ALLAGARSIUTEQQITAQ AC-fuldmægtigi pinngortitaq pillugu ingerlatsinermik soqutigisalik

ALLAGARSIUTEQQITAQ Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Pinngortitamut Immikkoortortaqarfimmi AC-fuldmægtigi pinngortitaq pillugu ingerlatsinermik soqutigisalik

Ulloq atorfiniffissaq: 1. oktober 2024 imaluunniit isumaqatigiissuteqarnikkut piaartumik.

Pinngortitaq pillugu ingerlatsineq nuannaraajuk? Ilulissat Kangiani UNESCO-qarfimmi ingerlatsinermut, kiisalu Kalaallit Nunaanni uumasut ulorianartorsiortut nunat tamalaat akornanni niuerutigineqarnerinut CITES-imut isumaqatigiissut naapertorlugu ingerlatsinermut akisussaasuunissaq kajumissuseqarfigaajuk?

Suliassatit

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Pinngortitamut Immikkoortortaqarfimmi suleqataassaatit. Ilulissat Kangiani UNESCO-qarfimmi ingerlatsinermut pingaarnertut akisussaasuussaatit. Ilulissat Kangiat pinngortitaavoq asseqanngitsoq, aammalu issittumi pinngortitami suliassaqarfiit, UNESCO-p nunarsuarmi kingornussanut allattuiffimmi allassimasunut ikittunut ilaavoq. Ilulissat Kangiani ingerlatsinermi illersuinerup, ineriartortitsinerup ilisimasanillu annertusaanerup akornanni ingerlatsinermi oqimaaqatigiissitsiniarluni eqqarsaatigisassat amerlapput.

Tamatuma ilaatigut nassatarisaanik suliassaapput:

• Ilulissat Kangiani UNESCO-qarfimmut siulittaasoqarneq aqutsisoqatigiinnilu ataqatigiissaarisuuneq.
• Avannaata Kommunia aqutsisoqatigiillu allat qanittumik suleqatigalugit sumiiffimmik ineriartortitsineq ingerlatsinermullu pilersaarummik isumaginninneq, taakkununngalu iliuusissanut suliniutit siuariartortinneqarnissaannik qulakkeerineq, ukiumoortumik naliliisarneq, kiisalu ukiumi tulliuttumi sammisassanik tulleriiaarisarneq aallartitsisarnerlu ilaatinneqarput.
• Ilulissat Kangiani suliassatut qinnutigineqartunik, Ilulissat Kangiani UNESCO-qarfimmi eqqissisimatitsinermut nalunaarut pioreersoq naapertorlugu akuersissutinik imaluunniit immikkut ittumik akuersissutinik pisariaqartitsiviusunik suliaqarneq.
• Ilulissat Kangiani UNESCO-qarfimmi eqqissisimatitsinermut nalunaarutip nutarterneqarluni ingerlanneqartup inaarsarneqarnera.

Akisussaaffeqarfik alla pingaarutilik suleqativit ilaat suleqatigalugu isumagisussaavat, tassaavorlu uumasut naasullu ulorianartorsiortut nunani tamalaani niuerutigineqarnerinut Washingtonimi isumaqatigiissut (CITES) naapertorlugu ingerlatsineq. Ataatsimoorlusi ingerlatsinermi suliassat, kiisalu isumaginninnermik pitsanngorsaaniarluni ineriartortitsinerit akisussaaffigissavasi.

• Pigisanut CITES-imut ilaasunut, soorlu nuunnermi pequtinik nassiussinermut atatillugu akuersissusiortarneq.
• Innuttaasut saaffiginnissutaannut akissuteqartarneq.
• Kalaallit Nunaanni tuniniaavinnik, pigisanik CITES-imut ilaasunik takornarianut tuniniagaqartunik suleqateqarneq oqaloqateqarnerlu.
• Pigisanik arsaarinnissutaasunik, tamatumunngalu atatillugu toqqorterisarnermik isumaginninneq.

Ilulissat Kangiani UNESCO-qarfiup CITES-illu saniatigut suliassanut naalakkersuinikkut sammisat apeqqutaassapput, aammalu ingerlatsinermut suliassat ineriartortitsinerillu akornanni assigiinngitsuussallutik:

• Naalakkersuinikkut tulleriiaarinerit anguniakkallu naammassineqarnissaannut ikiuunneq
• Pinngortitami inatsit aammalu Kalaallit Nunaanni Uumassusillit Assigiinngissitaarnerinut Periusissiaq 2030 naapertorlugit tamanut tunngasunik ingerlatsineq
• Immikkoortortaqarfiup oqartussaaffiisa iluini tusarniaanernik akissuteqartarneq
• Isummernissamut tunngavissianik, inassuteqaatinik allakkianillu suliaqarneq
• Immikkoortortaqarfimmiit najoqqutassiarineqartut, Naalakkersuisoqarfimmi Pisortamut aamma Naalakkersuisumut saqqummiunneqartussat pitsaassusiinik qulakkeerisarneq

Atorfik assigiinngitsorpassuarnik sammivilik matumani pineqarpoq, tassanilu immikkoortortaqarfiit akimorlugit ikioqatigiittarpugut. Killiliussat sukannersut aallaavigalugit sulisarnissat naatsorsuutigisariaqarpat, taamaattumillu sulianik paasisimaarinnilluarsinnaassuseqassaatit aammalu suliassatit ingerlaavartumik tulleriiaartassavatit.

Piginnaaneqarfiit

Issittumi pinngortitaq pillugu aqutsinermut soqutiginnittuussaatit aamma piginnaasatigut sumiiffik pillugu ilisimasaqassaatit. Unamminartut kajungilersittarpaatsit, tatiginartuuvutit, ataqatigiissitsisinnaavutit suliatillu paasisimaarisinnaallugit. Siulliuniarsinnaanissat suliassannillu naammassinnissinnaanissat tulluusimaarutigisinnaassavatit, aammalu sapinngisamik pitsaanerpaamik aqutsisunut tapertaasinnaassallutit.

Suliavit naammassisavit naalakkersuinikkut eqqumaffigineqarneri iluarisimaartarpatit, aammalu aaqqissuussaanermi naalakkersuinikkut aqunneqartumi sulinermik misilittagaqaruit iluaqutaassaaq. Inunnit sivisuumik sulinermik inuunermillu misilittagaqarsimasunit qinnuteqaatinik tigusinissarput iluarisimaartorujussuussavarput.

Allakkiat suliarineqarsimasut pitsaassusiinik qulakkeerisarneq, aammalu ilaatigut kommuninut tuniniaavinnullu attaveqartarneq suliassanni pingaarutilittut inissisimammata, ileqqorissaarlutit kiffartuussinermillu pingaartitsillutit pissusilersorsinnaanissat pisariaqarpoq. Oqaasiliorsinnaaneq attaveqaqateqarsinnaanerlu, aammalu iluarsisassanik pisariusunik oqaatsit ersarissut atorlugit saqqummiussisinnaanissat pikkoriffigissavatit.

Tamatuma saniatigut naatsorsuutigaarput:

• ilinniagartuutut ingerlaqqiffiusumik pinngortitamut ilisimatuussutsikkut ilinniagaqarsimassasutit, imaluunniit suliatigut pinngortitalerinermut attuumassutilimmik allamik, ajornanngippat uumasulerituutut ilinniakkamik tunuliaqutaqarnissat iluassaqaaq
• pisortat namminersortulluunniit aaqqissuussineranni pinngortitami ingerlatsinermik misilittagaqassasutit
• naalakkersuinikkut aalajangiisarnermi suliat ingerlasarnerinik paasisimaarinnissasutit misilittagaqassasutillu, ajornanngippat atorfimmit assingusumit
• allakkianik, isummernissamut tunngavissianik assigisaannillu – amerlanertigut piffissap sivikitsup iluani – allannissamik nuannarisaqassasutit
• oqaasiliullaqqissuseqassasutit allassinnaassuseqarluassasutillu
• oqaatsitigut piginnaaneqarluassasutit – ajornanngippat kalaallisut, danskisut tuluttullu
• inuiaqatigiit kalaallit aamma kulturiallu pillugit ilisimasaqassasutit
• suliffeqarfimmut arlalinnik kultureqarfiusuusumut paasinnittuussasutit
• namminersorlutit sulisinnaassasutit nammineerlutillu suliniuteqarsinnaassasutit
• suliassanik aaqqiinissamut akisussaaffimmik misigisimaninnik sakkortuumik takutitsisinnaassasutit
• ulluinnaat ulapaarfiusut, taarseraattunik sammisaqarfiusut suliassaqarfiusullu nuannarissagitit
• aaqqissuussamik sulisassasutit aammalu killiliussat malinnissaannut qulakkeerinissamut piginnaaneqarluassasutit
• angusaqarnissamut piginnaaneqarluassasutit
• isumalluartuussasutit aamma suliffiup nuannersumik silaannaqarnissaanut akuussaatit
• inuit assigiinngitsorpassuit assigiinngitsunillu suliallit suleqatigisinnaassagitit

Kikkuuvugut?

Suliffeqarfimmut nuannersunik suleqateqarfiusumut, pingaartorsiorfiunngitsumik pissuseqarfiusumut aammalu toqqissisimanermik ineriartornermillu salliutitsiviusumut ilaalissaatit.

Naalakkersuisoqarfimmi ilisarnaatigaarput, suliaqartuuvugut, angusaqarusuttut akisussaaffimmillu tiguserusuttut. Naalakkersuisoqarfimmi ataasiuvugut, assigiinngissuserput nakooqqutigaarput. Taamaammat avatangiisimi pineqartumi suleqataasinnaanissat tapersersuinissamilu imminut takusinnaassaatit.

Suliffeqarfimmi maannarpiaq sulisut 45-t missaaniipput, taakkulu immikkoortortaqarfinnut sisamanut agguarsimapput (Imminut Pilersornermut, Aningaasaqarnermut Suliffeqarnermullu Immikkoortortaqarfik, Pinngortitamut Immikkoortortaqarfik, Avatangiisinut Upalungaarsimanermullu Immikkoortortaqarfik aamma Nunalerinermut, Nukissiornermut Silallu Pissusianut Immikkoortortaqarfik). Aamma Aatsitassaqarnermut Avatangiisinut Aqutsisoqarfik, Pinngortitaleriffik, Asiaq (Greenland Survey) aamma Nukissiorfiit (Innaallagissiornermut Oqartussat) Naalakkersuisoqarfimmut immikkoortortaqarfiupput. Kalaallit Nunaanni suliassat inuiaqatigiinnut kivitseqataasussat pingaaruteqartut suliarisarpagut.

Annertunerusunik paasisaqarusuppit?

Atorfik pillugu paasissutissanik amerlanerusunik pissarserusunnermi immikkoortortaqarfimmi pisortaq Mettelise Fritz Hansen, tlf. +299 34 52 57-imut, e-mail: mtha@nanoq.gl saaffigalugu pissarsisoqarsinnaavoq.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Naalakkersuisut pillugu

Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.

Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.

Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job

Qinnuteqaat nassiuguk