Pinngortitamut Avatangiisinullu Naalakkersuisoqarfimmi AC-fuldmægtigi, Kalaallit Nunaanni ilisimasassarsiornernik pinngortitamillu nuannarisalik

Qinnuteqarnissamut killigititaq: 24. juuni 2025

Atorfiniffissaq: 1. aggusti 2025 imaluunniit isumaqatigiissuteqarnikkut piaarnerpaamik Suliffiup inissisimaffia: Nuuk, Kalaallit Nunaat

Kalaallit Nunaata isorartoorsuuneranut matunik ammaaqataarusuppit?

Ammasumik pissuseqarpit, ataqatigiissaarisinnaavit aamma Issittoq pillugu alapernaatsuuit? Kalaallit Nunaanni ilisimasassarsiornerit ingerlanneqarsinnaalernissaannut – ujarlernermiit takornariaqarnermut aamma ingerlasussanik piareersaanermiit aaqqissuussinermiillu saqqummiussisarnermut – qitiusumik inissisimanissat kajungeraajuk?

AC-fuldmægtigimik tunniusimasumik, Kalaallit Nunaanni ilisimasassarsiornermik suliassaqarfimmik ingerlatserusuttumik ineriartortitserusuttumillu pissarsiorpugut. Pinngortitamut Avatangiisinullu Naalakkersuisoqarfiup Pinngortitamut Immikkoortortaqarfiani suleqataassaatit, aammalu pinngortitami ingerlatsinermut, oqartussaasut suliaasa aamma Issittup nunanit tamalaanit soqutigineqarnerani suliassat paarlakaaffiani asseqanngitsumik sulinissamut periarfissaqassaatit.

Suliassatit

Angalasarnernut nalunaarut, ilisimasassarsiorluni suliassanut aamma Kalaallit Nunaanni inuilaarsuarmi angalaarnissamut sinaakkutissanik aalajangersaaffiusoq naapertorlugu ingerlatsinissamut akisussaaffeqassaatit. Suleqatitit suleqatigalugit:

• Ilisimasassarsiornissamut qinnuteqaatit suliarisassavasi, aamma ilisimasassarsiorluni ujarlernermut, takornariartitsinermut ingerlasussanillu piareersaanermut aaqqissuussinermullu atatillugu akuersissutinik tunniussisassaasi.

• Namminersorlutik Oqartussani suleqatit aamma avataaniit sullissisut, soorlu Kommunit, Kalaallit Nunaanni Politiit, Issittumi Sakkutooqarfimmi, Nunatta Katersugaasiviani Allagaateqarfianilu aamma Visit Greenlandimi suleqatit akornanni ataqatigiissaarisassaasi.

• Nalunaarutinik, ilitsersuutinik kiisalu www.expeditionsgreenland.gl-ip imaanik nutarterisassaasi.

• Ilisimasassarsiornermi suliassaqarfimmik ersarissaaqataassaasi, aammalu Kalaallit Nunaata Issittup nunarsuarmi soqutigineqaleriartorneranik iluaquteqarnissaa qulakkeertassavarsi.

Aamma pinngortitami ingerlatsineq politikkikkullu sullissineq suliaqarfigissavatit, taakkununngalu ilaapput:

• Aalajangiinissamut tunngavissianik allakkianillu suliaqarneq.

• Tusarniaanernut akissuteqartarneq aamma aqutsisunut najoqqutassat pitsaassusiinik qulakkeerisarneq.

• Suliassanik aqutsineq aamma suliniutinik nutaanik ineriartortitsineq.

Eqqarsaatigaarput:

• Attuumassutilimmik ilinniagartuutut ilinniagaqarsimassasutit.

• Ileqqorissaartuussasutit, ikiuukkumatuujussasutit, pitsaasuik attaveqarnissamut piginnaaneqassasutit aamma sulianut piginnaanilinnik assigiinngitsorpassuarnik suleqateqarnissamik nuannarisaqassasutit.

• Kalaallisut, danskisut tuluttullu oqaatsit atorlugit attaveqaqateqarnissamut piginnaaneqarluassasutit – oqaluinnarnikkut allattariarsornikkullu.

• Aaqqissuussamik, namminersorlutit suliatillu ilisimaaralugit sulillaqqissasutit – aamma ulapinnerup nalaani.

• Pisortat ingerlatsinerannik ajornanngippallu pinngortitamut, inatsisinut ilisimasassarsiornernulluunniit tunngasunik misilittagaqassasutit.

• Inuiaqatigiit kalaallit kulturiallu paasisimaarinniffigissagitit, aammalu suliffeqarfimmi arlalinnik kultureqarfiusumi sulinissat nuannarissagit.

Kikkuuvugut?

Pinngortitamut Immikkoortortaqarfimmi suleqatigiit tunniusimasut assigiinngitsunillu suliallit suleqatigilissavatit, tassanilu alapernaalluta, suleqatigiilluta isumagissaarlutalu suliassat piginnaaneqarfigilluarlugit sulivugut. Atorfeqartugut tassaavugut biologit, pinngortitalerisut, inunnik pingaartitsisut il.il. alapernaatsut, suleqatigiilluartut isumagissaartullu. Aamma ataatsimoorluta pinngortitaq alianaatsorsuaq taassumalu illersornissaa soqutigisarilluarparput. Akunnitsinni pissuserput pingaartorsiorfiunngilaq, aammalu kulturimi atukkatsinni suleqatigiinnissaq, ilisimasanik avitseqatigiinnissaq suliassallu akimorlugit ikioqatigiinnissaq pissusissamisoorluinnartutut ingerlapparput. Sulisut tamarmik takuneqarlutillu tungaaneqarnissaat pingaartipparput, aammalu tunuliaquttagut isummertarnigullu assigiinngimmata tamanna immikkoortortaqarfitsinni nukittuunngortitsisuusoq upperaarput.

Suliffeqarfik misigisassat: 

• peqqissaarussinermik sukkasuumillu suliatsinnut killiliisarnermik oqimaaqatigiissitsiviuvoq,

• suliatigut inuttullu ineriartortitsinermik pingaartitsiffigaarput.

• aamma iluatsitsinerit mikisut angisuullu nalliuttorsiutigisarpagut – ajornartinnagu kaagisuulluta.

Pingortitamut Avatangiisinullu Naalakkersuisoqarfimmi sulisut 40-t missaaniipput, immikkoortortaqarfinni arlalinni agguagaallutik: Pinngortitaq, Silap Pissusia, Avatangiisit Upalungaarsimanerlu, kiisalu Kiffartuussineq, Aningaasaqarneq & Sulisut. Aamma Aatsitassaqarnermi Avatangiisinut Aqutsisoqarfik, Pinngortitaleriffik aamma Asiaq (Greenland Survey) Naalakkersuisoqarfiup ataani immikkoortortaqarfiupput. Ataatsimoorluta suliassat pingaarutillit, Kalaallit Nunaannut iluaqutaasut isumagisarpagut – aamma tamanna tunniusimalluta, akisussaaffeqarluta ataatsimoorlutalu ingerlapparput.

Annertunerusumik paasisaqarusuppit?

Immikkoortortaqarfimmi pisortaq Mettelise Fritz Hansen tlf. +299 34 52 57-imut imaluunniit e-mail mtha@nanoq.gl aqqutigalugu attaveqarfigiuk.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk