Ilitsersuisoq Imarsiornermik Ilinniarfik Ilulissat

Ilitsersuisoq Imarsiornermik Ilinniarfik, Ilulissani immikoortortaqarfik Kissaatigaaguk inuit imaani suliaqartut Kalaallit Nunaanni suliaminnut naappertuutumik ilinniagaqarlersimassasut, akisussaafimmillu tigusillutik namminnerminnut aamma inuit allat isumannaatsuunissaannik aamma atugarissaarnissaq, aammattaaq avatangiisit angalaffigisagut?

Imarsiornermik Ilinniarfik Ilulissani immikkoortortaqarfimmik pilersitsiniarluni ilitsersuisussanik marlunnik sulisussarsiorpoq

Atorfik pillugu

Ilinniartitsineq pingaartinnerullugu atorfik pissanganartoq allanngorartorlu. Suliffik unammilernartoq imarsiornermut tunngassuteqartunik suleqaterpassuaqarfiusoq.

Suliffik suleqatigiinnermik ineriartortitsinermillu pingaartitsitsiffiusoq. Suliffimmut tunngatillugu inuttullu ineriartornissamut periarfissagissaarfiusoq. Atorfik Ilulissani aallaaveqarpoq, aamma Nunarput tamaat suliffiusoq.

Suleqatissatit ukuupput, ilitsersuisut allat, pikkorissaavimmi aqutsisoq ilinniartitsisullu tiimimusiallit, pikkorissaavimmi pisariaqartitsineq naapertorlugu atorneqartut. Sulisut tamarmik immikkoortortaqarfimmik ingerlatsinermi tassanilu suliassat assigiinngitsut peqataaffigaat.

Illit pingaarnertut suliarissavatit imaani aamma sulinermi isumannaatsuunissamik tunngaviusumik pikkorissaaneq aalisartunut, GMDSS-imik pikkorissaanerit ilangullugit.

Tamakku saniatigut immikkoortortaqarfimmi pikkorissaanerit allat ineriartortinnissaat ingerlanneqarnissaallu, peqqutaallutik piginnaanitit aamma soqutigisatit.

Peqataaffigissavatitaaq immikkoortortaqarfimmi atortut umiatsiallu akisussaaffigissavatit, tamakkunanngalu aserfallatsaaliuinissaq nutaanillu pisinissaq iluarsaaassinissarlu isumagissavatit.

Imarsiornermik Ilinniarfik suliffiuvoq anginngitsoq ilinniartut pikkorissartullu ilinniartitaanerat qulakkeerniarlugu immikkoortortaqarfiit suleqatigiiffiusariaqartoq.

Taamaattumik naleqqussarsinnaassuseqartariaqarpoq pilersaarutillu allanngoriataarnerat piffissaq sivikitsup iluani nalunaaruteqarneratigut aqussinnaasariaqarlugu.

Ilinni naatsorsuutigaarput:

• Piumaneruarput ima ilinniagaqarsimanissat Sætteskipper, fiskeskipper af 1.grad immaqaluunniit qaffasinnerusumik imaani ilinniagaqarsimaneq. Qinnuteqartut allatut umiartornermut tunngassuteqartut piukkunneqarsinnaapputtaaq. Ingammik misilittakkat ilinniarfinneersuuppata imaluunniit aalisarnermi inuusutissarsiornermiit.

• Umiartornermut tunngasunik suliaqarsimassasutit angalasimassallutillu.

• Ilisimasatit pikkorissartunut ingerlateqqikkusungaassagitit.

• Ilinniartitsinermi suleqatit qanimut suleqatigissagitit.

• Nammineersinnaassutit piffissaliussatullu isumaqatigiissutit eqqortissinnaagitit.

• Qallunaatut kalaallisullu oqalussinnaasutit aamma pitsaassaaq allattariarsornermi.

• Qarasaasiakkut DocuNote, Lectio aamma It-reg. Iilisimasaqarfigigaani iluaqutaasaaq.

Sunniuteqarluartumik kajumissinnartumillu ilinniartitsineq pingaartinneqarpoq. Ilitsersuisut allat peqatigalugit siunnersueqataassaatit aamma suleqatit pikkorissartullu sunniuteqarluaqqullugit kajumissinartooqqullugillu pikkorissarnernut seminarinullu peqataasassaatit. Naatsumik oqaatigalugu pikkorissarnernut peqataaneq nuannersuullunilu sunniuteqarluartuussaaq.

Angalasarnerit pillugit

Naatsorsuutigineqassaaq ukiumut ullut 100-150 tikillugit angalasarnissaq, Sinerissami qassinik pikkorissartitsisoqarnersoq apeqqutaalluni.

 Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Qinnuteqartoq uppernarsaatitalinnik piginnaasalik immikkut siunnersortitut, siunnersortit pisortaatut siunnersortaanertulluunniit isumaqatigiissutit naapertorlugit atorfinitsinneqarsinnaasarpoq.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.