Nuummi Meeqqanut Ilaqutariinnullu Immikkoortortaqarfimmi Ungecenterimut aqutsisoq

Nuummi Meeqqanut Ilaqutariinnullu Immikkoortortaqarfik aqutsisumik ujartuivoq Ungecenterimut

Kommuneqarfik Sermersooq ujartuivoq aqutsisumik pikkorissumik, periusissianik takunnissinnaasumik aammalu tunniusimasumik Ungecenterimut, atorfinittussamik 1. april 2026 imaluunniit isumaqatigiissuteqarnikkut.

Ungecenter meeqqanut inuusuttunullu ataatsimut isiginnilluni sullissivoq, pisariaqartitsisunut tapersersorneqarnissamut, katsorsaanermut, siunnersuinermut aammalu attaveqaqatigiinnermik pilersitsinermut. Sullissineq ingerlanneqartarpoq meeqqanut inuusuttunullu innersuunneqarsimasunut kiisalu meeqqanut inuusuttunullu innersuunneqarsimanngitsunut, kisianni inersimasumik attaveqarnissamut, aaqqissuussinermut aammalu pitsaasunik ataatsimoorfiit ineriartortinneqarnissaanut pisariaqartitsisunut.

Ungecenteret immikkoortortaqarfiit tallimat imaattut ilaqarput:

1. Opsøgende Ungerådgivere – meeqqanut inuusuttunullu 6–17-nik ukiulinnut attaveqaqatigiinneq ineriartortitsinerlu.

2. Efterværns Ungerådgivere – inuusuttunut 18–23-nik ukiulinnut nammineerlutik inersimasutut inuuneqarnissaminnut ikaarsaarnermi tapersersorneq.

3. Værestedet – meeqqanut inuusuttunullu 10–17-nik ukiulinnut toqqissisimanartumik neqeroorut.

4. Tryghedspatruljen – unnukkut unnuakkullu pinaveersaartitsilluni sulineq.

5. Mentorordningen – ataasiakkaanut tapersersuinermik attaveqaqatigiinnermillu suliaqarneq, ineriartortitsinermik atugarissaarnermillu immikkut ukkataqarneq.

Atorfimmi suliassat:

Immikkoortortaqarfimmi aqutsisutut Ungecenterimi immikkoortortaqarfiit tallimat aqunnissaat akisussaaffigissavatit, sulisut katillugit 37-it missaanniittut.

Fagchefi malissavat aammalu Meeqqanut Ilaqutariinnullu immikkoortortaqarfimmi aqutsisut ataatsimoorfianni ilaassaatit.

Suliassat pingaarnerit:

·Tamakkiisumik fagligimik sulisunillu aqutsineq

·Sulineq inatsisini atuuttuni kiisalu Inatsisartut meeqqanut tapersersuinermut inatsisaani naapertuutillugu ingerlanneqarnissaa qulakkeerniarlugu

·Inuusuttut pillugit suliassaqarfimmi periusissianik ineriartortitsineq atuutilersitsinerlu

·Missingersuutit akisussaaffiginerat, aningaasaqarnermik aqutsineq kiisalu ingerlaavartumik malinnaaneq

·Suleriaatsit allattugaatitillu pitsaassutsimik qulakkeernissaai.

·Sulisunik atorfinitsitsineq HR-imik fagchefimillu suleqateqarluni

·MUS/LUS-samtaler ingerlanneqarnissaat

·Piginnaasanik ineriartortitsineq faglimillu siunnersueqatigiittarneq

·Aqutsisut ataatsimiinnerinut kiisalu suleqatigiinnermut ataatsimiititalianut peqataaneq

·Politiit, isumaginnittoqarfik, atuarfiit suleqatiginissaai, kiisalu allanik tulluartunik suleqatigisaqarneq

·Task force-nut ineriartortitsinermilu suleqatigiinnut peqataaneq

·Ajutoortoqarnerani imaluunniit sakkortuumik pisoqariasaarnermi aqutsineq

·Ajutoortoqarnerani suliniutinik ataqatigiissaarineq

·Vagttelefon 24/7 ukioq kaajallallugu

·Suliassat allat pisariaqartinneqartut

Immikkoortortaqarfiit tallimat akornanni ingerlatsineq, ineriartortitsineq kiisalu ataatsimoorussineq tamakkerlugu akisussaaffigissavat.

Naatsorsuutigaarput illit:

·Ilinniagaqarsimasutit perorsaasutut, isumaginninnermi siunnersortitut imaluunniit socialfagligimik tunuliaqutaqartutut

·Isumaginninnermi suliassaqarfimmi misilittagaqarluartutit – immikkut meeqqanut inuusuttunullu tunngatillugu

·Aqutsisutut misilittagaqarsimasutit (assersuutigalugu aqutsisoq, teamleder imaluunniit fagkoordinator)

·Aningaasaqarnermik aqutsinermut ineriartortitsinermullu misilittagaqartutit

·Periusissatigut aammalu ingerlatsinikkut sulisinnaasutit

∙Marlunnik kalaallisut qallunaatullu oqaaseqartuuguit iluaqutaassaaq, piuasaqaataanngilarli

Taakku saniatigut pingaartipparput:

·Nakasimanngitsumik aalajangiisinnaassuseqartutit

·Oqaloqatigiinnermut tunngavilimmik aammalu akuersaarluni aqutsinermik ingerlatsisoq

·Ineriartortitsinermut sammisoq aammalu anguniagassanik ersarissunik pilersitsisinnaasoq

·Suleqatigiinnermut piginnaasaqarluartoq

·Suliffeqarfimmi allanngoriartuaartumi sulisinnaasoq

·Aaqqissuussineq ersarissuserlu pilersissinnaasoq

Neqeroorutigaarput:

·Aqutsisutut suliffik akisussaaffeqarluartoq isumalimmik, suliffeqarfimmi ineriartortumi

·Nuummi inuusuttunut suliniutinik sunniuteqarluartumik ineriartortitsinissamut periarfissaq

·Aqutsisut akornanni qanittumik sparring

·Suleqatigiinnermut fagit akimorlugit nukittuumik avatangiiseqarneq

·Ilinniagaqarnermik ingerlaqqinnermut periarfissaq

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit:

Fagchefi Maliina Junge Jørgensen, oqarasuaat +299 36 80 53 imaluunniit e-mail: mjuj@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 193-26-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: marsip 16.-at, 2026