Angerlarsimaffimmut Pilutamut Isumaginninnermi- Peqqissaanermiluunniit ikiortitut ilinniagaqartumik sulisussarsiorneq

Atorfininneq: Majijp aallaqqaataa imaluunniit isumaqatigiissuteqarnikkut

Nivissanut inuusuttunut inersimasunik toqqissisimanartunik avatangiiseqarnissamik pisariaqartitsisunut allanngueqataarusuppit?

Sisimiuni Angerlarsimaffimmi Pilutami ilinniarsimasunik ilinniarsimanngitsunillu suleqatissarsiorpugut attaveqalernissamut suliaqarnissamik pimoorussilluni suleqataarusuttunik, aamma aalaakkaassusermik, qanilaarluni kiisalu nivissanut 11-niit 17-inut ukiulinnut nuannersumik misigisaqartitsinissamut suliniuteqaqataarusuttunik.

Uagut pilluta

Pilutaq nuna tamakkerlugu ulloq unnuarlu angerlarsimaffiuvoq Isumaginninnermut, Ilaqutariinnermut aammalu Inatsisinik Atuutsitsinermut Naalakkersuisoqarfiup ataaniittoq.

Niviarsiaraatigut nunatsinni sumiiffinni assigiinngitsuneersuupput assigiinngitsutigullu sumiginnagaanermik misigisimasaqartuullutik. Taamaammat inersimasunik aaqqissugaanermik, qanilaarnermik kissalaarnermillu tunisinnaasunik, ilungersunartorsiorfimmi tapersersuisinnaassuseqartunik pisariaqartitsisuupput.

Perorsaanikkut paasinninneq, nukissanik samminninneq naligiimmillu pinninneq sullitanut periuseraarput, pingaartipparput suliat tungaatigut inuppalaarnermillu qitiutitsineq.

Pingaartipparput nivissat ulluinnarni angerlarsimaffippalaartumiinnissaat, atuartarlutik, sunngiffimmi sammisaqartarlutik illoqarfimmilu inoqasersortarlutik.

Sapaatip akunnerata naanerini ferianilu illuaqqiartarpugut, piniariarluta, sisorariarluta imaluunniit nunaqarfinni asiartarluta, tassanilu niviarsiaqqat sullinnerini ataatsimoorneq asilu pingaaruteqartumik inissisimasuullutik.

Suliassatit

• Ulluinnaat toqqissisimanartut, aaqqissugaasut isumassuiffiusullu pilersitseqataaffigalugit

• Nivissat imminnut tatigilernissaanni, akisussaassuseqalernissaanni namminersorsinnaalernissaannilu tapersersorlugit

• Sammisassani pilersaarusioqataallutillu peqataallutit, suleqatit najugaqartullu angalaaqatigisarlugit

• Perorsaasut, aqutsisut suleqatillu allat akimut suleqatigalugit

• Najugaqartumut ataatsimut attaveqaatitut inissisimassaatit

• Piffissani nikerartuni sulisassaatit - ullaakkut, unnukkut aammalu unnuarsiortarlutit

Naatsorsuutigaarput illit

• Isumaginninnermi- Peqqissaanermiluunniit ikiortitut ilinniagaqartutit imaluunniit naleqquttumik tunuliaquteqartutit

• Meeqqanik inuusuttunillu angerlarsimaffiup avataanut inissinneqarsimasunik sullissinermik misilittagaqartutit imaluunniit soqutigisaqartuusutit

• Aalaakkaasutit, tatiginassuseqartutit akisussaassuseqartuusutillu

• Aaqqissuisinnaassuseqartutit ersarissuliorlutillu, niviarsiaqqanulli qanilaassuseqarlutit qiimasaarlutillu naaperiaasinnaallutit

• Ulluinnarni ataatsimuussuseqarluni, suleqatigiilluni sulianullu samminnittumik sulinissamik nuannarisaqartutit

• Asiarnissanut, angalaarnernut pinngortitamilu suliassaqarnissanut ammasuusutit

Neqeoorutigaagut

• Suliffik allanngueqataaffiginissamik periarfissalik, isumaqarluartoq allanngorartorlu

• Suliffimmi takuneqassaatit, tusaaneqassaatit naleqartinneqarlutillu

• Suliatigut avitseqatigiinneq, oqilisaassilluni oqaloqatigiinnerit ilinniartitsinerlu

• Suleqatigiinni nersorinnilluni ataatsimuussuseqarneq, tunniusimaneq tapersersueqatigiinnerlu

• Nivissat ulluinnaannut pitsanngorsaataasinnaasunik isummanik suliniutinillu tunniussaqaqataanissamut periarfissaqassaaq

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Suliamut tunngasut

Piffissaq suliffiusoq: Sapaatip akunneranut nalunaaquttap akunneri 40-t

Aqutsisoq qaninneq: Pilutami immikkoortortami aqutsisoq

Pineqaatissinneqarsimannginnermut meeqqanillu pinerliisimannginnermut allagartat: Inatsisit naapertorlugit atorfininnginnermi pissarsiarineqassaput

Qinnuteqarnissamut piffissaliussaq: April 30-iat 2026

Attaveqaat: Miacecilia Munch Ingemann

•  📧 E-mail: forst@pilutaq.gl

• 📞 Oqarasuaat: +299 58 03 32

Ingerlaavartumik oqaloqatiginninnerit ingerlattassavagut, atorfinitsitsiniarnerlu naleqquttumik nassaarnermi taamaatinneqassalluni.

Maani upperaarput meeqqat inuusuttullu tamarmik ineriartorsinnaasut inersimasunik ersarissuliorsinnaassusilinnik uummatigissunillu naapitsigaangata. Tamanna ilinni ilisarigukku erinigaarput tusarfigissallutit.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.