Kalaallit Nunaanni siunissami attaveqaasersuutissanik ilusilersueqataarusuppit?

Attaveqaasersuutinut immikkoortortaqarfimmut ataatsimik imaluunniit arlalinnik fuldmægtigissarsiorpugut. Pisariaqartunik piginnaasaqarluni qinnuteqartumut, naliliinikkut immikkut siunnersortitut atorfinitsitsinissamut periarfissaqarpoq.

Politikkip, inuiaqatigiit, teknikkillu akornanni sulerusussuseqarlutit suliaqarfiit assigiinngitsut iluini siammasissumik ilisimasaqarlutillu piginnaasaqarpit? Ulluinnarni ulapaarfimmi, inuiaqatigiinnilu suliassanut pingaarutilinnut sunniuteqarnissannut periarfissaqarlutit sulisinnaassuseqarpit? Taamaassimappat immaqa illit ujartorpatsigit!

Atorfik pillugu

Suliassat siammasillutik silaannakkut angallanneq, imaatigut angallanneq, umiarsualiviit, nalunaarasuartaatitigullu attaveqaatit suliaqarfiupput. Suliassat pissanganarluinnartut massakkut ingerlappagut – pissanganartunillu suli suliassaqarumaarluta. Massakkut silaannakkut angallannermut immikkoortortami atorfik ataaseq inuttaqanngilaq, kisiannili immikkoortortat allat aamma pineqarsinnaapput. Soqutigisatit, piginnaasatillu atorluarniassammata suliassat eqaatsumik, illillu oqaloqatigalutit aaqqissuutissavagut.

Suliaqarfitta ilaanni suleqataasutut ilaatigut makkua suliarisassavatit:

• Politikerinik sullissineq, aalajangiinissanullu tunngavissaliorneq

• Soqutigisaqaqatigiinnik aamma Danmarkimi, Kalaallit Nunaannilu suleqatigisanik ataatsimeeqateqarnerit

• Innuttaasut saaffiginnissutaannik, tusarniutinillu akissuteqarnerit

• Unamminartut, ineriartortitsinissamullu periarfissat nassaarineri

• Imaqarniliornerit, misissueqqissaarnerit, allakkiornerit, aaqqiissutissatullu siunnersuusiornerit

• Akimortumik sulianik ataqatigiissaarineq, malittarinninnerlu

• Ataatsimiinnissanik pilersaarusiorneq

Suliaqarfiit akimorlugit aaqqissuussinermi ataqatigiissaarisunngornissannut aamma periarfissaqarpoq. Immikkoortortaqarfimmi piffissami pisumi katiterineq apeqqutaassaaq.

Ilinnit naatsorsuutigisagut

Ilinniagartuusutit naatsorsuutigaarput, ilinniarsimassutsikkulli tunuliaqutaq aalajangiisuunngilaq. Piginnaasannik eqeersimaartumik atuerusussuseqarnerit, ulapaarfimmilu tamat isiginnissuseqarsinnaanerit aalajangiisuupput.

Taassumap saniatigut pingaartipparput:

• Teknikkikkut, inatsisitigullu ajornartorsiutit iserfigisinnaagitit

• Sammisat paasiuminaatsut ersarissumik, paasiuminartumillu paasissutissiissutigisinnaagitit

• Tulleriiaarillutit sulisinnaasutit, aaqqissuussillaqqittutillu

• Misissueqqissaarineq pikkoriffigigit, aaqqiissutissarsiorsinnaasutillu

• Suleqtinik aamma Kalaallit Nunaanni, Danmarkimilu suleqatigisanik suleqateqarsinnaalluartutit

• Namminersorlutit sulisinnaasutit, qaqugukkulli suleqatinnik siunersiueqateqassanerlutit ilisimaarigit

• Aaqqissuussisimanermi politikkikkut aqutami sulineq paasisimasaqarfigigit

Kalaallit inuiaqatigiit, oqaasii, kulturiallu ilisimasaqarfigigukkit iluaqutaassaaq – piumasaqaataanngilarli. Taamaakkaluartoq Kalaallit Nunaanni aamma Danmarkimi politikkit, inatsisillu oqimaaqatigiinnerat pillugit paasisimasaqarfigerusussuseqalernissat pingaaruteqarpoq.

Aaqqissuussisimanermi politikkikkut aqutami misilittagaqarneq iluaqutaassaaq, ilinniakkannilli naammassinnerlaaguit aamma tusarfigerusuppatsigit. Ilitsersuilluassaagut, suliatigullu tapersersuilluarluta – akerlianilli Kalaallit Nunaanni inuiaqatigiit alapernaaffigissagit, ilikkagaqarusussuseqassasutillu naatsorsuutigaarput.

Uagut pilluta

Attaveqaasersuutinut immikkoortortaqarfik pimoorussisunik aqqanilinnik, allaffinnut marlunnut agguataarsimasunik sulisoqarpoq. Politikkikkut aalajangeeriaatsit qanillugit sulivugut, inuiaqatigiinnilu immikkoortorpaaluit qitiusut akisussaaffigalutigit: silaannakkut angallanneq, mittarfiit, imaatigut angallanneq, umiarsualiviit, aqqusinikkut angallanneq, angallanneq, allakkat, nalunaarasuartaatitigullu attaveqarneq. Uagutsinni ulluinnatit isumaqassapput, suliatit unamminartassapput, allanngueqataanissannullu periarfissaqassallutit.

Suliffeqarfik inissaqartitsilluartoq, suleqatigiit ataatsimoorluartut aamma suliffeqarnerup, ilaqutariinnerullu oqimaaqatigiinnissaannik ataqqinniffiusoq neqeroorutigaarput. Atorfimmik pimoorussiutigaluni nuannisartoqarsinnaasoq upperaarput – ullullu ingerlanerani illaqatigiissinnaaneq pingaartipparput.

Suliaqarfigut www.kanat.gl-imi annertunerusumik paasisaqarfigisinnaavatit.

Pinerluuteqarsimannginnermut uppernarsaat

Atorfimmi atorfinissinnaassaguit malittarisassat naapertorlugit pinerluuteqarsimannginnermut uppernarsaateqartariaqarputit, pinerluuteqarsimannginnermullu uppernarsaat atorfeqarnerit tamaat atatiinnarneqarsinnaasariaqarluni. Tamanna pillugu pinerluuteqarsimasunik nalunaarsuiffimmit pinerluuteqarsimannginnermut uppernarsaat ilanngullugu nassiutissavat. Taanna najukkami politeeqarfimmi imaluunniit www.politi.gl/bestil-straffeattest/privat-straffeattest-imi pissarsiarineqarsinnaavoq.

Aningaasarsiatigut, atorfinitsitaanermilu atugassarititaasut

Aningaasarsiatigut atorfinitsitaanermilu atugassarititaasut, matumani atorfininnermi suliunnaarnermilu angalasinnaatitaanerit pequtillu assartorneqarsinnaatitaanerat, atorfininnermi Namminersorlutik Oqartussat kattuffiullu isumaqatiginninniarsinnaatitaasup attuumassuteqarfigisap akornanni isumaqatigiissutaasut naapertorlugit inissinneqassapput.

Qinnuteqartoq uppernarsakkamik piginnaasalik, isumaqatigiissut atuuttoq naapertorlugu immikkut siunnersortitut atorfinitsinneqarsinnaavoq.

Ineqarneq

atorfimmut atatillugu inimik innersuussisoqassanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalillunilu atorfeqarnerup taamaatinnerani qimanneqassalluni.

Qinnuteqaat

Qinnuteqaat, CV, ilinniarsimanermut aamma pikkorissarsimanermut uppernarsaatit, pinerluuteqarsimannginnermut uppernarsaatip assilinera kiisalu pappiaqqat pingaarutillit allat ”Qinnuteqaat nassiuguk” toorlugu nassiutikkit.

Oqaloqatiginninnerit ataavartumik ingerlatissavagut.

Piaartumik, isumaqatigiissuteqarnikkulluunniit atorfinitsitsisoqassaaq.

Qinnuteqaatinik mailikkut tigusineq ajorpugut.

Qinnuteqaat nassiuguk