Pinngortitamut Avatangiisinullu Naalakkersuisoqarfimmi Aqutsisut Allattoqarfianut AC-fuldmægtigit 1-2-t imaluunniit Immikkut Ittumik Siunnersorti

Ulloq atorfiniffissaq: 1. apriili 2026-mi isumaqatigiissuteqarnikkulluunniit piaarnerpaamik atorfinitsitsisoqassaaq. 

Pinngortitamut Avatangiisinullu Naalakkersuisoqarfik suleqatissamik nutaamik, Naalakkersuisoqarfimmi pisortaaneq aqutsisullu sinneri qanillugit sulisinnaasumik pissarsiorpoq. Naalakkersuisoqarfimmi sulisut, immikkoortortaqarfinnut pingasunut (Kiffartuussinermut, Aningaasaqarnermut Silallu Pissusianut Immikkoortortaqarfik; Pinngortitamut Immikkoortortaqarfik aamma Avatangiisinut Upalungaarsimanermullu Immikkoortortaqarfik), kiisalu Aatsitassaqarnermi Avatangiisinut Aqutsisoqarfimmut agguagaasut 35-t missaanniipput. Aamma Pinngortitaleriffik aamma Asiaq Naalakkersuisoqarfiup ataani immikkoortortaqarfiupput.

Suliat ingerlasarnerisa ullullu suliffiusut sapinngisamik eqaatsumik pitsaasumillu ingerlasarnissaannut qulakkeereqataassaatit – Naalakkersuisoqarfimmi pisortaanerup, pisortaqatigiit Naalakkersuisoqarfiullu sinnerani kiffartuunneqarnerini. Naalakkersuisoqarfimmi pisortaaneq qullersarissavat, kisiannili aamma pisortaqatigiit sinneri immikkoortortaqarfinnilu allani suleqatitit qanillugit sulissaatit. Pitsaasumik eqaatsumillu aaqqiisinnaassaatit, aammalu piffissap ilaani atorfinnik inuttaqanngitsoqarpat, allanilluunniit peqquteqarluni ulappunneq annertusisimappat immikkoortortaqarfinni ataasiakkaani ikiuunnissamut piareersimassaatit.

Suliassatit

Aqutsisut allattoqarfiani minnermi, ulluinnarni ingerlatsineq, pilersaarusiorneq politikkikkullu tulleriiaakkat eqqarsaatigalugit Naalakkersuisoqarfiup aqunneqarneranut kiffartuussisuusumi tapertaasumilu suleqataassaatit. Ulluinnaat pissanganartut, suliassanik assigiinngitsorpassuarnik suliaqarfiusut, amerlanertigut saaffiginnissutit politikkikkut suliaqartunit, innuttaasunit kommuninilluunniit tiguneqarnerinik apeqqutaatitsiffiusut naatsorsuutigisinnaavatit. Suliassavit pingaarnerit ukuunissaat naatsorsuutigisinnaavat:

• Politikkikkut tulleriiaakkat anguniakkallu naammassineqarnissaannut ikiuunneq

• Suliani pingaarutilinni ataqatigiissaarineq politikkikkullu aalajangiiffigisassatut tunngavissianik suliaqarneq

• Najoqqutassat, Naalakkersuisoqarfimmi pisortaanermut Naalakkersuisumullu saqqummiussassat pitsaassusiinik qulakkeerisarneq

• Tusarniaassutinut Naalakkersuisoqarfimmullu saaffiginnissutinut allanut akissuteqartarneq ataqatigiissaarisarnerlu

• Naalakkersuisoqarfimmi oqartussaaffiit akimorlugit attaveqaqatigiinnermi suliassat qanorluunniit ilusillit

• Naalakkersuisoqarfimmi immikkoortortaqarfiit akimorlugit suliassanut malinnaaneq

• Imaqarnilianik, allakkianik il.il. suliaqarnikkut aqutsisunut sullissineq

• Ataatsimiinnernut najoqqutassanik saqqummiussassanillu piareersaaneq suliaqarnerlu

• Inatsisiliornermi piareersaatinut ikiuunneq

• Suliassaalersut ikorfartuiffissallu assigiinngitsut

Tamatuma saniatigut kissaatigigukku, aammalu pisariaqartinneqartunik piginnaaneqarfeqaruit suliassaqarfinni aalajangersimasuni sullissisutut akisussaassaatit.

Atorfik assigiinngitsorpassuarnik suliaqarfiusoq aammalu amerlasuunik akisussaaffeqarfiusoq matumani pineqarpoq. Piffissamut killiliussat nukinginnartut atorlugit sulisarnissat naatsorsuutigissavat, taamaattumillu suliavit paasisimaarinissaat ingerlaavartumillu tulleriiaartarnissaat pikkoriffigissavat. Suliffeqarfimmi nuannersumik suleqateqarfiusumi, pingaartorsiorfiunngitsunik avatangiiseqarfiusuni aammalu toqqissisimanissamik ineriartornissamillu annertuumik pingaartitsiffiusumi suleqataalissaatit.

Piginnaaneqarfiit

Kiffartuussinissat ilisimaaraat, namminersorlutit sulisinnaavutit aammalu aaqqissuussinissaq, nutaanik ilikkagaqarnissaq suliassanillu ilisimaarinninnissaq piginnaaneqarfigalugit eqaatsumik aaqqiisinnaavutit. Eqqissisimasuuvutit, unammilligassaqarlutit kajumilertarputit, pisussaaffinnik naammassinnittarputit, unneqqarissuuvutit isumagissaarlutillu.

Siulliusinnaanermik aqutsisunullu pitsaanerpaamik tapersersuisinnaanerup ataqqinaatitut tigusisinnaanissat pingaaruteqarpoq. Suliassanni attaveqaqatigiinneq pitsaassutsimillu qulakkeerisarneq pingaarutilinnut ilaasussaammata, oqaasiliullaqqissuseqarnissat piumasaqaataavoq.

Tamatuma saniatigut naatsorsuutigaarput:

• attuumassutilimmik ingerlaqqiffiusumik ilinniagaqassasutit, soorlu attaveqaqatigiinnermut, Inuiaqatigiilerinermi ilisimatusarnermut, Inatsisilerinermulluunniit

• politikkikkut aalajangiisarnermi suliat ingerlasarnerinik paasisimaarinninnissat, ajornanngippat atorfimmi assigusumi

• misilittagaqassasutit attaveqaqatigiinnermullu pikkoriffeqassasutit

• ulluinnaat ulappuffiusut, nikerartunik sammisaqarfiusut suliassaqarfiusullu nuannerissagitit

• aaqqissuussamik sulisinnaassasutit aammalu piffissaliussanik malinninnissamut qulakkeerisarneq pikkoriffigissagit

• namminersorlutit sulisinnaassasutit namminerlu suliniuteqarsinnaassasutit

• akisussaaffimmik tigusinissaq allanullu siunnersortinniarlutit aperinissaq ersigissanngikkitit

• suliassanik iluarsiinissamut akisussaaffeqarnermut misigisimasarnerit nukittuffigalugu takutissinnaassagit

• inuit suliallillu assigiinngitsorpassuit suleqatigisinnaassagitit

• isumalluartuussasutit suliallu inerneqarnissaat pikkoriffigissagit

• oqaasiliullaqqissuseqassasutit allakkiornerlu pikkoriffigissagit

Inuiaqatigiinni kalaallit pissutsinik ilisimasaqarneq, aammalu kalaallisut, danskisut tuluttullu oqaatsinut pikkoriffeqarneq iluaqutaassaaq.

Pinngortitamut Avatangiisinullu Naalakkersuisoqarfik pillugu

Naalakkersuisoqarfimmi sulisut 35-t missaanniippugut, tassanilu Aqutsisut Allattoqarfiat 2-3-nik sulisoqarpoq.

Naalakkersuisoqarfimmi suliassat inuiaqatigiinnut pingaarutillit Kalaallit Nunaannut iluaqutaasut suliaraagut. Ulluinnaat atukkagut isumagissaarfiupput, aammalu suliat inernerinut inuit namminneq sunniisinnaanissaat inissaqartipparput.

Ineriartortitsinermi suliagut pissanganartut assigiinngitsorpassuupput, aammalu atorfinni ineriartorsinnaallutit misiginissat uagutsinnut pingaaruteqarpoq.

Naalakkersuisoqarfimmi aqutsisut sulliffimmik nuannarisaqarnerup nukittorsarneqarnissaa ingerlatiinnarnissaalu pingaartippaat. Naalakkersuisoqarfimmi ingerlaavarnerput anguniagaqarnerpullu, aammalu akisussaaffimmik tigusisarnerput ilisarnaatigaarput. Naalakkersuisoqarfittut ataatsitut ataqatigiippugut, tassanilu assigiinngisitaarnerput nukittoqqutigaarput. Taamaattumik toqqissimanartitannik avatangiiseqarnissat tamatumunngalu tapertaasinnaanissat piareersimaffigissavat.

Annertunerusumik paasisaqarusuppit?

Atorfik pillugu annertunerusumik paasisaqarusunnermi Naalakkersuisoqarfimmi Pisortaaneq Natuk Lund Meire, tlf. +299 34 64 76-mut, e-mail: natl@nanoq.gl aqqutigalugu attaveqarfigineqassaaq.

Qinnuteqarnissamut killiliussaq

Qinnuteqaat CV-mik soraarummeernermilu uppernarsaatit assilinerinik ilaqartinneqartoq kingusinnerpaamik 20. marsi 2026-mi linki matuma kingulianiittoq aqqutigalugu nassiunneqassaaq. E-mail-ikkut qinnuteqaatinik tigusineq ajorpugut.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.