Allaffimmi pisortaq nunatta nunanut allanut tunngasunut kiffartuussivianut

KALAALLIT NUNAATA NUNANUT ALLANUT NAALAKKERSUISOQARFIMMI ALLAFFIMMI PISORTAQ

Nunanut allanut politikimik nunallu tamat akornanni suleqatigiinnermik misilittagaqarpit? Kalaallit Nunaata nunanut allanut sullissiviani sulinissamut kajumissuseqarpit?

Nunanut Allanut Ilisimatusarnermullu Naalakkersuisoqarfik piaarnerpaamik isumaqatigiissuteqarnikkut nunanut allanut immikkoortortami allaffimmi pisortassarsiorpoq.

Kalaallit Nunaata nunanut allanut sullissiviata Kalaallit Nunaata kunngeqarfimmi kiisalu nunat tamat akornanni suleqatigiinnermi nunallu tamat akornanni oqaloqatigiiffinni arlalinni soqutigisai isumagisarpai. Suleqatissatsinnik pikkorissumik naalakkersuisoqarfiup Nuummi aqutsisuini ilaasussamik pissarsiorpugut. Allaffimmi pisortap immikkoortortap sulisuinik siulersuineq kiisalu immikkoortortap nunani allani sinniisoqarfiinut attaveqarneq isumagisarpai. Allaffimmi pisortap naalakkersuisoqarfimmi pisortaq qullersaraa, naalakkersuisoqarfiullu aqutsisooqatigiivinut ilaalluni. Atorfik Nuummi inissisimavoq.

Nunanut allanut immikkoortortaqarfik

Nunanut allanut immikkoortortaqarfik Nunanut Allanut Ilisimatusarnermullu Naalakkersuisup ataani aaqqissuussaanikkut inissisimaffeqarpoq, nunanullu allanut immikkoortortaqarfik ilisimatusarnermullu immikkoortortaqarfik tunngatillugu Naalakkersuisumik sullissinermik ingerlatsiviulluni. Nunanut Allanut Naalakkersuisoqarfimmi Nunanut allanut immikkoortortat, taassuma ataani Bruxellesimi, Washington D.C.-mi, Reykjavíkimi Beijingimilu aallartitaqarnikkut sinniisoqarfiit ilanngullugit kiisalu Ilisimatusarnermik Immikkoortortaqarfik ilaapput. Nunanut allanut immikkoortortaqarfik sinniisoqarfiit ilanngullugit 20-t missaannik sulisoqarpoq.

Immikkoortortaqarfik Namminersorlutik Oqartussani Kalaallit Nunaata nunanut allanut tunngasunik soqutigisaanik isumaginnittuni qitiusumik oqartussaavoq, naalakkersuisoqarfinnullu nunani allani ingerlatanik ataqatigiissaarillunilu isumaginnittuulluni. Taamaalilluni suliatsinni nunanut allanut attaveqarnerit kiisalu nunarsuup immikkoortuini nunallu tamat suleqatigiinnerini pissutsit ilaapput, tassani Nunat Avannarliit Ministeriisa Siunnersuisooqatigiivi, Issittumi Siunnersuisooqatigiit, EU-mut attaveqarneq, FN-imut attaveqarneq tassungalu tunngasunik attaveqaateqarnerit ilaapput. Namminersorlutik Oqartussat illersornissamut isumannaallisaanermullu politikikkut apeqqutinik Kalaallit Nunaannut attuumassuteqartuni peqataapput.

Immikkoortortaqarfik ullumikkut allaffimmi pisortamik, naalakkersuisoqarfiup Issittumi Siunnersuisooqatigiinni Kunngeqarfiup siulittaasuutitaqarneranik isumagisassanik aqutsisumik sulisoqarpoq. Allaffimmi pisortap taassuma Issittoq suliassaqarfigaa.

Suliassatit

Allaffimmi pisortamik sulisunik aqutsinermik Nuummilu sulisunik immikkoortortaqarfimmi isumagisassanik ataqatigiissaarisussamik sulisussarsiorpugut, taassumalu ilaatigut inatsisit imaanut tunngasut, nunani avannarlernut tunngasut nunallu tamat akornanni suleqatigiinnerit isumagisassarissavai. Periarfissaqarpat isumagisassat qinnuteqartup piginnaasaanut arlaatigut nalimmassarneqarsinnaapput. Tamatuma saniatigut allaffimmi pisortaq Nunanut Allanut Naalakkersuisumik naalakkersuisoqarfiullu pisortaanik sullissinermut, sinniisoqarfinnik ikiuunnermut, Inatsisartunut attuumasunik, tusarniaanermi akissutinik ataqatigiissaarinermik, naatsorsuutinut tunngasunik akuersisarnernik kiisalu immikkoortortaqarfimmi ataatsimiinnernik ingerlatsisarnermik akisussaaffeqarpoq.

Ulluinnarnik suliassanik assigiinngitsunik pissanganartunik politikimut allaffissornermullu tunngasunik ingerlatsiviusoq naatsorsuutigisinnaavat. Atorfik assigiinngitsorpassuarnik sammisalik annertuumillu akisussaaffeqartoq pineqarpoq, piffissallu ilaani angalanerit, nunat tamat akornanni oqaloqatigiittarfinni Naalakkersuisunut sinniisuuffigisat naatsorsuutigineqarsinnaapput. Pisariaqartitat malillugit suliassat allanngorarsinnaanerat piareersimaffigissavat, piffissanilu suliassat nukinginnartut pingaarnersiueqqinnerillu pisariaqartut pisinnaanerat piareersimaffigissavat.

Ilaatigut Naalakkersuisup, kattuffiit soqutigisaqaqatigiit, nunat tamat akornanni suleqatit, sulianik ingerlatsiffiit kiisalu sulisut naalakkersuisoqarfiullu akornanni qitiusumik inissisimaffeqassaatit. Inuttut isornaatsuunissat, pisortatut misilittagaqarnissat kiisalu annertuumik politikikkut ilisimasaqarlutit politikikkut pingaarnersiuinernik paasisimasaqarnissat politikikkullu aalajangiinernut tunngatillugu allaffissornikkut sullissinissat tamatuma kinguneraa. Allaffimmi pisortamut ulluinnarni unammilligassat aqutsinermik, pingaarnersiuinermik, angusassanik aallussinermik, pitsaassutsimik qulakkeerinninnermik kiisalu sulisunik oqaloqatiginnillunilu qanimut suleqateqarnerit pisariaqarput.

Naalakkersuisoqarfiup aqutsisoqatigiivini ilaassaatit aqutsisullu sinneri peqatigalugit pitsaasumik ingerlatsineq naalakkersuisoqarfiullu suliffittut ineriartortinnissaa qulakkiissavat.

Naalakkersuisoqarfimmi aqutsisut suliffiup nukittorsarlugulu suliffimmik annertuumik iluarisimaarinninnerup attannissaa pingaartippaat. Taamaammat allaffimmi pisortatut isummersuisinnaassaatit, kajumitsitsisinnaallutit suliassanillu agguaasinnaallutillu siunnerfilinnik utimut nalunaaruteqartarnermut pikkorissuussaatit. Sulisutit iluatsittumik suliaminnik ingerlatsisinnaanerat pikkoriffigissavat, sulisut ataasiakkaat ineriartornissamut periarfissaannik pingaarnersiuisinnaassaatit, allaffiullu sukkasuumik tunniusimasumillu ingerlanissaa pingaartillugulu angusanik atorneqarsinnaasunik patajaatsunik pilersitsisassaatit. 

Piginnaasat

Ingerlaqqiffiusumik ilinniagaqassaatit pisortanilu suliffeqarfinniluunniit namminersortuni ukiuni amerlasuuni allaffissornikkut aqutsinermik misilittagaqassaatit.

Attaveqarneq pitsaassutsimillu qulakkeerinninneq suliassanut pingaarutilittut ilaammata, oqaaseqatigiiliornermut, ingammillu allakkatigut, piginnaaneqarluarnissat piumasaqaataavoq.

Naatsorsuutigaarput illit:

• Aqutsinermik misilittagaqarlutillu piginnaaneqarluartutit

• Politikikkut aalajangiisarnernik misilittagaqarlutillu paasisimasaqassasutit

• Kalaallit Nunaanni nunanut allanut immikkoortumik soqutigisaqassaatit – ajornanngippallu misilittagaqarlutit

• Ulluinnarni ulapiffiusuni nikerartunik sammisaqarlutillu suliassaqarneq nuannarisaqartutit

• Siunnerfilimmik sulisartutit piffissamillu killiliussat qulakkeerneri pikkoriffigigitit

• Suleqatigiinnermi aqutsinermilu pitsaasunik piginnaasaqartutit, ulapiffiusumilu eqqissisimallaqqissuusutit

• Angusaqarnermik siunnerfeqartutit akuersaartumillu periuseqartutit

• Allaffissornikkut suliani inuttullu unammillernartut passussinnaagitit

• Politikikkut sammivilimmik suliani malunniuteqarnissamut piumassuseqartutit

• Naatsorsuuserinermi takunnissinnaassuseqartutit

• Kalaallisut, danskisut tuluttullu oqaatsinik oqalulluarsinnaassallutit allattariarsornermilu piginnaaneqarluartutit

• Inuiaqatigiinnik kalaallinik annertuumik ilisimasaqartutit

Neqeroorutigaavut

Immikkoortumi nunarsuup tamarmi soqutigisaani atorfik pissanganartoq nammineerfiusorlu.

Suliffik ulapaarfiusoq pitsaasunik suleqateqarfiusoq sulisullu iluarisimaarnerat annertuumik aallullugu persuarsiorfiunngitsumik suliffiusoq.

Atorfik Nuummi inissisimavoq kingusinnerusukkullu Beijingimi, Bruxellesimi, Reykjavikimi Washington DC-miluunniit sinniisoqarfitsinnut suliartortinneqarnissamut periarfissaqalersinnaassooq.

Isumannaallisaanikkut akuerineqarneq

Atorfimmut piukkunnaatilittut nalilerneqarnissami malittarisassat atuuttut malillugit isumannaallisaanikkut akuerineqarsinnaanerit piumasaqaataavoq.

Taamaammat aallaqqaammut pinerluuteqarsimanermut nalunaarsuiffimmit anisitamik ilanngussigit.

Taanna akeqanngitsumik piffimmi politiitut oqartussani imaluunniit www.politi.dk/bestil/bestil-straffeattest pissarsiarineqarsinnaavoq.

Paasissutissat allat

Atorfik pillugu paasisaqarnerujumaguit, naalakkersuisoqarfiup pisortaanut Mininnguaq Kleistimut, oqarasuaat +299 34 50 00 imalluunniit mikl@nanoq.gl atorlugit attaveqarnissamut tikilluaqqusaavutit.

Qinnuteqarnissamut killiliussaq

Qinnuteqaat ulloq 12. oktober 2025 kingusinnerpaamik tigoreersimassavarput.

Sapaatit akunnerisa 42-43-44-uanni oqaloqatigiinnernik ingerlatsinissat naatsorsuutigaagut.

Ulloq 1. december 2025 imaluunniit isumaqatigiissuteqarneq malillugu piaarnerpaamik atorfiniffiussaaq.

Akissarsiat atorfeqartitaanermilu atugassarititaasut:

Atorfik akissaateqarfimmi LR 36-mi maanna inissisimavoq. 1. april 2025 LR 36-mi tunngaviusumik akissarsiaq tapiillu aalajangersimasut soraarnerusutissianullu illuartittagaq ilanngullu antterussuseqarput qaamammut Kr. 57.102 ukiumullu Kr. 685.224.

Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemandi-tut atorfeqareersimaguni Nunatsinni pisortani tjenestemandit pillugit inatsisit malillugit tjenestemandinut atugassariti-taasut naapertorlugit atorfinitsinneqarsinnaavoq.

Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.

Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq.

Akissarsianut atorfeqartitaanermullu tunngasutigut piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk