Ujarassiornermut Immikkoortortaqarfik Qaqqat sisoortarnerannut suleqatigiinnut AC-fuldmægtigimik imaluunniit immikkut siunnersortimik ataatsimik marlunnilluunniit sulisussarsiorpoq

Ujarassiornermut Immikkoortortaqarfik Qaqqat sisoortarnerannut suleqatigiinnut AC-fuldmægtigimik imaluunniit immikkut siunnersortimik ataatsimik marlunnilluunniit sulisussarsiorpoq

Qaqqat sisoorsinnaanerannik nakkutiginninnermik, nunap assiliornermik aarlerinaataasunillu misissueqqissaarnernik suliaqarnissaq soqutigaajuk? Taava immaqa illit Ujarassiornermut Immikkoortortaqarfimmi nakkutiginninnermik suliaqarnitsinni amigaatigaatsigit.

Atorfik pillugu

Qaqqat sisoortarnerinut suleqatigiit inuiaqatigiit qaqqat sisoornissaannut pisunullu taakkununnga atasunut, soorlu tassaarsuaqarluni qarsutsinernut, isumannaatsuunerulersinnissaannut sulisussanngortitaapput. Suliassaqarfimmi sukkasuumik ineriartortumi suleqatigiinni ikittuni ilaalissaatit. Suleqatigiilluta nukittunerulernissatsinnut aammalu qaqqat sisoortarnerinik nakkutiginneqataanissamut naleqquttunik piginnaasalimmik suleqatissarsiorpugut. Ukiup ingerlanerani angalasarnissap annertuujunissaa ornigullunilu suliaqartarnissaq naatsorsuutigineqartariaqarpoq.

Suliassarni ilaatigut ilaassapput: 

• Ullut tamaasa nakkutiginneriaatsinik atuilluni qaqqat sisoortarfiinik nakkutiginninneq

• Pissutsinik nalilersuinernik qaammatikkaartumik tamanut saqqummiussisarneq 

• Qaqqanik qajannartortaqarsinnaasunik nunap immikkoortuini misissuinerit

• Nakkutiginninnermi periusissianik ineriartortitsinermi atuutsitsilertarnermilu aammalu oqartussat, najukkani innuttaasut nunanilu tamalaani suleqatigisartakkat suleqatigalugit aarlerinaataasunik misissueqqissaarnerni peqataaneq

• Nittartakkamik nutarterineq ineriartortitseqqinnerlu

• Asimi suliaqarnissanut pilersaarusiorneq suliarinninnerlu, ilanngullugit dronit aamma sajuppillatsitsisarnermut atortut atorlugit uuttortaanerit

• Asimi paasissutissat katersorneqartut pitsaassusaannik qulakkeerineq, misissueqqissaarneq, aaqqissuussineq paasissutissiisarnerlu

• Aalajangiisartunut siunnersuineq

• Paasititsiniaanernik ingerlatsineq aammalu qaqqat sisoornissaasa navianaateqarnerinut nuna tamakkerlugu akuutitsiviusumik aarlerinaataasunik aqutsinissamut pisinnaasanik inerisaaneq

• Nakkutiginninnermik suliaqarnerup Kalaallit Nunaanni pissutsinut naleqqussarneqarluni ineriartortinneqarnissaa pillugu ilisimatusarnermik avatangiisilinnik suleqateqarneq

Piukkunnassutsitit

Matuma kinguliani allassimasut immikkoortut tamaasa naammassisimasariaqanngilatit, kisianni annertunerpaartaanniissinnaasutut ilinnut takusinnaassasutit naatsorsuutigaarput:

• sulianut naleqquttumik ilinniagaqarsimaneq, assersuutigalugu ujarassiooq, geofysikeri, remote sensing-inut immikkut ilisimasalik, ingeniøri assigisaannilluunniit. 

• Nunami sumiiffinnut paasissutissanut periaatsimik (GIS) aamma / imaluunniit programmilersuinermik ilisimasaqarneq 

• Aarlerinaataasunik aqutsinermik pinngortitamilu navianartunik (natural hazards) misilittagaqarneq pitsaassaaq

• Kalaallisut, danskisut tuluttullu attaveqaqatigiillaqqissoq

Inuttut piginnaasaqarfiit

• Tunniusimasuuvutit suleqatiginnillaqqissuullutillu

• Nammineerlutit sulisarputit aammalu tunniussinissamut killigititat naammassisarlugit 

• Kalaallit Nunaanni inuiaqatigiinnut tunngasunut ilisimasaqarputit

• Nunap immikkoortuini avingarusimasuniittuni asimi suliaqarnermik misilittagaqarputit imaluunniit suliaqarusupputit

Uagut pilluta

Inuussutissarsiornermut Aatsitassanulu Naalakkersuisoqarfimmi sulisut 40-t missaanniippugut. Atorfik aaqqissuussaanermi Ujarassiornermut immikkoortortaqarfimmi inissisimavoq, tassaniillutik ujarassiuut pisortaat 1 aamma ujarassiuut ilisimatuussutsikkut sulisut 11. 

Ujarassiornermut immikkoortortaqarfik Naalakkersuisunut aatsitassanut suliassaqarfimmi ujarassiornermi ilisimatuussutsikkut siunnersuisartutut pingaarnersaavoq. 

Naalakkersuisoqarfik pillugu annertunerusut atuarsinnaavatit uani https://govmin.gl/ aammalu qaqqat sisoortarnerinut suleqatigiinni sulineq pillugu uani https://govmin.gl/da/fjeldskred/.

Neqeroorutigaagut: 

• Suliffik pissanganartoq, unammillernartortaqartoq tamatigoortorlu 

• Immikkoortortaqarfik ineriartortuartoq sioqqutaarisumillu sulisartoq, ataqatigiilluarneq atuulluni

• Suliassarni sunniuteqarnissamut periarfissaqartoq 

• Ilinniaqqinnissamut periarfissaqartoq 

Aningaasarsianut atorfininnermullu tunngasut 
Aningaasarsiat atorfininnimilu atugassarititaasut, ilanngullugit atorfininnermi soraarnermilu akiliunneqarluni angalasinnaatitaaneq pequtillu nuutinnerinut akiliunneqarnissamut pisinnaatitaaneq, atorfininnerup nalaani Namminersorlutik Oqartussat kattuffiullu isumaqatiginninniarsinnaatitaasup pineqartup akornanni isumaqatigiissutit naapertorlugit pissapput.

Piffissaq suliffiusoq aallaaviatigut sapaatip akunneranut nalunaaquttap akunneri 40-nik sivisussuseqarpoq.

Ineqarneq
Atorfimmut sulisunut inissiamut innersuussisoqassanngilaq. Qinnuteqartoq Namminersorlutik Oqartussani atorfeqarnini aqqutigalugu sulisunut inissiameereerpat, sulisunut inissiamut innersuunneqarsinnaatitaaneq attatiinnarneqassaaq. Sulisunut inissiaq atorfeqarnermut atatinneqarpoq, aammalu atorfeqarunnaarnermi qimanneqassalluni.

Paasissutissat annertunerusut
Atorfik pillugu annertunerusunik paasisaqarusukkuit attaveqarfigisinnaavat immikkoortortaqarfimmi pisortaq Romain Meyer (+299) 34 68 17, e-mail rnmr@nanoq.gl. 

Atorfininnissaq ulloq 1. oktober 2026 imaluunniit erseqqinnerusumik isumaqatigiissuteqarneq malillugu.