tamanik misissuipallassinnaasariaqarputit naatsorsuuserivimmiullu peqatigalugit immikkoortortap suliaanut tamanut aaqqiissutissanik ataqatigiissaareqataasinnaasariaqarlutit. Taakkua saniatigut illit nammineq akisussaaffigisassannik tunineqarumaarputit.

Atorfininninnut atatillugu suliassat maanna agguataarsimanerannik allannguisoqarsinnaassaaq, illit suleqativillu piginnaasassinnik atorluaaniassagatta. 

Ukuninnga piginnaasaqarnissat kissaatiginarpoq:

• Aningaasaqarnermut naatsorsuuserinermullu tunngasumik ilinniagaqarneq.

• Naatsorsuusiornermik aningaasaqarnermillu aqutsinermik misilittagaqarneq.

• Ataqatigiissumik aaqqissuussisinnaaneq, tamakkiisumik isiginnissinnaaneq, peqqissaartuuneq akisussaaffimillu tigusisinnaaneq.

• Suleqatikkuminartuuneq oqaloqatikkuminartuunerlu – suleqatinut Ilisimatusarfiullu avataaneersunut.

• Pisortat aningaasaqarnermut systemiinik allaffissornermilu it-systeminik allanik ilisimasaqarneq

• Excelimik atuilluarsinnaaneq

• Attaveqarluarsinnaaneq allatatigut oqalunnikkullu

• Projektstyringssysteminik atuinermik misilittagaqarneq

• Kiffartuussilluarusuttuuneq

• Ulluinnarni suliassanik allanngorartuartunik sulinissamut piginnaasaqarneq

• Piginnaasatigut ilisimasatigullu ineriartortuarnissamik soqutigisaqarneq

• Sulisinnaassuseqarluarneq

Kiisalu kissaatiginarpoq marluinnik oqaaseqartuunissat (kalaallisut qallunaatullu), aamma tuluttut oqalussinnaallutillu allassinnaanissat, nunanit tamalaaneersunik suleqateqartaratta nunallu tamalaat akornanni suliniutinut arlalinnut peqataasaratta.

Neqeroorutigissassagut:

• Suliatigut ineriartornissamut periarfissaqarneq

• Suliassat assigiinngisitaarluartut

• Suleqatit pikkorissut, qiimasut piginnaasaqarluartullu persuarsiorpalaartuunngitsumik pissusillit.

• Atorfiup suliassartaanut sunniuteqarsinnaaneq

• Susassaqarfiup iluani ineriartorsinnaaneq ilinniagaqarsinnaanerlu

• Suliffik ineriartorfiusoq

Atorfiup sukkanermik isumaqatigiissutigineqartorluunniit naapertorlugu inuttalerneqarnissaa kissaatigineqarpoq. 

Attavigisassat/ilisimatitsissutit:

Atorfik pillugu sukumiinerusunik paasisaqarusukkuit, tikilluaqquneqarputit Regnskabschef Svend Lynge Larsen oqarasuaammut +299 34 73 22 attavigisinnaavat. Ilisimatusarfik pillugu paasisaqarnerorusukkuit paasissutissat allat atuarsinnaavatit uunga iserlutit www.uni.gl

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut 13-upput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik

• Inuiaqatigiilerinermik, Aningaasaqarnermik Tusagassiornermillu Ilisimatusarfik

• Kulturimik, Oqaatsinik Oqaluttuarisaanermillu Ilisimatusarfik

• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilimmarfimmi immikkoortortaqarpoq. Immikkoortortat ilinniartitsivinni ingerlatsiviusunik qanimut suleqateqartarput soorlu namminneq akunnerminni aamma suleqatigiittartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit allaffissornikkut aqutsineq, Siulersuisunik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup illutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.