Rigshospitalimi kalaallinut atuartunut ilinniartitsisunngorusuppit?

Københavnimi Rigshospitalimi napparsimmavimmi ilinniartitsisutut atorfik inuttalerneqartussanngornikuuvoq. Rigshospitalimi napparsimmavimmi atuartitsisup isumagisarpai kalaallit atuartut atuartinneqartussaatitaasut sivikinnerusumik sivisunerusumilluunniit napparsimmavimmi uninngasut imaluunniit Rigshospitalimi qatanngutinut inersimasunulluunniit katsorsarneqartunut ilaqutaasut atuartinneqarnissaat.

Ilinniartitaanermut Aqutsisoqarfik Rigshospitalimi ilinniartitsisussamik akisussaaffimmik ilisimaarinnilluartumik, tamatigoortumik isumassarsiullaqqissumillu - atuartunik ukioqatigiit, atuaqatigiit atuartitsissutillu akimorlugit atuartitsisinnaasumik sammisaqartitsisinnaasumillu pissarsiorpoq. Qinnuteqartoq inuttut nukittuujussaaq misiginneqataallaqqissuullunilu atuartunik ilaatigut inuunermi oqimaassinnaasunik atugaqartunik inissaqartitsillunilu tapersersuillaqqittuussalluni. Qinnuteqartoq namminersorsinnaasuussaaq qanimullu atuartunik angajoqqaavinillu, kommuninik Peqqissartullu angerlarsimaffiannik suleqatiginnilluarsinnaasuussalluni. Taakkua saniatigut ilimagineqarpoq qinnuteqartup Rigshospitalimi ilinniartitsisut allat suliassaqarfiillu attuumassuteqartut allat qanimut suleqatigisassagai tassunga ilaallutik Rigshospitalimi immikkoortortat uninngaviillu assigiinngitsut.

Napparsimmavimmi ilinniartitsisup suliassai pingaarnertut ukuussapput:

• Atuartut piginnaasaat pisariaqartitaallu aallaavigalugit atuarfimmi atuartitsissutini atuartitsissutinilu qanitariissuni atuartitsineq

• Sammisanik isumassarsiorfiusunik ilikkagaqarluarfiusunillu ingerlatsineq – aamma sammisanik inip atuartitsiviusup avataani pisussanik

• Suleqatigisartakkanik ataatsimeeqateqartarnerit napparsimmavimmilu ilinniartitsisoqatinik siunersioqateqartarneq

• Kalaallit peqqissartut illuannik napparsimasunillu ataqatigiissaarisunik suleqateqarneq

Illit pillutit

Qinnuteqartoq piukkunnartoq:

• Ilinniartitsisutut ilinniarsimasuussaaq kalaallisut danskisullu atuartitsissutini atuartitsissutinilu qanitariissuni allani atuartitsisinnaasoq

• Meeqqat atuarfianni sulinermik misilittagaqarpoq – meeqqanik immikkut pisariaqartitsisunik atuartitsinermik misilittagaqarsinnaalluni sulinerminilu peqataatitsineq akuutitsinerlu suleriaaserissallugu

• Atuartut sinnerlugit anguniagaqarumatuujussaaq, aaqqissuulluakkamik suleriaaseqarluni, akisussaassuseqarluni aaqqiissutissarsiorumatuujullunilu

• Kalaallit Nunaanni meeqqat atuarfiannik ilisimasaqarluassaaq

• Atuartitsinermi IT-mik atuinermik misilittagaqarluartuuvoq

• Perorsaanikkut atuartitsinermilu sammivinnut assigiinngitsunut alakkaamasaqartuussaaq

• Eqeersimaartuussaaq namminersorlunilu sulisinnaassuseqartuussaaq – aammali ilinniartitsisoqatinik pisortanillu suleqateqallaqqissuussalluni

• Eqaatsumik suleriaaseqassaaq, isumassarsiortuulluni nutaanillu eqqarsariallaqqilluni

Ilinniartitaanermut Aqutsisoqarfik pillugu:

Ilinniartitaanermut Aqutsisoqarfik tassaavoq suliffeqarfik politikkikkut aqunneqartoq, naalakkersuisoqarfimmik politikkerinillu sullissisoq kiisalu inerisaanermik saqqummersitsinernillu suliaqartoq.

Suliffeqarfiuvugut assigiinngitsorpassuarnik sulialik, aqutsinerit atuutereersut saniatigut ilaatigut aamma saqqummersitsivilik, naqiterivilik paasititsiniaanermik atorniartarfimmillu tunngasunik katersugaatilik. Aqutsisoqarfiup annerusumik sammisarpai atualinnginnerup nalaa, meeqqat atuarfiat, efterskolit atuarfiillu nammminersortitat. Suleqatigiit 50-it missaaniippugut, suliffeqarfimmi pingaartorsiorpallaanngitsumi suliat pitsaasuunissaannik pingaartitsisut.

Akissarsiat sulinermilu atugassarititat:

Atorfiup isumaqatigiissutit malitai tassaapput ”Københavnip Kommuniani ilinniartitsisunut allanullu isumaqatigiissutit” aamma ”Københavnip Kommuniani meeqqat atuarfianni ilinniartitsisunut sulinermi piffissamik atuinissamut isumaqatigiissut.”

Inissaq

Atorfimmut atatillugu sulisunut inissiamik innersuussisoqarsinnaanngilaq aamma atorfininnermut soraarnermullu atatillugu angalasinnaanermut pisinnaatitaaffeqarani.

Qinnuteqaat nassiuguk, CV, ilinniarsimanermut pikkorissarsimanermullu uppernarsaatit allagartallu allat pisariallit "Qinnuteqaat nassiuguk" toqqarlugu.

E-mailikkut qinnuteqaateqartoqarsinnaanngilaq.