Mælkebøttecenterip najugaqatigiiffia Ilasiaq Nuummiittoq sulisussarsiorpoq

Najugaqatigiiffik Ilasiaq meeqqanut inuusuttunullu inuuniarnermikkut eqqugaaratarsinnaasunut arfineq-marlunnik inissaatilik piaartumik ataatsimik atorfinissinnaasumik sulisussarsiorpoq.

Mælkebøttecenteri paaqqinnittarfiuvoq imminut ingerlattoq, najugaqatigiiffiup Ilasiap saniatigut immikkoortortaqarpoq, Mælkebøttenip Meeqqanut Inuusuttunullu Illuutaa, najugaqatigiiffik Allu, najugaqatigiiffik Aili allaffeqarfillu. Inunnik sullissinitsinni siunertaavoq meeqqat inuusuttullu sumiginnarneqarsimasut atugaannik pitsanngorsaassalluta, taamallu sumiginnarneqarnerup qaavatigut sumiginnaaqqinnissaq pinaveersaarniarlugu.

Meeqqat nukittorserneqartarput taamaalillutik ulluinnarni inuunertik ingerlassinnaaniassammassuk aammalu peroriartorfimminni kingornussatik peqqinnanngitsut allanngortissinnaaniassammatigit. Mælkebøttecenterip najugaqatigiiffiani meeqqat allannguisinnaanissaannut peqataarusuppugut (Mælkebøttebørn), tassaapput meeqqat artornartumik peroriartorsimagaluarlutik kingornussaminnik peqqinnanngitsunik allannguisinnaasut – ilinnialerlutik, ilaqutartaarlutik ataqqinassusilimmillu inuuneqarlutik.

Periuseq

Ulluinnarni pamersaanikkut sulineq aaqqissuussaalluarpoq pamersaanikkullu sinaakkusiineq ersarilluni, paasinartuliorneq, siumut naatsorsoruminartuutitsineq, ersarissuliorneq, periusissanik takorluuisarneq uteqattaarinerillu tunngaviusumik ingerlatitsisuupput. Taakkununnga ilaatippagut atuagarsornernit pingaarnersiorlugit tigulaakkat, soorlu attaveqarnermut allanullu atalernissanut tunngasut aammalu avatangiisit aallaavigalugit katsorsaanernit (miljøterapi) tunngaviusut. Pamersaanermi siunertaavoq meeqqat ataasiakkaat sapinngisamik timikkut tarnikkullu nalerisimaarlutik inuunissaat, taamaalillutimmi namminerminni periarfissareriikkatik aallaavigalugit nalerisimaarlutillu ineriartorsinnaammata. Najugaqatigiiffimmi qallikkut atugassarititaasut tarnikkullu inissisimaffiit aaqqissuunneqartarput meeqqat isumassorneqarlutik “angerlarsimaffittullu” ittumiisinnissaat pingaartinneqartarluni, tassanilu meeqqat ataasiakkaat pisariaqartitaannut ineriartornissaminnullu periarfissaannut tulluarsaanerit neqeroorutigineqartarput.

Oqaatsit pingaartinneqartut tassaapput oqaloqatigiinneq, inuttut ataqqeqatigiinneq ajornartorsiutinillu qaangiisarnissaq. Tassani issapput inersimasut tatigineqarsinnaasut, inersimasut timikkut tarnikkullu qanilaartut aammalu oqaloqatigineqarnissaminnut, tusarnaarnissaminnut nuannaaqatigiinnissamullu piffissallit.

Naatsorsuutigut

Suleqataasup aqutsisoq suleqataasullu allat peqatigalugit najugaqatigiiffiup ulluinnarni ingerlanerani suliassat suleqataaffigissavai ataqatigiissaaqataaffigalugillu. Suleqataasup naatsorsuutigissavaa illumi aqutsisoq, illumi suleqataasut allat avataanilu suleqatigineqartartut suleqatigisassallugit.

Taakku saniatigut suleqataasup meeqqat inuusuttullu najugaqatigiiffimmiittut pitsaanerpaamik sammisaqartittarnissaat peqataaffigisassavaa aammalu toqqissisimanermik isumassuinermillu pilersitseqataasassalluni. Naatsorsuutigaarput tulluartumik atuagarsornikkut tunuliaquteqarnissat, meeqqanik inuusuttunillu sullissinermik misilittagaqarnissat, nutaaliorsinnaassuseqarnissat, ilumuussuseqarnissat tatiginartuunissallu, naatsorsuutigissavattaaq allanngorartumik sulisarnissat, aaqqiagiinngissutinik ajornartorsiutinillu qaangiiniartarnissat suliamullu tunniusimanissat. Neriutigaarput marlunnik, kalaallisut qallunaatullu, oqaaseqartuunissat, piumasaqaataanngilarli.

Neqeroorutigaagut avatangiisit nutaaliorfiusut sulinikkullu ineriartorfiusut peqataaffigissallutigit, taamaaliornikkummi sulinermi kulturimut sunneeqataasinnaagavit. Neqeroorutigaarput suliffik sulianut tunngatillugu unammillernartoq, Mælkebøttenimi najugaqatigiiffinnilu suleqatit suleqatigiikkuutaajunerusut peqatigalugit pissarsinartoq ineriartorfiusorlu. Taakku saniatigut sulianut tunngasut pillugit ataatsimooqatigiittarpugut qulequttallu ulluinnarnut attuumassutillit pillugit siunnersueriaaseqartarluta (supervision). Pisinnaasat malillugit aningaasarsiaqartitsisoqassaaq - immikkut isumaqatigiissuteqarnerit imaluunniit isumaqatigiissutit atuuttut naapertorlugit. Perorsaasunut NPK-mi isumaqatigiissutit atuutissapput. Atorfimmut atatillugu ini neqeroorutaasinnaavoq.

Atorfik pillugu annertunerusumik paasisaqarusukkuit Ilasiami aqutsisoq Henriette Pedersen saaffigisinnaavat, oqarasuaatikkut +299 362120-mut mobilimut +299 268188-mut imaluunniit mailikkut: henriette@mb.gl. Qinnuteqaat soraarummeersimanermullu uppernarsaatit assigisaallu kingusinnerpaamik 07.02.2026 uunga nassiunneqassapput: info@mb.gl. Ingerlaavartumik oqaloqatigiittarnerit pisassapput.