HR siunnersorti - Sisimiut

Sulisoqarnermut tunngatillugu misilittagaqaruit sulisoqarnermut allaffissorneq, ineriartortitsineq siunnersuinerlu nuannarigukkit periarfissaq una ilinnuusinnaavoq.

INI Sisimiuni qullersaqarfitsinni sulisoqarnermut siunnersortitut atorfimmik neqerooruteqarpoq.

Sulisoqarnermut immikkoortortaqarfimmi akissarsianut sulisoqarnermut allaffissornermik, atorfinitsitsinermik, sulinermi atugassarititaasunik, sulilernermut atatillugu angalanernik, sulisunut politikkimik, piginnaasaqarnerulernissamik suliassanillu allarpassuarnik pissanganartunik suliaqartarpugut.

Ulluinnarni sulisoqarnermut siunnersorti Sisimiuni Sulisoqarnermut Attaveqaqatigiinnermullu immikkoortortaqarfimmi suleqatit pingasut Nuummilu suleqatit marluk peqatigalugit sulissaaq.

INI-mi naleqartitat sisamat uku sulinitsinni tunngavigisarpavut:

• Akisussaaneq

• Ataqqinninneq

• Pimoorussineq

• Atorfimmi pikkorissuseq

Sulisunut tunngasut ulluinnarnilu ingerlatsineq pingaarnertut suliassarissavatit. Akisussaaffigisassavit ilaat tassaapput:

• Sulisussarsiorneq, ilaatigut atorfinnik inuttassarsiuussineq

• Sulisut pillugit suliassat, ilaatigut atorfinitsitsinermut allakkanik, mianersoqqussutinik, soraarnissamut allakkanik, sulinermik uppernarsaammik il.il. suliaqarneq

• Sulisunut politikkimut il.il. tunngatillugu sulisunik siunnersuineq

• Preboardingimik onboardingimillu pilersaarusiorlunilu piviusunngortitsineq

• Sulisut siulersuisullu angalanissaannut, ataatsimiinnernut pikkorissartitsinernullu ataqatigiissaaralunilu bilitsinik inniminniineq

• TNI-mi AU-milu ilinniartut suliffimmik sungiusarnissaannik aaqqissuussineq

• TNI-mi AU-milu ilinniartunut attaveqaataaneq

• Piginnaaneqassutsinik pisariaqartitsineq naapertorlugu nalilersuineq, aqutsisut pineqartut suleqatigalugit

• Pikkorissartitsinissanik pilersaarusiorneq aaqqissuussinerlu

• Pikkorissartitsinermut/ilinniartitsinermut aningaasartuutit naatsorsornissaat

• Feeriarnerup nalaani sulinngiffeqarnermilu akissarsialerineq

• Sulisoqarnermut Attaveqaqatigiinnermullu Immikkoortortami ineriartortitsinermut tunngasut

• Piffissap ilaani suliassat

Suliassaq suugaluarpalluunniit pimoorussineq

• HR/TNI/AU-mi siunnersortitut imaluunniit bacheloritut ilinniagaqarsimavutit

• Sulisoqarnermut allaffissorneq, sulisunut inatsisit aamma piginnaanngorsaanermik ineriartortitsineq akissarsianillu aaqqissuussineq pillugit misilittagaqarneq ilisimasaqarnerlu.

• Oqalunnermi allakkanilu kalaallisut qallunaatullu oqalussinnaallutit oqaatsillu atorlugit paasiuminartumik oqaatiginnissinnaavutit

• Allannguinissamut piumassuseqarlutillu suliniuteqarusussuseqarputit

• Suliffeqarfiup iluani avataanilu pitsaasumik sullissinissat pingaartippat

• Aningaasaqarnermut tunngasunik kisitsisinillu atuillaqqipputit

• Inatsisit ilisimasaqarluarfigaatit

• IT-mut atortut ilisimalluarpatit

• Aaqqiissutissanik nassaallaqqissuuvutit, akisussaaffeqarlutillu ataqatigiissaarillaqqissuullutit

• suliamut pikkorinnermik pingaartitsivutit

Suliffik pilerinartoq

Suliffiup kajuminnartuunissaa sulissutigiuarparput, aamma immikkut ittumik sulinngiffeqarsinnaatitaanermik, timersornermut tapiissuteqarsinnaanermik peqqinnermullu sillimmasiisinnaanermik neqerooruteqarluta.

2026-mi sapaatip-akunneranut akunnerit 37-t sulisarnermik misiliutitut ingerlatsivugut

INI-mi piginnaasaqarnerup ineriartortinnissaa pingaartinneqaqaaq, suliffiullu iluani inuttut suliatigullu ineriartornissamut periarfissaqartitsisumik neqeroorfigisinnaavatsigit.

Suliffik sulisut naammagisimaartorujussuuffigisaat neqeroorutigisarparput. Suliffimmilu suleqatigiit ingerlalluaqatigiinnissaannik immikkoortortaqarfiillu akimorlugit suleqatigiinnermik pingaartitsisuulluta.

Atorfeqarnikkut atugassarititat

Piginnaasatit aallavigalugit akissarsitinneqarlutillu atorfinitsitaassaatit. Atorfininnermi angalanermut akiliussisoqassaaq aamma pequtit assartorneqarneri akilerneqassapput. Atorfimmut atatillugu inatsisit atuuttut naapertorlugit Sisimiuni inissaqartitsisoqarsinnaavoq.

Atorfiniffissaq: 1. oktober 2026.

Apeqqutissaqaruit Sulisoqarnermut attaveqaqatigiinnermilu pisortaq Else Finne uunga saaffigisinnaavat: efi@ini.gl

Kingusinnerpaamik qinnuteqarfissaq: Qinnuteqaatit, ilinnialernissamut uppernarsaatit aamma pinerlussimannginnermut uppernarsaatit kingusinnerpaamik 24. august 2026-mi tigunissaat qilanaaraarput.

Tusarfiginissat qilanaaraarput.