Inuussutissarsiutinik ineriartortitsinermut tapiissutisinissamut suliassaqarfimmi aalisarsinnaanermut akuersissutinut ESU-milu allaffimmi siunnersorti imaluunniit immikkut siunnersorti

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup ataani Aalisarnermut immikkoortortaqarfiup Aalisarsinnaanermut akuersissutinut ESU-llu allaffeqarfia aalisartunut piniartunullu inuussutissarsiutinik ineriartortitsinermut tapiissutisinissamut - suliassaqarfik siunnersortimik imaluunniit immikkut ittumik siunnersortimik pissarsiorpoq. Siunnersorti suleqatit peqatigalugit aalisartunut piniartunullu tapiissutinut aaqqissuussinermut akisussaaffeqassaaq, taassuma ataani aallarteqqinnissamut tapiissutit, umiatsianut tapiissutit, aalisarnermut aningaasaliissutinut immikkoortitanut angallatinut nutaanut angallatinullu pisoqaanerusunut isaterinermut tapiissutit. Taassuma saniatigut siunnersorti inuussutissarsiornermut tapiissuteqartarnermi inatsit nutarternissaanut suliaqarnermut ilaassaaq.

Naalakkersuisoqarfiup aalisarnermik piniarnermillu inuussutissarsiorneq, nunalerineq imminullu pilersorneq, kiisalu politikkikkut anguniakkat naapertorlugit uumasunut nakorsaqarnermut atugassarititat ineriartortinnissai pingaarnertut anguniagarivaa. Tassunga ilaallutik Inatsisartunit Naalakkersuisunillu suliassatigut malittarisassat aalajangersakkat ingerlanneqartarnissaat.

Aalisarsinnaanermut akuersissutit ESU-llu allaffeqarfiat Aalisarnermut immikkoortortaqarfiup ataaniippoq, tassani immikkoortortaqarfiit assigiinngitsut inatsisilerinermut, aningaasaqarnermut, pilersaarusiornermut, Kalaallit Nunaanni Aalisarnermut Piniarnermullu Nakkutilliisoqarfik kiisalu aalisartunut piniartunullu Siunnersorteqarfimmi, AAPISI-milu immikkoortortaqarfik peqatigalugu qanimut suleqatigiittoqartarpoq. Avatangiisini pissanganartuni suliatigullu unammillernartuni,suliatigut ineriartornissamut periarfissalimmi, sulisoqassaaq. Taamaalilluta suliffik nutaaliornermik nutaamillu eqqarsarnermik samminnittoq neqeroorutigaarput; sulineq, politikkikkut aalajangiisarnermut qanittoq; sullivimmi avatangiisit persuarsiorfiunatillu ammasut pimoorussisunik sulisullit; inuttut pissanganartut suliatigullu unammilligassat.

Atorfik pillugu

Inuussutissarsiutinik ineriartortitsinermut tapiissutisinissamut suliassaqarfimmut ESU-mut siunnersortissarsiortoqarpoq, taassuma aalisartut piniartullu tapiissuteqarnermik aaqqissuussinerit assigiinngitsunut qinnuteqaataasa pingaarnerpaatut suliassarai. Suleqatitit peqatigalugit qinnuteqaatit takkuttut nalilersortassavatit aamma inatsit periutsillu tunngavigalugit aalajangiisassaatit, tapiissutinut periarfissat, ingerlaavartumik tunniunneqartut, isaterinermut ataatsimiititaliap ikorfartornissaanut aalajangiinernullu inassuteqaatit pillugit qinnuteqartut aqqutissiuttassavatit. Inatsimmut nutarterinissamut siunnersuummut tunngaviliisussamik aamma qulaajaangaatsiartoqalerpoq, tassunga ilaatigut suleriutsinik pitsanngorsaaneq qimerloorneqassaaq. Taamaalilluni suliatigut akisussaaffitigullu ineriartortitsinissamut periarfissaqarluarpoq.

Suliassat:

• ESU-suliassaqarfiup iluani tapiissutinut qinnuteqaatinut suliaqarneq,

• Qinnuteqaatigineqartunut, neriorsuinernut itigartitsinermullu nalunaarsuinerit,

• BDL aqqutigalugu tapiissutissanik tunniussinerit,

• Isaterinermut ataatsimiititaliamut allatseqarfittut ingerlatsineq

• ESU-akiitsunut isumakkeerfiginninnissamut qinnuteqaatinik suliaqarneq, 

• ESU pillugu aalisartunik piniartunillu sullissineq,

• AAPISI kommuninilu inuussutissarsiornermut siunnersortinik suleqatiginninneq,

• Aalisarnermut immikkoortortaqarfik qinnuteqaatinut immersugassanik nutarterinermik ikiorlugu, sullissivik.gl il il. 

• Inatsisit malittarisassallu atuuttut naapertorlugit suliaqarneq,

• Naalakkersuisoqarfimmi allaffissornikkut najoqqutassat, periutsit, pitsaassutsimullu piumasaqaatit nalinginnaasut atuutilersinneqarnerini peqataaneq

• KANUAPNA, inatsisilerinermik immikkoortortaqarfik, Aalisarnermullu immikkoortortaqarfik suleqatigalugu qinnuteqaatilerineq inatsisinillu ineriartortitsineq,

• Suleqatit suleqatigalugit ilitsersuutinik, najoqqutassanik immikkoortortaqarfimmilu aalajangersimasunik allakkanik nutarterinermi ataqatigiissaarineq,

Piginnaasassatut piumasaqaatit:

Qinnuteqartoq tamatigoortoq naleqquttumik ilinniagalik misilittagalimmillu pissarsiortoqarpoq. Tamatuma saniatigut ilaatigut makkua piginnaasaqarfigineqassapput:

• Kalaallisut danskisullu allattariarsornikkut oqaatsitigullu piginnaasaqarlutit.

• Suliniuteqarumatooq, suliassanik naammassinninnissamut akisussaaffimmik tigusinissaminut piareersimasoq, tamaanngaaniillu ineriartorsinnaasoq

• Aaqqissugaasumik sulisinnaassaatit pisunilu ulapaarfiusuni tamakkiisumik isiginnissinnaanerit attatiinnarsinnaassavat

• Naalakkersuisoqarfiup Namminersorlutillu Oqartussat akisussaaffii tamakkerlugit ilaannakortumilluunniit suliamut tunngasutigut misilittagalik

• Aqutsinermik suliassanik, inatsisiliornermi sulianillu suliarinninnermik misilittagalik

• IT-mi aaqqissuussanik atuinermik misilittagalik, taassuma ataani XAL aamma/imaluunniit BDL

• Naatsorsuinermik missingersuusiornermillu ilisimasaqarneq iluaqutaassaaq

• Aaqqissuussamik suliaqartunik assigiinngitsunik attaveqaqatigiinninnissaminut suleqateqarnissaminullu misilittagalik

• Innuttaasunik sullissinermik innuttaasunillu ilitsersuinermik misilittagalik

• Suleqatiginnillaqqisoq, ammasoq aamma sungiussiasoq

• Aalajaatsuuneq aamma qiimasuuneq

Atorfinittussatut piukkunnaateqartumut ukiuni arlalinni misilittagaqareersumut, aalajangersimasumik nalilersuisoqareernerata kingorna immikkut ittumik siunnersortimut atugassarititaasut malillugit atorfinitsitsisoqarsinnaavoq

Suliffiup sumiiffigivaa Nuummi Aalisarnermut, Piniarnermut, Nunalerinermut Imminullu pilersornermut Naalakkersuisoqarfik. Atorfik piaartumik inuttalerneqarusuppoq imaluunniit atorfimmut inuk tulluuttoq isumaqatigiissusiorfigalugu inuttaliisoqarusulluni. 

Atorfik pillugu paasissutissat pissarsiarineqarsinnaapput uannga Immikkoortortaqarfimmi pisortaq Katrine Kærgaard, katk@nanoq.gl imaluunniit 345365

Qinnuteqarnissamut killigititaq: 16.05.2025

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk