Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfik AC-fuldmægtigimik inuttassarsiorpoq

Meeqqanut inuusuttunullu pissutsinik pitsanngorsaanermik nuannarisaqarpit, naalakkersuinikkullu aalajangiisarneq qanimut suliaqarfiginissaa kissaatigaajuk? Taava pissanganartumik suliffissaqartippatsigit.

Meeqqanut, Inuusuttunut, Ilaqutariinnut Nunamullu Namminermut Naalakkersuisoqarfimmi Kalaallit Nunaanni isumaginninnermut tunngasut iluanni politikikkut anguniarneqartut piviusunngortinniarlugit suliaqartarpugut. Suliarisartakkavut assigiinngiiaarput AC-fuldmægtigitullu ilaatigut pilersaarutinik, periusissianik, suliniutinik misissueqqissaarnernillu ineriartortitsisassaatit ingerlatsillutillu, naalakkersuisoqarfiup akisussaaffeqarfiani suliassanik assigiinngisitaartunik isumaginnittassaatit. Taamatullu Naalakkersuisut isummernissaannut tunngavissianik suliaqarnikkut, ajornartorsiutit pineqartut pillugit allakkiornikkut §37-lu naapertorlugu apeqquteqaatit akinerisigut qinikkanik kiffartuussisassaatit.

Naalakkersuisoqarfik immikkoortortaqarfinnut marlunnut aaqqissuussaavoq: Aqutsisunut Allattoqarfik aamma Suliassaqarfiit Assigiinngitsut Akornanni Suliniutinut Malittarinninnermullu Immikkoortortaqarfik. Naalakkersuisoqarfimmi kikkulluunniit tamarmik aaqqissuussaanerup ineriartortinneqarneranut isumassarsianillu ilanngussaqartarsinnaanissaat ileqquliutissallugu anguniagaraarput. Taamaattumik illit inuttut suleqatigiissinnaanermik soqutiginnittuuguit, matumani suleqatinnik qiimallutit soqutiginnillutillu naapitsisinnaaguit iluaqutaassaqaaq. Akerlianik tunniusimasunik anguniagaqartunillu, imminnut tapersersorlutillu ataqqisunik suleqateqassaatit.

Naalakkersuisoqarfik aalajangiinissamut tunngavinnik pitsaasunik qulakkeerinneqataasussaavoq politikikkullu pingaarnersiuinerni anguniakkallu ingerlannissaannut suleqataasassalluni.

Illit suliffiit

Suliassaqarfiit Assigiinngitsut Akornanni Suliniutinut Malittarinninnermullu Immikkoortortaqarfimmut ilanngutissaatit, tassani sisamanik sulisoqarpoq assigiinngitsunik sulianik ilisimasalinnik. Immikkoortortaqarfik naalakkersuisoqarfiup akisussaaffeqarfigisaa tamakkerlugu sulisarpoq qitiusutullu inissisimasuulluni naalakkersuinikkut aalajangiussat suliniutit tigussaasunngortinneqarnissaannut inerneqarnissaannullu qulakkeerisussatut. Naalakkersuisut naalakkersuisoqarfiisa assigiinngitsut akornanni akulikitsumik suleqateqartarpugut Nunatsinnilu kommunit suleqatigalugit suliniuteqartarluta. Suliassat tamatigoortuupput immikkoortortaqarfiit assigiinngitsut kulturillu akornanni suliatigullu killigisat eqqarsaatigalugit suleqateqartarnissaq pisariaqarpoq kiisalu nammineq suliassaqarfigisami namminersortumik akisussaassuseqarluni sulisinnaassuseqartariaqarpoq.

Neqeroorutigaagut

• Suliffik pissanganartoq isumaqarluartorlu, politikikkut aaliangiisarnermut qanittoq.

• Kalaallit Nunaanni meeqqanut, inuusuttunut ilaqutariinnullu sunniuteqaqataasussanik suliniutinik katitigaasunik inuiaqatigiinnullu pingaaruteqartunik suliaqartarnissamut periarfissaqarneq.

• Suliffeqarfik pitsaasoq tunniusimasunik angusaqarluarusuttunillu sulisoqartoq, taakkua imminnut tapersersortut ataqqisullu.

• Suliassat akisussaaffiillu allanngorartut aqqutigalugit suliatigut inuttullu ineriartornissamut periarfissat pitsaasut.

• Sulinermi pissutsit allanngorarsinnaasut sulinermi namminerisamillu inuunermi oqimaaqatigiissitsineq qitiutillugu.

• Suliffik suleqatitsialannik sulisulik, suliffimmi atugarissaarnissaq qitiutinneqartoq inuppalaasuseqarnerlu

Suliassatit

• Immikkoortortaqarfiup akisussaaffigisaata iluani pilersaarutinik, periusissianik suliniutinillu assigiinngitsunik ineriartortitsineq ingerlatsinerlu.

• Naalakkersuinikkut aalajangiisarnernik pingaarnersiuinernillu tapersersuisunik misissueqqissaarinernik nalilersuinernillu suliaqarneq.

• Naalakkersuisut isummernissaannut tunngavissianik, §37 naapertorlugu apeqqummut akissutinik allakkianillu suliaqarnikkut qinikkanik kiffartuussineq.

• Suliniutinik ingerlasunik ataqatigiissaarineq malitseqartitsinerlu aamma politikikkut anguniakkanut tunngatillugu siuariartornermik qulakkeerinninneq.

• Malittarinninnermut nalunaaruteqartarnermullu sunniuteqarneq, taamaalilluni naalakkersuisoqarfik aalajangiinissamut tunngavissaqarluassammat.

• Suliniutini ataqatigiissaarinermik pitsaassutsimillu pilersitsinissaq pillugu suleqatit aamma avataaniit soqutigisaqartut qanimut suleqatigineri.

Illit pillutit

• Naleqquttumik kandidatitut qaffasissusilimmik ilinniagaqarsimanissat

• Isumaginninnermi suliassaqarfik pillugu atuagarsornikkut aamma misilittakkatigut ilisimasaqarnissaq kissaataavoq, piumasaqaataananili

• Suliniutinik suliassanillu suliaqarnernik misilittagaqarneq, suliniutinillu aqutsinermik aamma misilittagaqarsinnaavutit

• Nammineerlutit, aaqqissuussaasumik ineriartortitsinermillu tunngaveqartumik suliaqarsinnaassaatit

• Kisitsisinik paasissutissanillu paasisaqarluarsinnaasoq

• Allakkatigut oqaloqatiginninnikkullu attaveqallaqqissoq

• Paasissutissanik arlalinnik pisariusunillu takussutissanik pilersitsisinnaasoq

• Suleqatinik avataaniillu soqutigisaqartunik suleqateqarluarsinnaasoq

• Kalaallit inuiaqatigiivisa atugaannik kulturiannillu ilisimasaqaruit pitsaaqutaassaaq

• Marlunnik oqaaseqarneq, piumasaqaataanngilarli.

Qinnuteqarfissamut killigititaq

Qinnuteqarnissamut killigititaq tassaavoq ulloq 16.02.2026, nal 12:00.

Atorfinitsinneqarneq

1. April 2026

Una atorfik ilinnut soqutiginaateqarpat, qinnuteqaativit tigunissaanut qilanaarpugut!

Atorfik pillugu apeqqutissaqaruit, immikkoortortaqarfimmi pisortap Helena Lynge Møller mail-ianut helm@nanoq.gl imaluunniit oqarasuaataanut +299 …… attaveqarnissannut tikilluaqqusaavutit, eqqaamajuk Nunatta Danmarkillu akornanni nalunaaqutaq akunnernik pingasunik nikingassuteqarmat.

Qinnuteqartut piukkunnartut oqaloqatigineqarnissamut ingerlaavartumik aggersarneqartarput.

Ilinnit tusagaqarnissarput qilanaaraarput.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk