Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfik attaveqaqatigiinnermut piginnaasaqarluartumik AC-fuldmægtigissarsiorpoq

Naalakkersuisoqarfimmi aqutsisunik qullerpaanik Naalakkersuisumillu ulluinnarni sullissineq qaffasissoq qulakkeerniarlugit Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmi Aqutsisunut Allattoqarfik pikkorissumik pimoorussisumillu AC-fuldmægtigimik pissarsiorpoq.

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmi meeqqat, inuusuttut ilaqutariillu atugaannik pitsanngorsaanissaq qitiutipparput aamma suliassaqarfimmi naalakkersuinikkut suliallit anguniagaannik piviusunngortitsiniarluta sulisarluta. Suliassaqarfimmi suleqataarusukkuit, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmi AC-fuldmægtigitut atorfik ilinnut immaqa piukkunnarpoq.

Naalakkersuisoqarfimmi suliassat ilaatigut tassaapput meeqqanut, inuusuttunut ilaqutariinnullu suliassaqarfimmi periusissianik iliuusissatullu pilersaarutinik ineriartortitsinerit, naalakkersuinermik suliaqartunik allakkiornertut, nassuiaasiornertut il.il. ittunik sullissinerit kiisalu suliniutit ineriartortitsinernillu suliassat assigiinngitsut. Attaveqaqatigiinnermik sulisutut Naalakkersuisut Naalakkersuisoqarfiullu innuttaasunut, suleqatigisartakkanut tusagassiorfinnullu suliniutaat paasissutissiissutiginerini qitiusutut inissisimassaatit. 

Aqutsisunut Allattoqarfiup ataani atorfik inissisimavoq. Aqutsisunut Allattoqarfik suliffeqarfiuvoq kajuminnartoq aamma suliassaqarfimmik peqqissaarussisoq qaffasissunik anguniagaqarfiusoq. Aqutsisunut Allattoqarfimmi ulluinnaat allanngorartuupput suliassallu unammillernartarlutik, ilaanni pisut sukkasuumik pisarput aamma piffissaasualluni suliassat piffissamik tatisimaneqarluni naammassiniarneqartarlutik. Ullut tamarmik assigiinngiiaartuupput.

Aqutsisunut Allattoqarfik naalakkersuinermik sulialinnik sullissisarpoq, matumani aqutsisunut allattoqarfiup naalakkersuisoqarfimmi aqutsisunut qullersat allattoqarfittullu ingerlatsineq akisussaaffigineri ilanngullugit.

Atorfik pillugu

• Naalakkersuisut Naalakkersuisoqarfiullu suliniutaat suliaallu pillugit tusagassiorfitsigut nalunaarutissanik, nutaarsiassanik attaveqaqatigiittarnermilu atortussanik suliaqarneq 

• Suliffiup iluani avataanilu paasissutissanik pilersaarusiorlunilu ataqatigiissaarineq 

• Nittartakkatta imaanik nutarterineq ineriartortitsinerlu 

• Naalakkersuisut isummernissaannut tunngavissianik, allakkiat tunuliaqutaannik, § 37 naapertorlugu apeqqutit akissutaannik il.il. suliaqarnerit.

• Isumaginninnermut suliassaqarfimmi misissuinerni, nalilersuinerni assigisaannilu aqutsineq imaluunniit peqataanerit.

• Allakkianik, aalajangiiffigisassatut siunnersuutinik assigisaannillu pitsaassutsimik qulakkeerinneqataaneq.

• Danskit ministereqarfiannik suleqateqarnerup  ataqatigiissarneqarnera

• Suleqatigiinnik, isumasioqatigiissitsinnernik aamma pisortatigoortumik tikeraarnernik ataqatigiissaarisoq

• Immikkoortortaqarfiup sinnera suleqatigalugu Inatsisartut ataatsimiinnerini ataqatigiissaarinninnermik qulakkeerinninneq.

• Ataqatigiissumik aaqqissuussat attuumassuteqartut naalakkersuisoqarfimmi atorneqartut ataqatigiissaarneri.

• Naalakkersuisoqarfimmi atorfeqartunut sulisoqarnermik ingerlatsineq

• Suliassat takkussuuttut malillugit sullissineq

Suliassat tamatigoortuupput aamma suliassaqarfiit oqaatsillu assigiinngitsut ataatsimoorlutik suleqatigiinnermi ilaasinnaaneq, kiisalu nammineq suliassanut suliniutinullu namminersorluni akisussaaffeqarsinnaaneq piumasaqaataapput. Atorfik piumasaqaatitaqarpoq suliassanut nutaanut sukkasuumik paasinnissinnaanermik tamatigoortuunissamillu, kiisalu aaqqissuussaaffiusumi naammagisimaarinnissinnaaneq tassani suliassat minnerit angisuullu paarlakaaffianni ulluinnarni ilaatigut ulapaarfiusartumi.

Taamaattumik akisussaassusermik pingaartitsisuuguit, allanngortitsinermut piareeqqaguit suleqateqarusullutillu iluaqutaassaaq. Naalakkersuinikkut aaqqissugaanermik aqunneqartumik suliaqarnissamut soqutiginnittuussaatit, tassanilu ilaatigut assut ulapinnartarlunilu tunniussinissanut sivikitsunik piffissaliussaqartarput. Iluaqutaassaaq allattariarsornikkut oqalunnikkullu ingerlatitsillaqqissuuguit ataqatigiinnernillu paasiuminaatsunik paasiniaallaqqissuullutit.

Illit pillutit 

• Ilinniagartuutut naleqquttumik ilinniagaqarsimassaatit

• Isumaginninnermut suliassaqarfimmik misilittagalik

• Attaveqartarnermik, tamanut paasissutissiisarnermik, suliniummik aqutsinermik suliamillu ingerlatsinermik misilittagaqartoq ilisimasaqartorluunniit

• Namminersorluni, aaqqissuulluakkamik inerisaarusullunilu sulisinnaasoq

• Allattariarsornikkut oqaatsitigullu atassuteqallaqqissoq

• Paasissutissat amerlasuut paasiuminaatsullu tamaasa takusinnaagai

• Suleqatinik avataanillu soqutigisalinnik suleqateqallaqqissoq

• Inuiaqatigiinnut kalaallinut kulturiannullu ilisimasaqarluartoq

• Pitsaassutsimut annertussutsinullu tunngasunut periutsinut pitsaasumik piginnaaneqaruit iluaqutaassaaq

• Kalaallisut, danskisut tuluttullu oqalussinnaaguit iluaqutaassaaq.

Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoqarfimmi Aqutsisunut Allattoqarfik pillugu

Aqutsisunut Allattoqarfimmi immikkoortortaqarfipput arfinillit missaannik sulisoqarpoq, Naalakkersuisoqarfiup aqutsisuinik qullerpaanik tapersersuisoq naalakkersuisoqarfiullu immikkoortortaqarfiinut allanut qanimut suleqateqarluni sunniuteqarluartumik ingerlatsinermut tapersersuilluni. Immikkoortortaqarfiit assigiinngitsut ulluinnarni sullittarpagut nutsigassanik suliaqarneq ilaatigut isumagisarlutigu.

Qinnuteqarneq

Qinnuteqarnissamut ulloq killigititaq tassaavoq 18. august 2026 nal. 12.00 (Kalaallit Nunaata nalunaaqutaa malillugu)

Ulloq sulilerfissaq 1. oktober 2026 isumaqatigiissuteqarnikkulluunniit.

Paasissutissat amerlanerit

Atorfik imaluunniit naalakkersuisoqarfik pillugit paasisaqarnerujumaguit, immikkoortortami pisortamut Heidi Dalagerimut attaveqarnissamut tikilluaqqusaavutit, uunga hdlr@nanoq.gl imaluunniit oqarasuaammut +299 59 13 04.

Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.