Qarasaasiaqarnermi siunnersorti suliniutinik ingerlatsitsillaqqissoq

Kalaallit Nunaata digitalimik allanngueqataanissaanut siunnerfileeqataarusuppit?

Suliassarpassuit ataatsikkut suliarisinnaavigit? ”Una torraanerusumik suliarisinnaavarput?”-mik eqqarsartartuuit? Aaqqissuussaaneq inuillu ilisimasaqarfigaagit?

Taava illit Digitalinngortitsinermut Aqutsisoqarfimmi qarasaasialerisuni sulisorisinnaavatsigit!

Atorfik sumut attuumassuteqarpa?

Qarasaasiaqarnermi siunnersortimik tamatigoortumik pisariaqartitsivugut, taanna suliassaqarfiit piginnaasallu akimorlugit suliniutinik ingerlatsisinnaanissamut piginnaasaqarluassaaq suleqatiginnissinnaassallunilu.

Qarasaasiaqarnermi immikkoortortaqarfimmi sulisorilissavatsigit pingaarutilittut inissisimasoq – illillu immikkoortortaqarfimmi aqutsisoq qanimut suleqatigalugu – suliniutit ingerlanneqarnissaannut ineriartortinneqarnissaannut akisussaasuussaatit aammalu suleqatinnik pilersuisunillu oqaloqatiginnittuussallutit. Tassani ilaatigut qarasaasiaqarnermi kiffartuussisut, applikationinut supportit suliniummilu aqutsisoq suleqatigissavat.

Ilaatigut suliarissavatit:

• Qarasaasiaqarnermi suliniutit aallartinneranit naammassinissaannut pilersaarusiornissaat ingerlanneqarnissaallu

• Neqeroortitsinermi suliaqaqataaneq teknikkimullu tunngasunik inissiineq

• Qitiusumik allattoqarfimmi kommuninilu immikkoortortaqarfinnik ataqatigiissaarineq

• Misissuineq pisariaqartitanillu suussusersineq

• Suliffeqarfiup iluani suleriutsinik systeminillu ineriartortitsineq pitsanngorsaanerlu

• Nunap iluani nunallu tamalaat akornanni pilersuisunut attaveqarneq

Kinaavit?

Attaveqallaqqipputit isumassarsiallu piviusunngortissinnaallugit. Ataatsimut attuumassusilinnillu isiginnissinnaavutit – ataqatigiissaakkamik nutaaliaasumillu sulisinnaavutit.

Naatsorsuutigaarput:

• Qarasaasiaqarnermut naleqquttumik ilinniarsimanissat (ass. datalogi, software, IT ass.)

• Suliniutinik ingerlatsinermut suleriaatsinilluunniit ingerlatsinermut misilittagaqarnissat

• Kalaallisut, qallunaatut tuluttullu oqalussinnaallutillu allassinnaanissat

• Qiimasuunissat, ujartuisuunissat suleqatikkuminarnissallu

• Ulluinnarni allanngorartuusuni ilinniarusunnissat ineriartorusunnissallu

• Kalaallit Nunaanni kulturit, attaveqarnerit ataqatigiissutsillu ilisimasaqarfiginissaat

• Pinerlussimannginnermut uppernarsaateqartarnissat

Uagut pilluta

Digitalinngortitsinermi Aqutsisoqarfimmi sulisuuvugut 35-it, ullut tamaasa Kalaallit Nunaannut allannguutaasussamik digitalimik aaqqiissutinik suliaqartartuuvugut. Akisussaaffigut aallulluarpagut, suliffitsinni eqaatsumik tapersersoqatigiiffiusumilu sulivugut, ikioqatigiillutalu ilisimasanik avitseqatigiittarpugut.

Suleqatigiinneq, akisussaassuseqarneq, ilisimasanik avitsineq pitsaassuserlu malippagut, pingaartitatsinnillu piviusunngortitseqataasinnaasoq ujartorput.

Suna pissarsiarissaviuk?

• Atorfik akisussaaffippassualik illit aaqqiissutigerusutannut inissaqartitsisoq

• Ilisimasatigut inuttullu ineriartorfiusinnaasoq

• Suleqatit nuannersut aqutsisullu ilinnut tapersersuisut

• Suliffik eqaatsoq allanngorartorlu

• Ataatsimoorfik nukittooq assigiinngisitaartunik inissaqartitsisoq

Soqutiginaq?

Taava qinnuteqaatit nassiuguk. Qinnuteqaatit ingerlaavartumik atuarneqartassapput.

Apeqqutissaqarpit?

Qarasaasiaqarnermi pisortaq Aputsiaq Gudbrand Petersen attavigiuk:

Mail: apu@nanoq.gl

Oqarasuaat: +299 345887

Tusarfiginissat qilanaaraarput!

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk