Campus Kujalleq pikkorissaanermik aqutsisussamik, immikkut takornarialerinermik ilisimasalimmik pissarsiorpoq

Campus Kujalleq pikkorissaanermik aqutsisussamik, immikkut takornarialerinermik ilisimasalimmik pissarsiorpoq

Pikkorissaanermik suliaqarnikut ineriartortitserusuppit? Siulersuinermik piginnaasaqarpit kiisalu takornarialerinikkut sunniuteqarnissamut piumassuseqarpit? Taava Campus Kujallermi pikkorissaanermik aqutsisutut naleqquttuusinnaavutit. Killilimmik atorfik ukiumut tiimit 1080-t missaani ingerlanneqartarnissaa naatsorsuutigineqarpoq, tassa suliffiusup nalingiinaasup 60%-anik naleqarluni.

Immikkut aaqqiisoqarnikkut atorfik ilivitsunngussaguni amigaataasut 704 tiimit, imaluunniit 39,46%-iusoq anguneqarsinnaavoq, qinnuteqatup piginnaasai aallaavigalugit Niuernermik Ilinniarfimmi atuartitsinermik imaluunniit praktikkernermut ataqatigiissaarisutut atorfinitsitsisoqarsinnaalluni.

Sulilernissamut ulluliussaq: 1. april 2026 imaluunniit isumaqatigiissuteqarnikkut.

Pikkorissaanermi aqutsisutut suliassatit

Pikkorissaanermik aqutsisutut suliassatut pingaarnertut akisussaaffigissavatit pilersaarusiorneq, ineriartortitsineq taavalu pikkorissaanernik ingerlatat naammassineqarnissaat. Campus Kujallermi immikkoortortat tamaasa suleqatigalugit, pingaartumillu Takornarialerinermik Ilinniarfik qanimut suleqatigalugu, takornariaqarnermik inatsisip piumasaqaataanik naapertuuttunik pikkorissaanissat ingerlanneqassapput. Illit qitiusumik ilinniartitsisut, aqutsisut kiisalu takornarialerinermik ingerlatsisut suleqatigiisinnissaat aallutissavatit.

Suliffiummi suliassat:

• Pikkorissaasartut aqutsisullu peqatigalugit, pikkorissartitsinerit pilersaarusiorlugit ineriartortinneri

• Pikkorissaatitsinermi imarisassat suliassallu naleqquttuunissaat pitsaasuunissaallu qulakkeerinninnerit

• Allaffissornikkut suliassat isumagisassat: peqataaniarlutik nalunaarsuinerit, pilersaarusiorneri kiisalu nalilersuinerit

• Aaqqissuussamik suliffeqarfiit, kommunit aamma peqatigiiffiit akornanni attaveqaatissanik pilersitsineq

• Pikkorissaanermik immikkoortortaqarfiup ineriartonissaanut aaqqissuussamik suliaqarnissamik peqataaneq.

• Campus Kujallermit pikkorissaanermut neqeroorutit nittarsaanneqarnissaat pillugu suliaqarnermut peqataaneq

Qinnuteqartumit naatsorsuutigaarput:

• Attuumassutilimmik ilinniagaqarsimanissat – takornarialerinermik misilittagaqarneq iluaqutaassaaq

• Pikkorissaanermik, ilinniartitsinermillu pilersaarusiornermik imaluunniit suliniutinik aqutsinermik misilittagaqarneq

• Aaqqiissuteqarsinnaaneq, suleqatigiilluarsinnaaneq aammalu aallussilluarsinnaaneq

• Kalaallisut, danskisut tuluttullu attaveqaqatigiinnermut piginnaaneqarluarneq

• Ilinniartitaanermut aaqqissuussinermut, inuiaqatigiinnut takornariaqarnermullu inatsisinik ilisimasaqarneq imaluunniit soqutigisaqarneq

Neqeroorutigaavut:

• Suliffik pissanganartoq assigiinngitsunillu suliaqarnermik ineriartortitsinissamillu periarfissiisoq

• Tunniusimasumik suleqatigiiffiusumik tunngavilinnik avatangiiseqarneq

• Inuttut aamma sulisutut ineriartornermik pitsaasumik periarfissiisoq

• Suleqatit aammalu suleqatigisartakkat pikkorissut suleqatigiilluarsinnaasut

• Suliffeqarfik soqutiginartoq Nunatta kujataani inissisimasoq

Campus Kujallermi Takornarialerinermik immikkoortortaqarfik Campus Kujallermut ilaavoq, tassani EUD aamma Ilinniarnertuunngorniarfik immikkoortortaqarlutik. Takornarialerinermik ilinniarfimmi suliffeqassaatit, kisianni pisariaqartitsisoqartillugu immikkoortortani allani suliassinneqartarsinnaavutit.

Qinnuteqarfissamut killigititaq:

Arfininngorneq 21. marts 2026 nal. 12:00. Atorfimmut oqaloqatiginninnerit ataavartumik ingerlanneqarsinnaapput.

Sulilernissaq: 1. april 2026 imaluunniit isumaqatigiissuteqarnikkut.

Paasissutissanik pisariaqartitsiguit attaveqarfigisinnaavat Ilinniarnermik pisortaq Aaju Simonsen e-mailikkut: as@cak.gl imaluunniit oqarasuaatikkut: +299 647886.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu malittarisassat qaqugukkulluunniit atuuttut naapertorlugit sulisunut inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumiklluunniit inigisani angisuunik uummasuuteqarsinnaaneq soorlu qimmeqarsinnaaneq qitsuuteqarsinnaanerluunniit periarfissaqanngilaq

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.

E-mail-ikkut qinnuteqaatinik tigusineq ajorpugut.