Allagarsiuteqqitaq - SILA-mi Uumassusilerinermi Bachelorinngorniarfimmi ilinniartitsoq

Ilisimatusarfimmi ilinniakkami nutaami SILA-mi Uumassusilerinermi Bachelorinngorniarfimmi suleqatigiinnut piumassuseqarluartunut qanimullu suleqatigiilluartartunut ilaarusuppit? Atorfiup sukkanerpaamik isumaqatigiissutigineqartorluunniit naapertorlugu inuttalerneqarnissaa kissaatigineqarpoq.

Immikkoortortaq SILA pillugu

2025-mi februaariugaa uumassusilerisunngorniat siulliit ilinniakkamik SILA-mik aallartitsipput. Ullumikkut ilinniakkamut atassuteqartuupput uumassusilerisutut atorfillit pingasut, professorit ikiortaasut marluk ilinniartullu aqqanillit. 2026-mi februaarip aallaqqaataani ilinniartut nutaat aqqaneq-marluk aallartissangatinneqarput. Suleqatissarsiorpugut piumassuseqarluartumik fagillu ukua ilaannik ataatsimik arlalinnilluunniit immikkut soqutigisaqartumik: silap pissusia, silap pissusia pillugu politikki, miluumasunik, naasunik ilisimatusarnermik aamma/imaluunniit tappiorannartulerinik nakkutilliineq.

Ilinniagaq nutaarluinnaammat ukiuni siullerni inerisaanermik suliaqangaatsiartoqassaaq immikkoortortamit suleqatigiissutigineqartussanik, suleqatigiinnullu ilaasut tamarmik immikkut pikkorissarnermut fagimulluunniit ataatsimut arlalinnulluunniit pingaarnertut akisussaaffeqassapput.

Suliassat:

• Ilinniartitsineq

• SILA-mi sulisut allat suleqatigalugit ilinniartitsinissanik ataqatigiissaarineq

• Pikkorissartitsinissanut pilersaarusiorneq

• Ilinniartunik siunnersuineq

• Ilinniakkamik SILA-mik immikkoortortamillu inerisaaniarluni ineriartortitsiniarlunilu allaffissornikkut suliassat assigiinngitsut

Qinnuteqartumut piumasaqaatit:

• Fagimi tulluartumi kandidatinngorsimaneq ph.d.-nngorsimanerluunniit

• Kalaallit Nunaat pillugu aamma Kalaallit Nunaaanni ilinniagaqarnermik ilisimasaqarluarneq

• Ilinniartitsinermi misilittagaqarneq

• Pinngortitamik ilisimatusarnermi ilinniakkamut pullavimmik kalaallisut eqqarsartaaseqarnermik aallaaveqartumik immikkorluinnaq ittumik ineriartortitseqataassaatit, aamma Kalaallit Nunaanni periarfissat nukittuffiillu ilinniakkap kalaallit inuusuttortaannut Kalaallillu Nunaanni inuussutissarsiornermut naatsorsuussap iluatsilluarnissaanut iluaqutaasinnaasut tappiffigissavatit

• Immikkoortortami SILA-mi aamma Peqqissaanermik Pinngortitamillu Ilisimatusarfimmi sulinermi ilinniarnermilu kulturimik pilersitseqataarusupputit

• Kalaallisut oqalussinnaavutit, imaluunniit ilinniakkami atugassannik tunngaviulluinnartumik kalaallisut piginnaasaqalersinnaassaatit

• Silap pissusiata allanngoriartorneranut, nunap inoqqaavinut aqutsinermullu atatillugu misilittagaqarneq iluaqutaassaaq

Ilinnut uku neqeroorutigisinnaavavut:

• Sullivimmi avatangiisit pitsaasut sulisut ilinniartullu ilorrisimaarsinnaanissaannik pingaartitsiffiusut

• Suleqatit piumassuseqarluartut qanimut suleqatigiittartut aamma siunersioqatigiinnissamik tapersersoqatigiinnissamillu periarfissaqartitsisut

• Suliffik sunniuteqarluarnissamut periarfissiisoq

• Suliatsigut perorsaariaatsitigullu ineriartornissamut periarfissat

• Ilinniartut pikkorilluinnarlutillu piumassuseqarluartut

Institutti pillugu

Ilinniakkap SILA-p saniatigut Peqqissaanermik Pinngortitamillu Ilisimatusarfimmiipput peqqissaanermi bachelorinngorniarfik, napparsimasunik sullissinermi siunnersortinngorniarfik pikkorissarfippaaluillu allat. Ilisimatusarfimmi tamatumaniipportaaq Kalaallit Nunaanni Peqqissusermik Ilisimatusarfik sulilluarfiullunilu ineriartorluarfiusoq. Ilisimatusarfimmi tamatumani atorfillit, professorit ikiortit, lektorit ilisimatusartullu 7-10-upput. Ilisimatusarfimmi tamarmi massakkorpiaq bachelorinngorniat 45-50-iupput ph.d.-nngorniallu 10-12-iullutik. Ilisimatusarnermik suliaqarfik tamanna ilisimasanik tapertariissitsiffiuvoq aammalu peqqissutsip pinngortitallu ataqatigiinnerat aallaavigineqarluni.

Attavigisassat/ paasissutissat:

Atorfik pillugu sukumiinerusunik paasisaqarusukkuit, Ilisimatusarfiup immikkoortortaqarfimmi pisortaq Aviâja Lyberth Hauptmann, oqarasuaat uunga +299 34 73 33 attavigineqarsinnaavoq.

Ilisimatusarfik pillugu paasisaqarnerorusukkuit uani paasisaqarnerusinnaavutit www.uni.gl

Qinnuteqaat.

Qinnuteqaammut uku ilaassapput:

Qinnuteqaammi fagit qinnuteqartup ilinniartitsissutigerusutai SILA-mi pikkorissartitsissutissat SILA-mik ilinniakkap aaqqissuunneqarnerata allaatigineqarneranut (sila studieordning) naapertuuttut erseqqissumik taaneqassapput.

Bilag 1: Curriculum Vitae

Bilag 2: Bachelorinngorsimanermut kandidatinngorsimanermullu immaqalu ph.d.-nngorsimanermut uppernarsaatit.

Bilag 3: Bilagit allat

Naliliisarneq atorfinitsitsisarnerlu, adjunktinut lektorinullu atorfinnut

Qinnuteqartut nalilerneqarnerat malittarisassat atuuttut naapertorlugit naliliisartunit ilisimasalinnit ingerlanneqartarpoq. Qinnuteqartut piffissap qinnuteqarfiusup naareernerani naliliisartut inuttalersornerinik ilisimatinneqassapput. Qinnuteqaatit takkussuuttut naliliisartoqatigiinnit misissorneqassapput, tamanna pereerpat taakkua Instituttimi aqutsisumut innersuusiussallutik.

Studieadjunktitut atorfeqartitaaneq ukiunik 6-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorit naliliinerat tunngavigalugu studielektoritut atorfittut aalajangersimasunngorlugu atorfinitsinneqarsinnaavoq.

Studielektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat.

Adjunktitut atorfeqartitaaneq nalinginnaasumik ukiunik 4-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Tamatuma kingorna lektorip naliliinera tunngavigalugu lektoritut atorfittut aalajangersimasunngorlugu atorfinitsinneqarsinnaavoq.

Lektoritut atorfinitsitaaneq pisinnaavoq atorfininnissaq sioqqullugu naliliilluartoqarpat imaluunniit qinnuteqartoq piffimmi allami sammisami lektorimit nalilerneqarsimappat. 

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut 13-upput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik

• Inuiaqatigiilerinermik, Aningaasaqarnermik Tusagassiornermillu Ilisimatusarfik

• Kulturimik, Oqaatsinik Oqaluttuarisaanermillu Ilisimatusarfik

• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilinniarfissuarmi Ilimmarfimmilu immikkoortortaqarpoq. Immikkoortortat faginik ingerlatsiviusunik qanimut suleqateqartarput soorlu namminneq akunnerminni aamma taamaattartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit aqutsineq, Siulersuisuniik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup ilutaanik sanaartornermik nakkutiginninneq aamma ingerlataraa. 

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.

Qinnuteqaat nassiuguk