Aningaaserisoq imaluunniit AC-Fuldmægtig misissueqqissaarillaqqittoq Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfimmut

Ilaqutariinnut Nunamullu Namminermut Naalakkersuisoqarfimmut

Aningaaserinermik piginnaasatit isumaginninnermut immikkoortortaqarfiup ineriartortinneranut sunniuteqartaaffigitikkusuppigit? Taava illiuvoq Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfiup pisariaqartitaa.

Aningaaserisumik suliamut tunniusimasumik, isumaginninnermut suliassaqarfimmi aaqqissuusseqqinnissanik aningaasaqarnikkut ineriartornermut ikorfartuinermullu qitiusutut inissisimasussamik sulisussarsiorpugut.

Atorfik pillugu

Naalakkersuisoqarfimmi naalakkersuinikkut aalajangiisarnerit qanimut qitiusumillu inissisimaffigissavatit. Suliassat assigiinngisitaarput misissueqqissaarnerup, aqutsinerup ineriartornerullu akornanni siammasissumik tunngassuteqarlutik – aamma suliassanut tunngatillugu illit nammineq ilanngussinissannut sunniuteqarnissamullu periarfissaqassaatit.

Suliassat naalakkersuisoqarfiup iluani aamma qitiusumik allaffeqarfimmi suliassaqarfiit akimorlugit ilanngullugu ingerlanneqartarput, pingaartumik isumaginninnikkut naalakkersuinermut aningaasaqarnikkullu ajornartorsiutinut attuumassuteqartarlutik.

Nalinginnaasumik misissueqqissaarnermik annertuumik ingerlatsinermullu minnerusumik suliassaqartarpoq, namminerlu isumassarsiat aallartitsinerillu periarfissaqarluarlutik.

Ilaatigut suliassarivatit:

• Isumaginninnikkut ikiorsiissutit pillugit aaqqissuusseqqinnissanut ataqatigiissaarisoq, tassunga ilanngullugit pisortanit ikiorsiissutit, ineqarnermut tapit soraarnerussutisiallu

• Iliuuseqarnernut kingunerisassanullu nutaanut, soorlu inatsisissatut siunnersuutinut, missingersuutinik misissueqqissaarinernut ilusiliinermilu allattukkanut, aningaasaqarnermik misissueqqissaarinerit naatsorsuinerillu

• Naalakkersuisumik sullissineq, tassunga ilanngullugit aningaasanut inatsit pillugu isumaqatiginninniarnernut ilisimatitsissutitut allattukkat, isummernissamut tunngavissiat atortussallu

• Naalakkersuisoqarfiup suliassaqarfiinut aningaasanut inatsimmut ilassutissat

• Missingersuutinik suliaqarneq malitseqartitsinerlu aningaasaqarnermillu aqutsineq

• Inatsisiliornissamut piareersaaneq

• Aaqqissuusseqqinnerit periusissiallu pillugit piviusunngortitsineq, naliliineq malitseqartitsinerlu

• Inatsisartunut nassuiaatinik suliaqarneq pitsaassusaannillu qulakkeerineq

• Naalakkersuisoq sinnerlugu akissuteqaatinik, tusarniaanermut akissutinik allakkanillu suliaqarneq

• Suleqatigiissitat akimorlugit ataqatigiissaarineq peqataanerlu

• Isumaginninnermut suliasaqarfimmi kommunit utertitsisarnerannik malitseqartitsineq

Naatsorsuutigaarput:

• Cand.oecon., cand.scient.pol., cand.polit. kandidatitut imaluunniit aningaasaqarnermut attuumassutilimmik allamik ilinniagaqartutit

• Atorfimmut assingusumik suliassaqarfimmulluunniit attuumassuteqartumik misilittagaqartutit

• Naalakkersuinikkut aqunneqartumik aaqqissuussami sulinissamut soqutigisaqartutit

• Attaveqaqatigiinnermut piginnaasaqarluartutit – allakkatigut oqaatsitigullu

• Aningaasaqarnermut paasissutissanik misissueqqissaarisinnaasutit suliaqarsinnaasutillu

• Aningaasaqarnermut missingersuutinullu aqutsinermik misilittagaqartutit soqutigisaqartutiluunniit

• Nammineq akissussaassuseqarnissamut piginnaasaqartutit soqutiginnittutillu

• Suliassaqarfiit akimorlugit suleqatigiinnermi tamakkiisumillu aaqqiissuteqarnermi sulisinnaasutit

• Suleqatikkuminartutit, tunniusimasutit pitsaasumillu eqqarsartariaaseqartutit

Nunatsinni inuiaqatigiinnut pissutsinik piorsarsimassutsimillu ilisimasaqarneq iluaqutaassaaq piumasaqaataanngilarli. Marluinnik oqaaseqarneq ilanngullugu iluaqutaassaaq piumasaqaataananili.

Immikkoortortaqarfik pillugu

Isumaginninnermut Ilaqutariinnullu Immikkoortortaqarfik ilaatigut suliamut naalakkersuinikkullu aalajangiinissamut tunngavissanik, periusissianik iliuusissanillu suliaqartussaavoq.

Immikkoortortaqarfik inersimasunut utoqqarnullu atugarliortut pillugit suliassaqarfiup ineriartortinneqarneranut pingaarnertut akisussaaffeqarpoq. Tamatuma saniatigut immikkoortortaqarfik inersimasunut ilaqutariinnullu ikiorsiissutinut akisussaaffeqarpoq.

Ingerlanernut tamanut ilannguttussaavutit – misissueqqaarnerit siullerniit aamma ilusiliinermut allattukkaniit suliap suliarineranut, piviusunngortitsinissamut naalakkersuinikkut aalajangiinermut kingornatigullu naliliinermut.

Tamatuma saniatigut immikkoortortaqarfik ingerlatsinermut nalinginnaasumut ilaavoq, tassunga ilanngullugit tusarniaanermut akissutinut, nassuiaatinut, naalakkersuinermik sullissinermut ilanngussaqarneq kiisalu isumaginninnermut suliassaqarfimmi ineriartortitsinermut malitseqartitsinermullu tunngasunik suliassat.

Naalakkersuisoqarfik pillugu

Isumaginninnermut, Suliffeqarnermut, Ilaqutariinnut Nunamullu Namminermut Naalakkersuisoqarfimmi sulisut 35-t missaanniippugut immikkoortortaqarfinnut makkununnga agguagaalluta Aqutsinermut Allattoqarfik, Isumaginninnermut Ilaqutariinnullu, Suliffeqarnermut aamma Nunamut Namminermut kiisalu Nakkutilliinermut Immikkoortortaqarfiit.

Suliassaqarfittut akisussaaffik akimorlugu naalakkersuinikkut anguniakkat piviusunngortinnissaat pillugu sulivugut. Tassunga ilaatigut ilaatinneqarput Nunatsinni innuttaasunut atugarliortunut pissutsinik nukittorsaasussanik inatsisiliorneq, periusissiat aamma ineriartortitsinermut suliniutit.

Sulinermut ilaapput misissueqqissaarinerit, politikkimik ineriartortitsineq, naalakkersuisumik sullissineq, suliniutit suliassaqarfiillu akimorlugit ataqatigiissaarineq.

Suliamut piginnaasaqarneq, suleqatigiinneq sullivimmilu avatangiisit ineriartornermut, akisussaanermut isumassarsiatsialannullu inissaqartitsineq pingaartippagut. Atugarissaarneq ilikkagaqarnissamullu periarfissat pingaartitaraagut.

Naalakkersuinikkut aqunneqartumik aaqqissuussami sulisinnaassaatit, amerlanertigut sukkasuumik ingerlaffiusumi, aamma suliassat ineriartortitsinermut suliniutit angisuut pilersuinerillu piaartumik naammassisassat akornanni nikerarlutik.

Piorsarsimassuseq sullivimmilu avatangiisit

Suliamut piginnaasaqarneq, ineriartorneq nutaamillu eqqarsarneq ingiaqatigiissillugit anguniagaralugit piorsarsimassuseqarnissaq pilersinniarlugu sulivugut aamma suliassatta aaqqiiviginissaannut sulisut tamarmik ilanngussaqartussaallutik.

Taamaattumik suleqatigiinnermik sammivilimmik avatangiiseqarlutit sulisinnaanerit pingaartuuvoq, tunniusimaneq, qiimaneq siunersioqatigiinnerlu pissusissamisoortumik ilaatillugit. Atugarissaarneq suliamullu piginnaasanik ineriartortitsineq pingaartinneqarput.

Naalakkersuinikkut aqunneqartumik aaqqissuussami sulisinnaassaatit, amerlanertigut sukkasuumik ingerlaffiusumi aamma piffissaliussani sivikitsuinnaasinnaasuni. Peqatigalugu pingaaruteqarpoq – allakkatigut oqaatsitigullu – ataqatigiinnerit paasiuminaassinnaasut pillugit ersarissumik eqqortumillu siammarterisinnaasutit.

Annertunerusumik paasissutissat
Atorfik pillugu paasisaqarnissanik kissaateqaruit, immikkoortortaqarfimmi pisortaq Gulúnguak Chemnitz emailikkut gulc@nanoq.gl attaveqarfiginissaanut tikilluaqqusaavutit.

Nunarput aamma Namminersorlutik Oqartussat pillugit annertunerusumik paasissutissanik kissaateqaruit, http://naalakkersuisut.gl Suliffissat aqqutigalugu paasisaqarnerusinnaavutit.

Qinnuteqaat
Qinnuteqarnissamut killiliussaq tassaavoq 27.08.2026 nal. 12.00. Qinnuteqaat, CV, ilinniarsimanermut pikkorissarnermullu uppernarsaatit kiisalu uppernarsaatit attuumassuteqartut allat ”Qinnuteqaat nassiuguk” toorlugu nassiutikkit. E-mail aqqutigalugu qinnuteqaatinik tigooraaneq ajorpugut.

Akissarsianut atorfinitsitsinissamullu tunngasut
Akissarsianut atorfinitsitsinissamullu atugassarititat, tassunga ilanngullugit atorfininnermut soraarnermullu angalanissamut nuunnermullu, Namminersorlutik Oqartussat aamma kattuffiup isumaqatiginninniarsinnaatitaasup pineqartup akornanni isumaqatigiissut atuuttoq naapertorlugu atorfininnermi pisinnaatitaaffik.

Atorfik Fuldmægtigitut imaluunniit Immikkut Siunnersortitut inuttalerlugu aallaavigineqassaaq. Qaffasinnerusumik ilinniagaqaruit, piginnaasat aallaavigalugit Siunnersortinut Pisortatut atorfinittoqarnissaanut aamma periarfissaavoq.

Ineqarneq
Atorfimmut inissaqartitsisoqanngilaq. Qinnuteqartoq Namminersorlutik Oqartussani atorfeqarneq aqqutigalugu sulinermut inissiaqareerpat, inissiamut innersuunneqarneq pillugu pisinnaatitaaffik attatiinnarneqassaaq. Sulinermut inissiaq atorfeqarnermut tunngassuteqarpoq, atorfeqarnerullu naanerani qimanneqassalluni.