Oqaasileriffimmi nunat aqqinik suliaqarnermi paarlatsitut atorfik

Oqaasileriffik nunat aqqinik suliaqarfimmi paarlatsissarsiorpoq. Atorfik killiligaavoq piaartumillu inuttassarsiuunneqarluni. Paarlattaasussaq fuldmægtigitut, siunnersortitut AC-fuldmægtigitulluunniit – piginnaasat misilittakkallu apeqqutaallutik – atorfinitsinneqassaaq paarlattaassallunilu juulip 31-at 2026 tikillugu.

Atorfik pillugu

• Paarlatsitut atorfiuvoq juulip 31-at 2026-mut killiligaq

• Atorfiup inissisimaffia: Nuummi Oqaasileriffimmi

• Fuldmægtigitut, siunnersortitut AC-fuldmægtigitulluunniit atorfinittoqassaaq – piginnaasat apeqqutaallutik

• Sapaatip akunneranut akunnerit 40-t suliffiussapput

Suliassat

• Oqaasileriffimmi katersat toqqortaatillu nunat aqqinut tunngasut digitalinngortinneqarnissaat pillugu suliaqarneq

• Kalaallit Nunaanni nunat aqqinik katersuineq

• Nunat aqqinik katersaasivimmut nalunaarsuineq, katersaasivimmik aaqqissuussineq nutarterinerlu

• Nunat Aqqinik Aalajangiisartut suliassaqarfiinut tunngasunik sullissineq sullissinermullu atatillugu nunat aqqisa allattorsimaffii assigiinngitsut misissuiffigissallugit, suliaqarfigissallugit ineriartortissallugillu

• Nunat aqqinik katersuinermut atuuttussanngortitsinissamullu atatillugu kommuninik, pisortaqarfinnik innuttaasunillu suleqateqarneq

• Oqaasileriffimmut saaffiginnissutit nunat aqqinut tunngasut pillugit akissusiortarneq

• Kalaallit Nunaanni nunat aqqi pillugit ilisimasanik paasissutissiisarneq tamanullu saqqummiussisarneq

Piginnaasassat

• Suliaqarfimmut naleqquttumik ilinniagaqarsimaneq, kalaallit kulturiat, oqaluttuarisaanerat taakkununngaluunniit assingusoq immikkut sammisaralugit

• Kalaallit Nunaanni nunat aqqinik oqaatsinullu tunngasunik soqutigisaqarlunilu ilisimasaqarneq

• Suleqatikkuminartoq, namminersorsinnaasoq nutaaliorsinnaasorlu

• Qarasaasiarsorsinnaaneq, qarasaasiakkut paasissutissanik passussisinnaaneq ilanngullugu

• Qarasaasiakkut programmimik ArcGIS-imik ilisimasaqarneq misilittagaqarnerlu – tamannali piumasaqaataanngilaq ilinniartitsineq pisinnaammat

• Oqaatsit: kalaallisut oqaatsit danskillu oqaasii (tuluttut oqaatsinik piginnaasaqarneq iluaqutaassaaq)

Neqeroorutigisinnaavarput

• Suliassat pissanganartut pingaaruteqartullu kalaallisut nunat aqqinik kulturikkullu eriagisassanik atuiuarnissamut ineriartortitsinissamullu tunngasut

• Suliffeqarfik suliassanik siammasissunik suliassalik suleqatillu pikkorissut

• Oqaatsit kulturilu pillugu uppernarsaasersuinissamik piginnaasanik ineriartorfissaqarluartoq

Oqaasileriffik pillugu

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup ataani ingerlatsibik inatsisit kalaallisut oqaatsinut tunngasut tunngavigalugit suliassanik ingerlatsisoq. Annertunerusumik nittartakkami www.oqaasileriffik.gl-imi atuarit.

Nunat Aqqinik Aalajangiisartut pillugit

Nunat Aqqinik Aalajangiisartut inissisimanerat, suliassaat atuuffiilu il.il. pillugit annertunerusumik paasisaqartoqarsinnaavoq innersuussissut manna aqqutigalugu: Nunat Aqqinik Aalajangiisartut pillugit Inatsisartut inatsisaat nr. 4, 1. juni 2017-imeersoq.

Paasissutissat annertunerusut

Atorfik pillugu annertunerusumik paasisaqarusuttut Oqaasileriffimmut saaffiginnissinnaapput, uunga: Beatrine Heilmann, Oqaasileriffimmi pisortaq (behe@oqaasileriffik.gl, tlf.: +299 38 40 61).

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "Qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk