AC-fuldmægtigi/immikkut siunnersorti: Ilisimatusarfiup ilisimatuutut misissuinermut allaffeqarfianut inatsisileritooq

Kalaallit Nunaanni ilisimatusarnermut sinaakkusioqataarusuppit?

Inatsisilerituumik AC-fuldmægtigimik/immikkut siunnersortimik, isumaqatigiissutit pillugit inatsisinut, paasissutissat illersugaanerannut aamma nunat tamalaat suleqatigiinnissamut isumaqatigiissiortarnerannut suliassaqarfiit iluanni piginnaasalimmik ilisimatuutullu misissuinermut allaffeqarfitsinnik nukittorsaasussamik pissarsiorpugut.

Atorfiup martsip 1-ani 2026 imaluunniit isumaqatigiissuteqarnikkut inuttalerneqarnissaa kissaatigineqarpoq. Atorfik sapaatip akunneranut 40 tiimit suliffiuvoq.

Ilisimatusarfiup ukiuni makkunani ilisimatuutut misissuinermut allaffeqarfini inerisaleruttorpaa, allaffeqarfiullu ilisimatusartut ilisimatusaatigalugu suliniumminnik ingerlatsinerat tamakkerlugu ikorfartortarpai. Tassa siunnersuinernit, aningaasaliisussarsiornernit siumoortumillu missingersuusiornernit suliniutinik nassuiaasersuisarnernut inaarutaasumillu nalunaarusiortarnernut tunngasuni. Ilisimatuutut misissuinermut allaffeqarfimmi sulisut suleqatigiillutik sulisarput, sulisullu tamarmik immikkut pingaarnertut akisussaaffeqarput, aammattaarli suliassaqarfitik akimorlugit akunnerminni ikioqatigiittarlutik.

Isumaqatigiinniuteqarnernik aamma inatsisitigut pituttuisunik isumaqatigiissiornernik taakkualu pitsaassusaannik qulakkeerinnittarnernik suliaqarnermi ilisimatuutut misissuinermut allaffeqarfitsinni inatsisilerituutut qitiusutut atuuffeqassaatit. Nunatsinni nunanillu tamalaanik suleqateqarnerni ilisimatusartut inatsisitigut pitsaanerpaanik sinaakkuteqarnissaannut suleriaatsinik qulakkeerinnittussanik ineriartortitsinermi pingaarnertut atuuffeqassaatit. Aammattaaq Kalaallit Nunaani suliassaqarfiit pingaarnerit ilisimatusarfigineqartut qanimut paasisaqarfigissavatit, tassunga ilanngullugu Oqaluttuarisaanermi Pisimasunik Qulaajaanermik suliaqarneq.

Inatsisilerituumik pingaarnertut suleqatigiinnissamut aamma paasissutissanik suliarinnissinnaanermut isumaqatigiissutit pillugit misilittagalimmik paasisimasaqarluartumillu pissarsiorpugut. Inatsisilerituutulli ilinniakkaminnik naammassinneqqammertunit piukkunnaatilinnit qinnuteqaatit soorunami aamma pissarsiarerusussinnaavagut, piukkunnaatilillu toqqarneqartoq suliffeqarfitta avataanit suliatigut tapersersorneqarnikkut naleqquttumik sulinikkut ilinniartissinnaavarput.

Ilisimatuutut misissuinermut allaffeqarfimmi sulisut marluupput, allaffeqarfillu Ilisimatusarfiup Allaffissornikkut Aqutsisoqatigiiffiata teknikkikkut allaffissornikkullu suliaqarfiata ataani inissisimavoq katillugit 37-nik sulisoqartumi.

Atorfik pillugu

Ilisimatusaatigalugu suliniutini pineqartuni tamani pingaarnertut inatsisilerituutut akisussaasuussaatit. Ilisimatusartut pisortallu siunnersortassavatit, suleqatigiinnissanut, aningaasaateqarfinnit aningaasaliussanut, paasissutissat isumannaatsuunissaannut aamma paasissutissanik inunnut ataasiakkaanut tunngasunut isumaqatigiissusissiorlutillu taakkua pitsaassusaat qulakkeertassavatit. Suleriutsinik inatsisinik malittarinnitsitsisunik ilisimatusarnernillu ikorfartuisunik ineriartortitsinermi pingaarnertut inissisimaffeqassaatit.

• Piukkunnaatilik ujagarput tassaavoq:

• Cand.jur.-tut ilinniarsimasoq

• Inatsisileritooq namminersorluni sulisinnaasoq suliassaqarfinnillu ineriartortitassanik nammineerluni suussusiliisinnaasoq/nassaarsinnaasoq

• Paasissutissanik siammarterisarneq aamma paasissutissat inunnut ataasiakkaanut tunngasut pillugit kalaallit aamma danskit inatsisaannik misilittagalik

• Suleqatigiinnissamut isumaqatigiissutinik assigiinngitsunik suussusilinnik suliaqarnissamut pitsaassusaannillu qulakkeerinninnissamut piginnaasalik:

• Isumaqatigiissutit pillugit inatsisit

• Suleqatigiinnissamut isumaqatigiissutit

• Paasissutissanik suliarinninnissamut isumaqatigiissutit

• Akiliilluni suleqateqarnernik (isumaqatigiissusiorneq)

• Ilisimatusartunik avataaneersunik akiliinikkut suleqataalersitsineq

• Suliassap atortuutissaanik pilersuinermut isumaqatigiissutit

• Avammut attaveqateqarnermut atatillugu inatsisitigut siunnersuisinnaasoq

• Ilisimatusaatigalugu suliniutinut allagaasiorsinnaasoq, ass. paasissutissinneqareernikkut isumaqataalluni akuersissiorneq

• Kalaallit, danskit tuluillu oqaasiinik piginnaasalik - piumasaqaataanngilarli

Tamatuma saniatigut ilisimatuutut misissuinermut allaffeqarfiup nalinginnaasumik ingerlanneqarnerani ikiuuttassaatit, ilaatigut assersuutigalugu makkuninnga:

• Suliniutissatut qinnuteqaatit pitsaassusaannik qulakkeerinninneq

• aningaasaliisussarsiorneq

• siumoortumik missingersuusiorneq

• inaarutaasumik nalunaarusiorneq

• ph.d.-nngorniarfimmut suliassaqarfik

• avataaniit ilisimatusariartortunut suliniut (visiting scholar program)

• ilisimatuutut misissuineq pillugu najoqqutassiorneq

• ilisimatusarfiup iluanit avataaniillu saaffiginnissutit suliarineri

Makkua neqeroorutigaagut

• Atorfik pissanganartoq nunatsinnilu ilisimatusarnermik suliassaqarfimmi sunniuteqataangaatsiarnissamut periarfissiisoq

• Suliatigut ineriartornissamut aamma suleriaatsinik nutaanik ineriartortitsinissamut periarfissat

• Suliffimmi avatangiisit uummaarissut, tamatumani ilisimatusartut pisortallu qanimut suleqatigineqarlutik

Qinnuteqartoq naleqquttunik piginnaasaqarpat atorfinitsitsinerup aallartinnerani immikkut siunnersortitut tapissat isumaqatigiinniutigineqarnissaanut piumasaqaat ASA-mut nassiunneqarsinnaavoq. Taamaanngippat AC-fuldmægtigitut atorfinitsitsisoqassaaq.

Attavigisassat/ paasissutissat

Atorfik pillugu sukumiinerusunik paasisaqarusukkuit, tikilluaqquneqarputit Ilisimatusarfiup pisortaa Christine Tønnesen oqarasuaat: +299 347303 attavigissallugu. Ilisimatusarfik pillugu paasisaqarnerorusukkuit uani paasisaqarnerusinnaavutit www.uni.gl.

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut 13-upput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik

• Inuiaqatigiilerinermik, Aningaasaqarnermik Tusagassiornermillu Ilisimatusarfik

• Kulturimik, Oqaatsinik Oqaluttuarisaanermillu Ilisimatusarfik

• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk