Namminersorlutik Oqartussat, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup Piniarnermut Aallaaniarnermullu Immikkoortortaqarfia AC-fuldmægtigissarsiorpoq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi Piniarnermut Aallaaniarnermullu Immikkoortortaqarfimmi AC-fuldmægtigi, pisuussutit uumassussillit pillugit ingerlatsinermik soqutigisalik ujartorneqarpoq.

Ulloq atorfiniffissaq: 1. oktober 2025-mi imaluunniit isumaqatigiissuteqarnikkut piaartumik.

Issittumi nunami imarmilu miluumasut timmissallu pillugit aqutsineq soqutigisaraajuk? Aamma ilaatigut piniakkat killilersukkat killilersugaanngitsullu? Pisuussutinik uumassusilinnik aqutsineq asseqanngitsoq, aammalu Kalaallit Nunaanni imminut pilersornissamut pingaaruteqarluinnartoq. Nunami immamilu miluumasut kiisalu timmissat pillugit ingerlatsinermi eqqarsaatigisassarpassuit oqimaaqatigiissaarneqartussaapput, taamaattumillu ingerlatsinermi atuinerup, nungukkiartuutaanngitsumik ineriartortitsinerup ilisimasanillu katersuinerup akornanni oqimaaqatigiissaarinissaq ataqatigiissaarinissarlu qulakkeerneqassapput.

Suliassat

AC-fuldmægtig Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi Piniarnermut Aallaaniarnermullu Immikkoortortaqarfimmi suleqataaneq. Piniakkanik killilersukkanik killilersugaanngitsunillu akisussaasuuneq, annerusumillu qilalukkanik qaqortanik qernertanillu piniarnerup aqunneqarneri, tamatumalu ilaatigut nassatarissavaa:

Kommunit attuumassuteqartut immikkoortortamilu suleqatit allat qanittumik suleqatigalugit piniakkat killilersukkat killilersugaanngitsullu pillugit aqutsinermik ineriartortitsineq ingerlatsinissamullu pilersaarummik isumaginninneq, taakkununngalu ingerlatsinermi suliniutit siumut ingerlanissaannik qulakkeerisarneq, ukiumoortumik naliliisarneq aammalu ukiuni tulliuttuni aallutassanik tulleriiaarisarneq aallartitsisarnerlu ilaatinneqarput.

Piniakkat killilersukkat killilersugaanngitsullu pillugit illersuinermut piniarnermullu nalunaarutit pioreersut pilersitassallu inaarsarlugit nutarsarlugillu suliaqartarneq.

Piniakkat killilersukkat killilersugaanngitsullu pillugit suliat saniatigut suliassanut politikkikkut oqallisigineqartut koalitionip isumaqatigiissutaata imarisai apeqqutaassapput, aammalu ingerlatsinermi ineriartortitsinermilu suliassani assigiinngitsorpassuarnut tunngasuussallutik:

Suliassat, killilersukkanik killilersugaanngitsunillu aqutsinermut ineriartortitsinermullu attuumassutillit, ilaatigut qaammarsaanerit, annertunerusumik pitsaanerusumillu pisaasimasunik atorluaanissaq:

• Ineriartortitsinermi sulianut attuumassutilinnut akisussaaneq aqutsinerlu, taassuma ataani piniarnermut atatillugu suliniutit ataqatigiissarnissaat.

• Aalajangiinissamut tunngavissianik, innersuussutinik allagaqaatinillu suliaqarneq.

• Politikkikkut tulleriiaarinerit anguniagaasalu suliarineqarnerini suleqataaneq.

• Immikkoortortaqarfiup oqartussaaffiisa iluini tusarniaanernut akissuteqartarneq.

• Piniarneq aallaaniarnerlu pillugu inatsit ataatsimut isigalugu ingerlatsineq, taakkununngalu nalunaarusiornerit ilaallutik.

• Immikkoortortaqarfimmiit suliat, naalakkersuisoqarfimmi pisortaanermut Naalakkersuisumullu saqqummiunneqartussat pitsaassusiinik qulakkeerisarnermut suleqataaneq.

Atorfik assigiinngitsorpassuarnik sammivilik matumani pineqarpoq, tassanilu immikkoortortaqarfimmi ikioqatigiittarpugut. Killiliussat sukannersut aallaavigalugit sulisarnissaq naatsorsuutigisariaqarpoq, taamaattumillu sulianik paasisimaarinnilluarsinnaassuseqarneq aammalu suliassat ingerlaavartumik tulleriiaarneqartassapput.

Piginnaaneqarfiit

Pisuussutinik uumassusilinnik ingerlatsineq nuannarissavat, namminersorsinnaallutit eqaatsumillu aaqqiisinnaallutit, nutaanik ilikkagaqarnissamut, ataqatigiissitsinissamut sulianillu paasisimaarinninnissamut piginnaaneqarluarlutit. Eqqissisimasuuvutit, unammiligassaqarlutit kajumilertarputit, pisussaaffinnik naammassinnittarputit, tatiginartuuvutit isumalluartuullutillu. Siulliusarnissat aammalu sulianik naammassinnivissinnaanernik ataqqinaateqarnissat, pisortanullu pitsaanerpaatut tapersersuisinnaanissat pingaaruteqarpoq. Allakkat pitsaassusiinik qulakkeerisarneq aammalu ilaatigut kommunimut attaveqarneq suliassani pingaarutilinnut ilaammata, ileqqorissaarnissat, kiffartuussinissamik pingaartitsinissat aammalu oqaatsinik atuisinnaanermut attaveqaqateqarsinnaanermullu piginnaaneqarnissat pingaaruteqarpoq.

Tamatuma saniatigut naatsorsuutigaarput:

• Akademiskimik ilinniagartutut ingerlaqqiffiusumik ilinniagaqarsimassasutit

• Qarasaasiakkut paasissutissanik pikkoriffeqarlutit

• Politikkikkut aalajangiisarnerni suliat ingerlasarnerinik paasisimasaqarsinnaasutit misilittagaqassasutillu, ajornanngippat atorfimmit assingusumit imaluunniit kandidatinngorniarnermi suliamik suliaqarsimaneq,

• Allakkianik, isummernissamut tunngavissianik assigisaannillu – amerlanertigut piffissap sivikitsup iluani – allannissamik nuannarisaqassasutit

• Oqaasiliullaqqissuseqassasutit allassinnaassuseqarluassasutillu

• Oqaatsitigut piginnaaneqarluassasutit – ajornanngippat kalaallisut, danskisut tuluttullu

• Namminersorlutit sulisinnaassasutit nammineerlutillu suliniuteqarsinnaassasutit

• Suliassanik aaqqiinissamut akisussaaffimmik misigisimaninnik sakkortuumik takutitsisinnaassasutit

• Ulluinnaat ulapaarfiusut, taarseraattunik sammisaqarfiusut suliassaqarfiusullu nuannarissagitit

• Aaqqissuussamik sulisassasutit aammalu killiliussat malinnissaannut qulakkeerinissamut piginnaaneqarluassasutit

• Angusaqarnissamut piginnaaneqarluassasutit.

• Isumalluartuussasutit isumagissaartuussasutillu

• Inuit assigiinngitsorpassuit assigiinngitsunillu suliallit suleqatigisinnaassagitit

• Suliffeqarfimmi arlalinnik kultureqarfiusumi sulinissamut paasisimaarinnittuussasutit

• Inuiaqatigiinnik kalaallinik kulturiannillu ilisimasaqarluassasutit.

Kikkuuvugut?

Naalakkersuisoqarfimmi sulisut 45-t missaanniipput, immikkoortortaqarfinnut arfilinnut agguarsimasut: Aningaasaqarnermut Sulisoqarnermut, Nunalerinermut Imminullu Pilersornermut Immikkoortortaqarfik, Aalisarnermut ESU-mullu Immikkoortortaqarfik, Piniarnermut Aallaaniarnermullu Immikkoortortaqarfik, Inatsiseqarnermut Aningaasaqarnermullu Pilersaarusiornermut Immikkoortortaqarfik. Naalakkersuisoqarfiup ataaniipportaaq Uumasuuteqarnermut Inuussutissalerinermullu Oqartussaaffimmut Immikkoortortaqarfik (UMIO). Kiisalu Kalaallit Nunaanni Aalisarnermut Piniarnermullu Nakkutilliisoqarfik (KANUAPNA) Naalakkersuisoqarfiup ataani immikkut inissisimasoq, sinerissami nunap immikkoortuini allaffeqarluni.

Suliffeqarfimmi nuannersunik suleqateqarfiusumi, pingaartorsiorfiunngitsunik pissuseqarfiusumi aammalu toqqissisimanissamik ineriartortitsinissamillu pingaartitsiviusumi suleqataalissaatit. Ulluinnarni Naalakkersuisoqarfimmi naleqartitatut tunngavissat ataatsimoorussat aallaavigalugit sulivugut, taakkununngalu tunngaviupput:

• Sullissilluarneq

• Suleqatigiinneq

• Ilakkuminartuuneq kiffartuussinissamillu pingaartitsineq

• Sulianik pingaartitsineq.

Annertunerusunik paasisaqarusuppit?

Saqqummiussaq pillugu paasissutissanik annertunerunik pissarsisoqarsinnaavoq immikkoortortaqarfimmi pisortaq Amalie A. Jessen, oqarasuaat +299 34 53 04-mut, e-mail: amalie@nanoq.gl saaffigalugu.

Qinnuteqaat oqaloqatiginninnissallu

Qinnuteqaat, CV, ilinniakkanut pikkorissarnernullu uppernarsaatit, kiisalu allagaatit attuumassutillit “Qinnuteqaat nassiuguk” toorlugu nassiunneqassapput. E-mail-ikkut qinnuteqaatinik tigusineq ajorpugut.

Qinnuteqarnissamut killigititaq: 19. september 2025.

Atorfinitsitsinissamut atatillugu ingerlaavartumik oqaloqatiginnittoqartassaaq.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk