Ineqarnermut Illuuteqarnermullu suliassaqarfimmut allaffimmi pisortaq

Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoqarfik Sanaartornermut immikkoortortaqarfimmi Ineqarnermut Illuuteqarnermullu suliassaqarfimmut allaffimmi pisortassarsiorpoq.

Suliassaqarfimmut ineqarnermut politikkimik, inissianut aningaasalersuinermik, inatsisinik aammalu suliassaqarfimmi innuttaasunut inuiaqatigiinnullu annertuumik pingaarutilimmi politikkikkut-allaffissornikkut sullissinermik suliaqarnermi siuttoorusuppit?

Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoqarfik Ineqarnermut Illuuteqarnermullu suliassaqarfimmut allaffimmi pisortamik suliatigut nukittuumik pimoorussisumillu sulisussarsiorpoq.

Ineqarnermut politikkip, inissianut aningaasalersuinerup inatsisillu iluanni suliassaqarfiit amerlasuut Ineqarnermut Illuuteqarnermullu suliassaqarfimmi isumagineqarput. Tamatuma saniatigut Namminersorlutik Oqartussat inissiaataannik attartortittakkanik allaffissornikkut aqutsineq aammalu Namminersorlutik Oqartussat illuutinut allanullu atortutigut pigisanut nalilinnut piginnittutut inissisimanerata isumagineqarnera, suliassaqarfimmi akisussaaffigineqarput, ilanngullugit pisisarneq tunisisarnerlu. Tamatuma saniatigut innuttaasunit saaffiginnissutit aamma politikkikkut-allaffissornikkut sullissineq suliassaqarfimmi isumagineqarput.

Ineqarnermut Illuuteqarnermullu suliassaqarfik aaqqissuussaanikkut Sanaartornermut Immikkoortortaqarfimmi inissisimavoq. Ilaatigut qitiusumi sanaartornermut oqartussaqarfik aamma nutaanik illuliortiternermi Namminersorlutik Oqartussat qitiusumi sanatitsisutut inissisimanerat kiisalu ineqarnerup illuuteqarnerullu, isorliunerusut, sillimmasiisarnerup aammalu avataaneersut aningaasaateqarfiit aningaasalersuisarnerisa iluanni suliassat immikkoortortaqarfimmi isumagisarineqarput. Tamatuma saniatigut Naalakkersuisoqarfimmi aningaasaqarnermi suliassat aammalu Namminersorlutik Oqartussani naalakkersuisoqarfinni suliassaqarfiit akimorlugit sanaartornermut aningaasaliissutinik aqutsineq immikkoortortaqarfiup akisussaaffigai.

Atorfik pillugu

Allaffimmi pisortatut Ineqarnermut Illuuteqarnermullu suliassaqarfimmut suliatigut sulisoqarnikkullu aqutsinermut akisussaaffeqalissaatit. 

Ineqarnermut Illuuteqarnermullu suliassaqarfimmiipput inatsisileritooq ataaseq, fuldmægtigit marluk, aningaasaqarnermi suliassanik suliarinnittartoq ataaseq aammalu kontorfuldmægtigi ataaseq. Sulisut assigiinngitsunik suliatigut ilisarnaateqarput akisussaaffeqarfeqarlutillu aammalu ilaatigut suliarisarlugit inissianut aningaasalersuineq, pigisat aalaakkaasut, inatsisit, inissianut attartortittakkanut suliassaqarfik, pigisanik nalilinnik pisisarneq tunisisarnerlu, innuttaasut saaffiginnissutaat aammalu politikkikkut-allaffissornikkut sullissineq.

Suliassaqarfiup sammivilernissaa, suliassanik pingaarnersiuineq ataqatigiissaarinerlu aammalu suliassanik suliarinninnermi qaffasissumik pitsaassuseqartitsinissap siumullu ingerlanissap qulakkeernissaa akisussaaffigilissavatit. Peqatigisaanik sulisut suliatigut ineriartornerat tunngavississavat aammalu nammineerluni suliassanik suliarinninnissamut, akisussaaffeqarnissamut suleqatigiinnissamullu pitsaasunik sinaakkutissiissallutit.

Atorfimmi sulisunik aqutsineq suliassatigullu aqutsineq inatsisinik suliaqarnermut, oqartussat suliassaannut, aningaasaqarnikkut allaffissornikkullu ajornartorsiutinut kiisalu qanimut politikkikkut-allaffissornikkut sullissinermut ataqatigiissinneqarput.

Sanaartornermut immikkoortortaqarfimmut immikkoortortaqarfimmi pisortap ataaniissaatit aammalu Naalakkersuisoqarfimmi aqutsisut Naalakkersuisorlu kiisalu Naalakkersuisoqarfiit allat, kommunit, ingerlatseqatigiiffiit, aningaasalersuinermut sullissiviit allallu suleqatigisartakkat qanimut suleqatigissallugit.

Suliassatit

Suliassatit ilaatigut tassaassapput:

• Ineqarnermut Illuuteqarnermullu suliassaqarfimmi sulisunik sulisoqarnikkut aqutsineq aamma suliatigut aqutsineq

• suliassaqarfimmi suliassaqarfinnik ataatsimoortunik pingaarnersiuineq, ataqatigiissaarineq pitsaassutsinik qulakkeerineq

• suliassani aalajangersimasuni tunngaviusussanilu sulisunik siunnersuineq suliassatigullu isumasioqataaneq

• suliassaqarfimmi inatsisinik ineriartortitsineq, allaffissornikkut aqutsineq malitseqartitsisarnerlu

• Namminersorlutik Oqartussat inissiaataannik attartortittakkanik periusissatigut ineriartortitsineq aammalu allaffissornermi malinnaaneq

• Namminersorlutik Oqartussat inissianut aningaasalersuinermut aaqqissuussinerinik allaffissornikkut aqutsinermut ineriartortitsinermullu qullersatut akisussaaffik

• illuutinut allanullu atortutigut pigisanik nalilinnik Namminersorlutik Oqartussat piginnittutut inissisimanerannik isumaginninneq, ilanngullugit pisisarneq, tunisisarneq tunniussisarnerlu 

• pigisanut aalaakkaasunut nunaminertanullu pisinnaatitaalernissaq pillugu maleruagassanik allaffissornikkut aqutsineq

• suliassaqarfimmi akisussaaffeqarfiit iluanni tunngaviusumik nalinginnaasumillu apeqqutinik suliarinninneq pitsaassutsinillu qulakkeerineq 

• Naalakkersuisut isummernissaannut tunngavissianik, § 37 naapertorlugu akissuteqaatinik, tusarniaanermut akissuteqaatinik, allakkianik allatigullu politikkikkut najoqqutassanik suliaqarneq pitsaassutsinillu qulakkeerineq

• Naalakkersuisumik Naalakkersuisoqarfimmilu aqutsisunik siunnersuineq aamma politikkikkut-allaffissornikkut sullissineq

• suliassaqarfiup iluani aningaanut inatsimmut, missingersuutinik malinnaanermut aningaasaqarnikkullu pingaarnersiuinermut suleqataaneq

• oqartussanut, kommuninut, ingerlatseqatigiiffinnut suleqatigisartakkanullu allanut ataqatigiissaarineq suleqateqarnerlu 

• suleriaasissanik ineriartortitsineq, pitsaassutsinik qulakkeerineq aammalu allaffissornikkut assigiissaartumik suleriaaseqarneq

 Illit pillutit

Takorloorparput illit assersuutigalugu inatsisilerinerup, pisortat allaffissornikkut aqutsinerisa, inuiaqatigiilerinerup, aningaasaqarnerup imaluunniit suliassaqarfiup naleqquttup allap iluanni naleqquttumik ingerlaqqiffiusumik ilinniagaqarsimasutit. Aalajangersimasumik ilinniagaqarnermik tunuliaqutaqarnerit aqutsinermut piginnaasaqarferniit, suliassatigut naliliisarnerniit aammalu aaqqissuussaanermi politikkikkut aqunneqartumi ajornartorsiutit pisariusut iliuuseqarfiginissaannut piginnaasaqarnerniit, aalajangiisuunnginneruvoq.

Pingaartipparput illit:

• sulisoqarnermi suliassatigullu aqutsinerup isumaginissaanut aqutsinermut misilittagaqartutit imaluunniit sakkortuunik tunngavissaqartutit

• sammiviliisinnaasutit, pingaarnersiuisinnaasutit aammalu ulluinnarni ataatsikkut assigiinngisitaartunillu suliassaqarfiusartumi siumut ingerlanissamik qulakkeerisinnaasutit

• aaqqissuussaanermi politikkikkut aqunneqartumi sulinermut paasisimasaqartutit

• periusissatigut ineriartortitsinermi aaqqissuusseqqinnermilu suliassanik ingerlatsisinnaasutit aammalu politikkikkut aalajangiinerit ataasiakkaatigut piviusunngortissinnaagitit

• misissueqqissaarnermut piginnaasaqarluartutit aammalu inatsisilerinikkut, allaffissornikkut aningaasaqarnikkullu ajornartorsiutit paasisinnaagitit

• allattariarsornermi oqaluinnarnermilu paasissutissiillaqqissutit

• aalajangiinissamut tunngavissiat, inatsisit, allakkiat aalajangiinerillu suliatigut pitsaassusaannik qulakkeerisinnaasutit

• aalajangiisinnaasutit aammalu suliassaqarfimmi ataatsimoortumik suliassanik suliarinninnermut akisussaaffeqarsinnaasutit

• sulisut ingerlalluarnissaannut, suliatigut ineriartornissaannut, akisussaaffeqarnerannut namminersorsinnaanerannullu pitsaasunik sinaakkutissiisinnaasutit

• suleqatiginnillaqqissuusutit aammalu oqartussat kattuffiillu akimorlugit atassuteqalersitsisinnaasutit

• paasisimaarinniinnarsinnaasutit aammalu siumut ingerlanissamik qulakkeerisinnaasutit, aamma piffissamut killigititat sivikitsillugit politikkikkullu annertuumik eqqumaffigineqartillugit.

Aaqqissuussaanermit politikkikkut aqunneqartumit imaluunniit pisortat allaffissornikkut ingerlatsinerannit misilittagaqarneq iluaqutaassaaq, kisianni piumasaqaataanani.

Ineqarnermut suliassaqarfimmut, inatsisiliorluni suliaqarnermut, politikkerinik sullissinermut, inissianut aningaasalersuinermut imaluunniit aningaasaqarnermut ilisimasaqarneq iluaqutaassaaq.

Kalaallit Nunaanni inuiaqatigiinnut tunngasunik ilisimasaqarneq annertuumik pingaartinneqarpoq.

Kalaallisut danskisullu attaveqaqateqarsinnaaguit iluaqutaassaaq.

Neqeroorutigaagut 

Qitiusumi pisortatut atorfik annertuumik akisussaaffeqartoq aammalu qitiusumi politikkikkut suliassaqarfiup innuttaasunut inuiaqatigiinnullu annertuumik pingaarutillip ineriartorneranut sunniinissamut periarfissaqartoq neqeroorutigaarput.

Suliassaqarfik sulisunik pikkorissunik aammalu suliassanut toqqammaveqarluartunik tamakkiisumik inuttalersugaasoq tigussavat.

Politikkikkut aalajangiinissamut suliat ingerlanerat qanillugu sulinissamut aammalu ataasiakkaatigut oqartussatut suliaqarnernit aningaasaqarnikkullu allaffissornikkut aqutsinermit inatsisinut, periusissianut aammalu ineqarnermut politikkimik ineriartortitsinermut tunngasunik suliaqarnissamut periarfissaqalissaatit.

Sanaartornermut immikkoortortaqarfik aamma naalakkersuisoqarfik akimorlugit suliassatigut avatangiisini assigiinngitsunik suliassaqarfiusumi, aalajangiinissamut aqqutissat sivikillutik qanimullu suleqatigiilluni, sulineq ingerlanneqarpoq.

Suliatigut, inuttut aqutsinikkullu ineriartornissamut periarfissaqarluarpoq.

Soqutiginnippit? 

Apeqqutissaqaruit Immikkoortortaqarfimmi pisortaq Ha Embla Kristjánsdóttir, emki@nanoq.gl attaveqarfigisinnaavat

Aningaasarsiatigut atorfinitsitaanermilu atugassarititaasut

Atorfik akissaateqarfimmi LR 36-mi maanna inissisimavoq.  1. april 2026 LR 36-mi tunngaviusumik akissarsiaq tapiillu aalajangersimasut soraarnerusutissianullu illuartittagaq ilanngullu antterussuseqarput qaamammut   Kr. 57.531 ukiumullu Kr. 690.372.

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput. Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Atorfininnissaq 1. november 2026 imaluunniit isumaqatigiissuteqarneq malillugu.

Ineqarneq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. E-mail-ikkut qinnuteqaatinik tigusineq ajorpugut.