Nutserisutut aqutsisussarsiorpugut suliatigullu nutserisunut aqutsisinnaasoq

Aqutsisoorusuppit taava Peqqissutsimut inunnullu Innarluutilinnut Naalakkersuisoqarfimmi, peqqissutsimut - aamma inunnut innarluutilinnut susassaqarfiup iluani nutserinermik, ataqatigiissaarinermik aqutsinermillu suliassaqarfik takorloorsinnaaviuk? Taamaappat pissanganartumik periarfissaqartippatsigit.

Nutserinermik kiffartuusseqatigiinnut aqutsisussarsiorpugut. Aqutsisutut piukkunnaateqarninni aamma naalakkersuinikkut kiffartuussinermik misilittakkannik suleqatigiinnut nutaanut ineriartortunut siuttuussaatit, suleqatigiinnik ineriartortitsisussatut aamma ajornartorsiutinut immikkuullarissunut takkussinnaasunut aaqqiissuteqaqataasussatut.

Aaqqissuussilluarneq ataatsimullu takunnissinnaaneq pikkoriffigaagit aamma Peqqissutsimut inunnullu Innarluutilinnut Naalakkersuisoqarfimmi Aqutsisunut Allattoqarfimmi suleqatigiinnut ilanngukkusuppit? Taamaappat taannaavutit nutserisunut/ oqalutsinullu aqutsisussaq ujagarput, aqutsisunut allattoqarfitsinnut anguniagartuumik saaffigiuminartumillu suleqatissarsiorpugut. Aqutsisunut allattoqarfik kiisalu Naalakkersuisoqarfimmi immikkoortortaqarfiit sinneri sullissinnaasariaqarpatit. Suleqatigiinnitsinni ileqqoqarpugut kikkut tamarmik aaqqissuussaanermut nutaanik eqqarsaatinik suliassanillu naammassinnittarnermut ilanngussisinnaatillugit. Ammasuuguit suleqatikkuminartuutillu, imaalluarsinnaavoq suleqatigileritsigut.

Nutserisoqatigiinnut aqutsisunngussaatit, massakkut oqaatsitigut siunnersortimik ataatsimik sulisoqarpoq kiisalu atorfik ataaseq inuttaqanngitsoq. Aqutsisunut allattoqarfimmi pisortaq qullersarissavat. Inissisimaffissat oqaatsitigut siunnersortit sulianik aqutsinermik nassataqarpoq, allattoqarfimmilu pisortap sulisunut akisussaaffeqarneq, immikkoortortaqarfimmullu aqutsineq akisussaaffigivai. Taassuma saniatigut immikkoortortaqarfimmi allaffissornikkut suliassanik takkussuuttunik kiisalu politikkikkut suliassanik suliaqarnermi ataqatigiissaarinernut tapersersuisassaatit.

Nutserisutut/oqalutsitut aqutsisutut ilaatigut uku akisussaaffigissavatit:

• Suleriutsit aaqqissuussaanerillu iluanni suleqatigiinnut sammiviliineq, taamaalilluni sulisunut paasinartunngortillugit.

• Sulisuit suliassanik suliarinninnerannik tapersersuineq aamma sulianut tunngasunut piginnaasanillu ineriartortitsinermut ikiuineq.

• Allaffissornikkut suleriutsinik atulersitsineq aamma aqutsineq.

• Sulisut ulluinnarni atugarissaarnerannik suliffimmillu nuannarinninnerannik tapersersuineq.

• Aqutsisunut allattoqarfimmut ikorfartuinikkut ataqatigiissaarineq.

• Nutsigassanik suliakkiisarnerup aammalu avataaniit suleqateqarnerup qulakkeernissaa. 

• Suliniutinut siuarsaaqataasassaatit

• Immikkoortortaqarfiup iluani aamma peqqissutsimut innarluutilinnullu susassaqarfimmi suliassanik takkussuuttunik suliaqarneq.

Sulianut tunngasutigut piginnaasat :

• Oqalutsitut/nutserisutut imaluunniit allamik naleqquttumik ilinniagaqarsimavutit

• Nutserinermik ukiuni arlalinni sullissisimaneq iluaqutaassaaq.

• Atorfimmit imaluunniit suliffeqarfimmit assingusumit misilittagaqarnerit iluaqutaassaaq.

• MS Office-nik atuinissamut tunngaviusumillu aaqqissuusaanermut paasinnissinnaassuseqarneq. TMS-imik misilittagaqarneq iluaqutaassaaq.

• Kalaallisut, danskisut tuluttullu oqaatsinik piginnaasaqarneq, tuluttoorsinnaanerli piumasaqaataanngilaq.

Allaffissornikkut suliassat allat:

• Aqutsisunut allattoqarfimmi allagaatit toqqornerinut nalunaarsornerinullu ikorfartuineq.

• Sulilersunik suliunnaartunillu ikorfartuinermik akisussaasoq.

• Susassaqarfiit akimorlugit Aqutsisunut allattoqarfiup immikkoortortaqarfimmi sullissisunik allanik suleqateqarneranut ataqatigiissaarisuuneq.

• Allaffissornikkut suliassat eqqarsaatigalugit allaffissornermi pisortamut ikorfartuineq.

Inuttut pisinnaasatit

Nutserisunut/ oqalutsinut aqutsisumik suliamut tunngatillugu soqutiginnittumik, suleqatigiinnut suleqatigiilluinnartunut ilanngunnissamut piumassuseqarlunilu piginnaaneqarluartoq, ineriartortitsinermik qaffasissumik pingaartitsisumi ujarlerpugut. Peqatigitillugu pissarsiariniarparput suliamut tunngatillugu isumannaatsumik sulinissaminut tulluusimaarutiginnittoq aaqqissuussamillu suliassaminnut pulasinnaasut. Allaffissornermiit ingerlatsinermut naalakkersuinikkullu kiffartuussisarnernik ineriartortitsisunik suliassat siammasissut.

Kissaatigaarput, illit:

• Bacheloritut qaffasissusilimmik attuumassutilimmik ilinniagaqartutit.

• Atorfimmut tassunga assingusumit imaluunniit Namminersorlutik Oqartussani atorfimmit misilittagaqassasutit.

• Aningaasaqarnermik naatsorsueqqissaarnermilu suliaqartarnermik ilisimasaqartutit.

• Ataatsimut isiginnittariaatsimik pitsaasumik piginnaasaqartutit ulapaarfimmilu sulisinnaalluartutit.

• Kalaallit Nunaanni inuiaqatigiinnut kulturimullu ilisimasaqartuusutit, marlunnillu kalaallisut danskisullu oqaaseqartuullutit. 

• Tamakkiisumik isiginnillaqqissuuvutit sulianillu ilungersunartunik tamanillu takunnissinnaassuseqarlutit.

Sukumiinerusumik paasisaqarusuppit?

Atorfik pillugu paasissutissat sukumiinerusut allaffeqarfimmi pisortamut Lars Jørgen Petersenimut saaffiginnilluni pissarsiarineqarsinnaapput, oqarasuaat +299 34 54 49, e-mail: ljp@nanoq.gl

Qinnuteqarfissamut killerititaq

Qinnuteqaat CV ilanngullugu, ilinniarsimanermut uppernarsaatit assilinerat kiisalu attavigineqarsinnaasut/ allattorsimaffik qinnuteqaammut ilanngullugit innersuussissut ataaniittoq link aqqutigalugu kingusinnerpaamik ulloq 30. septemberi 2025 nassiunneqassapput. 

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk