Naalakkersuisut Siulittaasuata Naalakkersuisoqarfiani Politikkikkut Ataqatigiissaarinermut aamma Namminersorlutik Oqartussanit pigineqartuni piginnittuunermi AC-fuldmægtigissarsiorneq.

Politikikkut aalajangiisarnerit ingerlasarneri qanilluinnarlugit sulineq kajumigaajuk aamma suliat ingerlanerinut, ataqatigiissaarinermut suleqateqarnermullu piginnaaneqarluarpit? Naalakkersuisut Siulittaasuata Naalakkersuisoqarfia Naalakkersuinikkut Ingerlatsinermi Immikkoortortaqarfimmi ataatsimik imlt. arlalinnik AC-fuldmægtigissarsiorpoq imal. immikkut siunnersortissarsiorpoq ataqatigiissaarinermik, siuariartornissamut politikkikkullu suliassanut pingaaruteqarluinnartunik naammassinninnissamut kiisalu suliffeqarfinnik Namminersorlutik Oqartussanik pigineqartunit akisussaaffeqartussamut sullarissumik sulisussarsiorpoq.

Naalakkersuisut Siulittaasuata Naalakkersuisoqarfia

Naalakkersuisut Siulittaasuata Naalakkersuisoqarfia qitiusumik ataqatigiissaariffiuvoq ingerlasunullu aqutsisuulluni, Naalakkersuisunik aamma qitiusumik aallaffeqarfimmik suleqatiginninnermut tunngaviusoq sapinngisamik pitsaanerpaamik Naalakkersuisut Siulittaasuannut qulakkeerniarlugu. Naalakkersuisut Siulittaasuata Naalakkersuisoqarfia Aqutsisunut Allattoqarfimmi Inatsisilerinermi immikkoortortaqarfimmilu inissisimavoq. Naalakkersuinikkut ingerlatsinermut Immikkoortortaqarfik pilersinneqaqqammersoq Aqutsisunut Allattoqarfimmiissaaq. Naalakkersuisut Siulittaasuata Naalakkersuisoqarfiani immikkoortortaqarfiit marluk pioreersut ataatsimoortillugit imikkoortortaqarfinngortinneqalerput. Naalakkersuisut ataqatigiissaarneqarneranut Allaffik Siulersuisunullu Ingerlatseqatigiiffinnullu Allattoqarfik.

Atorfik pillugu

Ataqatigiissaarinerup, siuariartornerup aamma politikikkut suliat pingaartinneqartut naammassineqarnissaasa qulakkeerneqarnissaat allallu suliniutit anginerusut ingerlatsinerillu politikimut atasut, aaqqissuussaaneq akimorlugu ingerlanneqartut Naalakkersuinikkut Ingerlatsinermi Immikkoortortaqarfiup annertuumik ukkatarai. Immikkoortortaqarfiup Naalakkersuisut Namminersorlutik Oqartussat ingerlatseqatigiiffiutaanik piginnittuunermik isumaginninnerat qulakkiissavaa. Tamatuma saniatigut suliassaqarfiit akimorlugit politikikkut ineriartornernut allaffik ilapittuuteqassaaq.

Naalakkersuinikkut Ingerlatsinermi Immikkoortortaqarfimmi AC-fuldmægtigitut/immikkut siunnersortitut Naalakkersuisut suliaanik eqeersimaartumik pilersaarusiornikkullu tamakkiisumik isiginninneq pilersissallugu allanngutsaaliussallugulu, ilaatigut Naalakkersuisut sinnerlugit piginnittutut ulluinnarni isumaginnittutut akisussaaffeqarnikkut tapersussavatit.

Suliassatit ilaatigut makkuussapput:

• Naalakkersuisut suliassaqarfitsik akimorlugit suleqatigiinnerini ataqatigiissaarinissamut suliaqarneq, matumani Ataqatigiissaarinermut ataatsimiititaliat aamma ataqatigiissaarinermi suleqatigiit Allattoqarfiani.
• Naalakkersuisoqarfiit allat avitseqatiginerisigut Naalakkersuisut politikkikkut anguniagassaannik naammassinninnissaannik tapersernissaat, matumani Naalakkersuisooqatigiinnissamik isumaqatigiissut.
• Politikkikkut isumaqatigiissusiornermi suliaqarnermi ikiortaaneq.
• Tusarniaanermut akissutissamut missingersuusiorneq.
• Namminersorlutik Oqartussat piginneqataaffii pillugit misissueqqissaarnernik, ilisimatitsisutinik, saqqummiussassanik nalunaarutinik il.il. suliaqarnerit.
• Namminersorlutik Oqartussat ingerlatseqatigiiffiisa aqutsinermut allagaatissaanik atuutsitsilernissaq ataavartumillu nutarteriuarnissaq.
• Naalakkersuisut suliffeqarfiutigineqartullu akornanni oqallinnerit, isumasioqatigiinnerit ataatsimiinnerillu ataqatigiissaarnissaat.

Illit suleqativillu suliassaat soqutigisasi, suliassatigut piginnaasasi misilittakkasilu aallaavigalugit tulluarsarneqassapput.

Immikkoortortaqarfeeqqami Naalakkersuisut Siulittaasuata Naalakkersuisoqarfiani sulisunik aammalu Qitiusumi Allaffeqarfimmi Naalakkersuisoqarfiit akimorlugit suleqateqartassaatit.

Ilinnut tunngasut

Politikkikkut paasinnittaaseqartutit, Naalakkersuinikkullu politikikkut oqaluuserisassanut sammivinnit assigiinngitsunit isiginnissinnaasuteqarnerit atorlugu Naalakkersuisut suliaanik anguniagaanillu tapersersorsinnaagitit.

Aalajangersimasumik naatsorsuutigaatsigit:

• Inuiaqatigiilerinermi, aningaasaqarnermi imaluunniit inatsisilerinermi qaffasissumik ilinniarnertuujusutit (soorlu cand.scient.pol., cand.scient.adm., cand.scient.soc., cand.scient.oecon., cand.polit., cand.merc. cand.jur., imal. assingusuni).
• Suliffeqarfimmik politikikkut aqunneqartumik misilittagaqarluartutit
• Naalakkersuisoqarfiit qitiusumik allaffeqarfiannut ilisimasaqarluartutit
• Misissueqqissaarinissamut piginnaasaqarluartuusutit suliallu ingerlanerannik paasinnissinnaalluartuusutit
• Oqaasertalersuisinnaassuseqarluartuusutit, tamatumunnga politikkikkut attaveqaqatigiittarnermut ilisimaarinnilluartoq
• Suliamut tunngasunut ukkassilluartuussasutit ataatsimoortumik sulinermut tatiginnittoq qaffasissumillu angusaqarluarniartoq
• Suleqataallaqqissuusutit, kingunissaqarluartumillu suleqateqateqarnissamik attaveqarnissamillu ujartuisoq.

Kalaallini inuiaqatigiinni pissutsinik ilisimasaqarluarnissat paasisimasaqarnissallu naatsorsuutigaarput. Kalaallisut qallunaatullu oqaaseqaruit iluaqutaassaqaaq.

Akissarsiat atorfinitsitaanermilu atugassarititaasut

Akissarsianut atorfeqartitaanermullu atugassarititaasut, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Inissaqarneq

Atorfimmut atatillugu sulisutut ineqarnissamut innersuussinertaqanngilaq. Qinnuteqartoq Namminersorlutik Oqartussani atorfeqarnini aqqutigalugu sulisutut ineqareeruni sulisutut inissiamik innersuussivigineqarnissamut pisinnaatitaaffik attatiinnarneqassaaq. Sulisutut inigisaq atorfeqarnermut tunngasuuvoq, atorfeqarunnaarnermilu qimanneqartussaassalluni.

Paasissutissat allat

Atorfik pillugu apeqqutissaqaruit Christian Friis oqarasuaammut 34 51 66 imaluunniit mailikkut CFRI@nanoq.gl imaluunniit Pisortaq Simigaq Broberg oqarasuaammut 34 51 44 imaluunniit mailikkut SBRO@nanoq.gl attaveqarfigisinnaavat

Qinnuteqarneq 

Qinnuteqaatinni imminut ilisaritinnerit aamma soraarummeersimanermullu uppernarsaatit attuumassutillit kakkiunneqassapput. Qinnuteqarnissamut killigititaq tassaavoq ulloq 23. september 2025 nal 12.00.

Atorfininnissat isumaqatigiissutigisinnaavarput periarfissaappallu ingerlaannaq atorfinissinnaavutit.

Oqaloqatigiinnerit sapaatip akunnerini 39 aamma 40 ingerlanneqarnissaat naatsorsuutigineqarput.

Qinnuteqqat, imminut ilisaritinneq, ilinniarsimanerrmut aamma pikkorissarsimanermut uppernarsaatit aamma papiaqqat attuumassutillit “Qinnuteqaat nassiugik” toorlugu nassiutikkit.

e-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk