Kusernermut katsorsaanermi siunnersorti tullersortitut inissisimasoq

Peqataarusuppit ilaqutariinnut tapersersorneqarnissaminik pisariaqartitsisunik naartusunik inoorlaajutilinnullu ineriartornermik aaliagersimasumillu inuunermi periuseqalersitsisumik pilersitsinissamut?

Kuserneq ilaqutariinnut tapersersorneqarnissaminnik pisariaqartitsisut inoorlaajutilinnut meeraaratilinnullu najugaqarfiullunilu katsorsaaviuvoq, tassanilu ataatsimut isiginnittumik angajoqqaat piginnaasaat, attaveqarneq, aaqqissuussaaneq kiisalu meeqqap angajoqqaallu inuttut ineriartornerat suliaqarfigisarpagut.

Nalunngilarput allannguiniarneq sivisusinnaasoq aammalu ineriartorneq qanilaarnikkut, ersarinnikkut sulianillu ilisimasaqarnikkut taamaallaat pisartoq. Ineriartornissamik siunnerfeqarluta nukissallu qitiutillugit suleriaaseqarpugut. Tamannalu isumaqarpoq, piumasaqaateqarlutalu sinaakkusiisartugut saniatigut ilaqutariit nukittussusaat piginnaasaallu takusinnaanissaat ukkattarisarlutigu.

Anguniagaraarput pilersissallugu ilaqutariinnut aaliagersimasumik ineriartorfiusumillu sinaakkusiinissaq, taamaalilluni meeqqat angajoqqaami inuunerminniit atugarisimasinnaasaannit allaanerusumik inuunerminnik aallartitsisinnaaniassammata.

Suleqatigiit:

Suleqatigiit ukuupput, immikkoortortami aqutsisoq, katsorsaanermi siunnersorti/tullersorti, meeqqanut inersimasunullu ilaqutariinnut aqqutissiuisut kiisalu tarnikkut katsorsaasoq.

Suleqatigiit suliatigut tunniusimasuuvugut, qanimut suleqatigiittarluta aammalu isumasioqatigiinneq, ataatsimut eqqartueqatigiinneq ersarissumik atuuffeqarnissarput pingaartitaraagut. Upperaarput ikioqatigiilluartaraangatta nukittuffigullu atorluaraangatsigit taavalu ilinniarneq ingerlaavartumik pileriartornertut isigalugu iluatsilluarnerusarluta.

Katsorsaanermi siunnersortimik ilutigalugu tullersortitut aammalu aqutsisumut sinniisutut atuussinnaasumik pissarsiorpugut.Atorfik aaqqissuussaanermi qitiuvoq aammalu isumaginnikkut suliatigut ataqatigiissaarineq, suliffeqarfimmi malinnaatitsineq, suliaqartut allat suleqatigineri, uppernarsaasiornermi akisussaasuuneq aqutsisutullu akisussaaqataasuuneq kattutilersillugit.

Illit aamma nammineq ilaqutariinnik oqaloqatiginnittassaatit aammalu katsorsaanermi suliaqartassallutit.

Suliatigut ersarissuseq misigeqataanermik qanilaassuseqarnermillu oqimaaqatigiississinnaassavat aamma ilaqutariinnik naapitsinermi suleqatinillu suleqateqarnermi toqqissisimalersitsisinnaassallutit.

Piffissaq suliffiusoq sinaakkutillu:

·Atorfik piffissaq tamakkerlugu atorfiuvoq sapaatip-akunneranut akunnerit 40-t suliffiulluni.

·Piffissaq suliffiusoq tunngaviusumik 8:00-16:00 suliffiuvoq.

·Pigaartuunermi oqarasuaat siumoortumik pilersaarusiarineqartoq ilanngunneqassaaq.

·Aallaarsimaarnernut ilaqutariit peqatigalugit pilersaarusiaasunik angalanissanut peqataanissaq naatsorsuutigineqassaaq.

Naleqartitavut:

Kusernermi makkua aallaavigalugit sulisarpugut:

∙Ataavartumik periuseqarneq siumoortumillu pilersaarusiorneq: sinaakkutit toqqissisimatitsisarput

∙Attaveqarnermi toqqissisimaneq: ineriartorneq pilersarpoq tatigeqatigiinnermi attaveqarnermi.

∙Suliatigut ersarissuseq: ataqatigiimmik aaqqissuussaasumillu sulisarpugut

∙Ataatsimut isiginnittumik suliniuteqarneq: meeraq qitiuvoq ilaqutariinneq sinaakkutaavoq

∙Akisussaassuseqarneq: ataatsimoorluta suliamik kivitsisarpugut

Illit katsorsaanermi siunnersortitut taakku naleqartitat sulinermi piviusunngortinnissaannut pingaarutilittut inissisimassaatit, aamma neuroaffektivimik perorsaaneq isumassarsiorfigalugu akuersaartumik nalaataqarsimanermit kingunerlutsitsineq pillugu ilisimasat aallaavigalugit suleriuserput atorlugu sulissaatit. Allanngoriartornermi naleqqussarneq, atassuteqarneq ineriartornerlu tunngavittut qitiutitaraagut aammalu aaqqissuussaaneq erseqqissuunerlu toqqissisimalersitsisartut upperalugu.

Illit atuuffiit:

Ilaqutariinnut ingerlatanut tunngatillugu ataqatigiissaarisutut katersuuffittullu atuuffeqassaatit. Atuuffik katsorsaanermik qitiutitsivoq suliamillu ingerlatsinermik tunngaveqarluni. Ilaqutariit ulluinnaani annikitsunik annertuunillu ineriartortitsiniarlutit katsorsaanermut tunngasunik suliatigut ilisimasalittut ilaqutariit peqatigalugit sulissaatit. 

Makkua akornanni ataqatigiittoqarnissaa qulakkiissavat:

·Ulluinnarni katsorsaanermik suliniuteqarneq aammalu ilaqutariit ineriartorneranni ingerlatsinerit

·Ataasiakkaanut katsorsaanermi pilersaarusiat aammalu ineriartornermi anguniagassatut siunniussat ersarissut

·Aaqqissuussaasumik uppernarsaasiorneq suliatigullu isumalioqqissaarneq

·Suliaqarfinni assigiinngitsuni nalilersuinerit suleqatigiillu qanimut oqaloqatiginerisigut aalajangiinerit

Suliani ajornakusoortuni tamakkiisumik isiginnissinnaassaatit, atassuteqarnerlu katanngikkaluarlugu ataatsimoortitsillutillu ataqatigiissaarisinnaassaatit. Tamatuma ilutigalugu ineriartornerup ingerlaarnerani suliaqarnermi nikallujaallutit ataavartumillu suliaqartassaatit.

Illit suliassatit:

Ataqatigiissaarineq aamma oqartussat suliaqartullu avataaneersut suleqatigalugit:

∙Ilaqutariit ataasiakkaat suliniuteqarfiginerini ataqatigiissaarineq

∙Sullissisunut allanullu suleqatigisanut aalajangersimasumik attaveqaataasarneq

∙Killiffissiuilluni ataatsimiinnernut attaveqarfiillu ataatsimiinnerinut peqataasarneq

∙Iliuusissatut pilersaarusiat piffissaq eqqorlugu malinnaaviginissaannut qulakkeerinninneq

∙Suliatigut naliliinissamut killiffimmillu allaaserinninnermut tapertaasarneq

Suliatigut pitsaassuseq uppernarsaasersuisarnerlu:

∙Katsorsaanermi pilersaarusiornernut, killiffik pillugu allaaserinninnernut, inaarutaasumillu nalunaarusiornernut aamma malinnaaviginninnernut suleqataaneq

∙Pitsaassutsimik piffissarlu eqqorlugu allattaavinnut nalunaarsuinernik malinnaaviginninnermilu immersuinissamik qulakkeerinninneq

∙Uppernarsaasiornermi amigaataasunik malinnaaviginninneq

∙Malinnaaviginninnerit suliatigut ilisimasaqarnermi atorsinnaasunngortillugit

Suliffeqarfiup iluani malinnaaviginninneq akisussaassuseqarnerlu:

∙Atornerluisoqaqqittoqartillugu malittarisassanilluunniit unioqqutitsisoqartillugu sulianik aallartitsinerit malinnaaviginninnerillu

∙Nalilersuinerit malitseqartitsinerillu pillugit suleqatigiit qanimut oqaloqatigalugit

∙Ilaqutariinnut ilitsersuisunik inuunerissaasumillu isumaginninnikkut suliatigut isumasioqatigiinneq

∙Katsorsaanernik tamakkiisumik isiginninnerit qanimullu malinnaaviginninnerit

Ilaqutariinnik tapersersuineq:

∙Allannguuteqarneq, akisussaassuseqarneq aamma piginnittuuneq qitiutillugit kajumissaarisumik ineriartornerlu siunnerfigalugu oqaloqatiginninnerit

∙Aningaasaqarneq, ilinniagaqarneq aammalu suliffeqarneq pillugit suliap ingerlanerani siunnersuineq

∙Ikaarsaarnerni tapersersuineq (iserternermi, aniartuaartitsinermi il.il.)

Sunniutaasunik uuttuineq ineriartornerlu:

∙Kisitsisit paasissutissallu attuumassuteqartut katersorlugit

∙Ukiumoortumik sunniutaasunik uuttuisoqartarnissaanik qulakkeerinninneq

∙Nalileeqataaneq, ukiumoortumik nalunaarusioqataaneq aamma pitsaassutsimik ineriartortitseqataaneq

Piareersaataasumik oqaloqatiginninneq, allatsitsineq naammassinninnerlu:

·Ataqatigiissaakkamik piareersaataasumik oqaloqatiginninnermi peqataaneq

·Suliniutip ilaqutariit pisariaqartitaannut tulluartuunera pillugu nalilersuineq

·Naammassinninneq ingerlatitseqqiinerlu ataqatigiissaarlugit

·Naammassinninnermi suliatigut uppernarsaasiortoqarnissaanik qulakkeerinninneq

Pisortap tullia / sinniisoq:

Pisortap tullersortaatut ulluinnarni aqutsisumut sinniisuussaatit aqutsinikkullu qanimut suleqateqassaatit makku tungaatigut:

∙Suliatigut naliliineq sulianillu pingaarnersiuineq

∙Isumannaallisaanermik aamma pisunik pinartunik isumaginninneq

∙Suliatigut malitassanik aaqqissuussinernillu attassineq

∙Katsorsaanermi ingerlatamik naleqqussaaneq pitsaassusaanillu qulakkeerinninneq

∙Suleqatinut tapersersuineq, siunersiueqatigiinneq aamma sinaakkusersuineq

∙Ineriartortitsinermi- allannguiniarnermilu peqataaneq

∙Suliffiup avatangiisaanut atugarissaarnermullu akisussaaqataaneq

∙Aqutsisup peqannginnerani aalajangiisinnaassuseqarneq

Pisoqarnerani pisariaqassappat sassarsinnaassaatit peqatigisaanillu qanimut tatiginartumillu aqutsinikkut suleqatiginnissinnaassaatit

Illumi ataatsimoorullugit suliassat:

Neqeroorutaavugut minnerusoq, matumanilu ataatsimut kivitseqatigiittarluta Tamanna isumaqarpoq illit aamma:

·Asiarnermi ilaqutariittullu sammisassani pilersaarutaasuni peqataasassaatit

·Ataatsimoorussamik suliaqarnermi ilaasassaatit

·Sulliviup toqqissisimanartuunissaanut, aaqqissuussaanissaanut ingerlalluartuunissaanullu akisussaaqataanermik tigusissaatit

·Suliatigut suliaqarnermilu ingerlatitsinermi ikiuutaassaatit

Naatsorsuutigaarput illit:

∙Isumaginninnermut Siunnersortitut ilinniarsimasuunissat

∙Ilaqutariit mikisunik meerartallit tapersersorneqarnissaminnik pisariaqartitsisut misilittagaqarfigigitit

∙Ilaqutariinnut katsorsaanermi misilittagaqarnissat imaluunniit soqutiginnilluartuunissat

∙Allattariarsornikkut misissueqqissaarinermullu piginnaasaqarluarnissat

∙Aqutsinikkut inerisimalluarnissat oqartussaassuseqarnissamillu piginnaasaqarnissat

∙Eqqissisimasumik ersarissumillu unammillernartuni aalajangiisinnaanissat aalajangiussimaannarsinnaanissallu

∙Aaqqissuussaaneq toqqissisimanissamut naatsorsuutigisassatut isigigit aamma aaqqissuussaasumik attaveqartumillu sulisinnaasutit

∙Katsorsaanermi pilersitsisarlutit eqaatsumillu sulisinnaasutit aamma ingerlatani nalorninartuni nutaanik aqqutissarsiorsinnaasutit

∙Nukissamik, tunniusimanermik suliatigullu alapernaannermik ilanngussaqassasutit

∙Atuuffinni suliatigut aqutsinikkullu akisussaaqataaninni inissisimasinnaasutit

∙Nukittuujussaatit, patajaallutit aammalu nukittuffitit killissatillu ilisimaarilluassavatit

Ukunani ilinniagaqaqqinnikuuguit iluaqutaassaaq:

·Nalaataqarsimanermit kingunerlutsitsineq pillugu ilisimasaqartumik suliaqarneq

·Attaveqarneq aammalu inoorlaat-/meeraaqqat ineriartornerat

·Ilaqutariinnik katsorsaaneq imaluunniit ataqatigiissaasumik suliaqarneq

Inuttut suliatigullu suleriuserput tulluaraat

Inuk pissarsiarerusutarput tassaavoq:

∙Inussiarnersoq, ilakkuminartoq ulluinnarnilu pissusissamisoortumik eqqissisimasumillu periuseqartoq

∙Tatiginnilersitsisartoq, ersarissuseq annaanagu

∙Ineriartorneq sivisusinnaaneranik aammalu allanngoriartornerup piartuaartarneranik paasinnissimasoq

∙Siunnerfigisaq annaanngikkaluarlugu naammagittarluni uteriillunilu sulisinnaasoq

∙Aaqqissuussaanermik inuppalaarnermillu oqimaaqatigiissaarisinnaasoq

Kusernermi suliap ingerlanera eqqumaffigalugu sulisarpugut. Nalunngilarput allanngoriartorneq qaqutikkut narlumuinnaq ingerlasartoq aammalu utersaartarneq akerliusoqartarneralu ineriartornermi suliaqarnerup ilagigaa. Taamaattumik katsorsaanermi siunnersortimik eqqissisimasinnaasumik suliami sinaakkutinik attassisinnaasumik ilutigalugulu ilaqutariinnik ataqqinnilluni akuersaarlunilu naapitsisinnaasumik pisariaqartitsivugut.

Neqeroorutigaavut:

·Isumaqarluartumik naleqartitsillunilu neqerooruteqarnermi pingaarutilittut atorfeqarneq

·Suliatigut sammiveqarnikkut ineriartornikkullu sunniuteqaqataaneq

·Aqutsinikkut qanimut suleqateqarneq

·Suleqatigiit tunniusimalluartut suliatigullu pikkorissut

·Suliatigut ineriartornissamik aammalu sakkortuumik misigisaqarsimasunut- ilaqutariinnullu katsorsaanermi ilinniaqqinnissamik periarfissaqarneq 

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit:

Immikkoortortami aqutsisoq Solveig Mølgaard, oqarasuaat +299 55 56 97 imaluunniit e-mail: solm@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 303-26-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: apriilip 10.-at, 2026