Dagplejeordning Qeqertarsuatsiaat sulisussarsiorpoq

Meeqqanik sullissinissamik soqutiginnittoq tunniusimasorlu Dagplejeordning Qeqertarsuatsiaat sulilersinnaasoq pissarsiariumaneqarpoq

Meeqqanut ulluunerani paaqqinnittarfimmik ineriartortitseqataarusuppit ingerlatsinermik attassinermut ineriartortitsinermullu suleqataarusuppit maani qanimut attaveqatigiinnerit pingaartinneqaqaat meeqqallu eqimattaqatigiillu ataasiakkaat ineriartornerat atugarissaarnerallu ukkatarineqarput. Taava suliffissaqartippatsigit.

Meeqqanut Atuarfeqarnermullu Ingerlatsiviup Meeqqat alapernaatsut, tatitussusillit, peqqissut nuannaartullu pilersinnissaat anguniagaraa. Anguniakkat anguneqarnissaannut illit aqutsisoq qanimut suleqatigalugu ukkatarinissai naatsorsuutigineqarpoq.

Meeeqqanut suli atulianngitsunut perorsaanikkut inerikkiartuutaasunik ulluunerani neqeroorutit pillugit inatsisartut inatsisaat nr.62 20.november 2023-imeersoq malillugu.

Suliffik qanoq ittoq neqeroorutigisinnaavarput:

·Uagutsinnut pingaaruteqarpoq meeqqat ulluinnarnik ataqatigiissunik toqqissimanartunillu misigisaqarnissaat pitsaasumik attaveqaateqarnissaat. Naatsorsuutigaarput illit paaqqinnittarfiup anguniagaanut sinaakkutissanik pilersitseqataassasutit taakkununngalu tapersersuissasutit.

·Suliffimmi ulluinnarni sammisanut sunniuteqarfigisinnaasat neqeroorutigaarput.

Qinnuteqartumut naatsorsuutigineqartut:

·Meeqqanut sullinnissamik misilittagaqartoq, sapinngisamik ulluunerani meeqqanik sullissinermi ikiortitut ilinniagalik

·Nammineq akisussaaffimmik tigusisinnaaneq, namminersorlutillu sulisinnaallutit

·Angajoqqaanut , aqutsisunnullu suleqatiginnikkumasoq

·Piareersimasuuvutit

∙Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli.

Meeqqanut ineriartuutaasunik sammisaqartitsinissamut pilersaarusiorsinnaaneq dagplejeordningen aqutsisoq suleqatigalugu.

Dagplejeordning pillugu:

Dagplejeordning Qeqertarsuatsiaat meeqqanut 16-inut 0 - 6 ukiullit tikillugit inissaqartitsinissamut naatsorsuutaavoq.

Atorfik ulloq naallugu atorfiuvoq, qaninnerpaatut attaveqaatigalugu: Meeqqeriveqarnermik Immikkoortortaqarfik.

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Atorfiniffissamut angalanissaq:

Atorfinitsinneqarnermilu, atorfeqarfissamut angalatinneqarnermut atasumik, pequtinik atorfeqarfissamut nutserinermi, atorfinittoq akiliunneqassaaq. Aammalu atorfimmiit tunuarnermi, angalanissamut/nutsernissamut akiliunneqarneq aatsaat pisinnaavoq, ukiuni pingasuni imaluunniit amerlanerusuni atorfeqareersimanerup kingorna.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Immikkoortortami aqutsisoq Ane Marie Lynge Møller, oqarasuaat +299 36 73 25 imaluunniit e-mail: anmm@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 484-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: juunip 4.-at, 2025

Atorfik una qinnuteqarfigiuk