Ilisimatusarfimmi Oqaasilerinermut, Atuakkialerinermut Tusagassiuutilerinermullu Immikkoortortamut studieadjunkti

Ilisimatusarfiup Oqaasilerinermut, Atuakkialerinermut Tusagassiuutilerinermullu Immikkoortortaani ilinniartitsinermik suliaqartussamik studieadjunktissarsiorpugut.

Atorfiup augustip allaqqaataani 2026 isumaqatigiissuteqarnikkulluunniit inuttalerneqarnissaa kissaatigineqarpoq. Atorfik sapaatip akunneranut 40 tiimit suliffiuvoq.

Oqaasilerinermut, Atuakkialerinermut Tusagassiuutilerinermullu Immikkoortortaq ilisimatusarnerup ilinniartitsinerullu iluanni oqaatsit kulturillu tungaatigut assigiinngisitaartumik avatangiiseqartitsivoq 40-it missaannik ilinniartulik tallimanillu piffissaq tamakkerlugu sulisulimmik. Immikkoortortaq bacheloritut ilinniakkamik ukiunik pingasunik sivisussusilimmik aamma ukiuni marlunni kandidatitut ilinniakkamik neqerooruteqarpoq. Immikkoortortami ilinniakkani ilisimatusarnermilu qitiutinneqartut Kalaallit Nunaannut Issittumuttaaq tunngatinneqarput, suleqatigineqartullu tassaallutik Amerika Avannarlermeersut, Avannaamioqatigiit aamma Europap sinneraneersut.

Immikkoortortami ilinniartitsinerit kalaallisut, qallunaatut tuluttullu ingerlanneqarsinnaapput.

Immikkoortortaq Kulturimik, Oqaatsinik Oqaluttuarisaanermillu Ilisimatusarfiup ataani inissisimavoq taannalu pingasunik allanik aamma immikkoortortaqarpoq:

• Inuiaat Kulturiannut Oqaluttuarisaanerannullu Immikkoortortaq

• Teologiimut Immikkoortortaq

• Nutserinermut Oqaluttaanermullu Immikkoortortaq

Piginnaasassatut piumasaqaatit

Naatsorsuutigaarput illit:

• Kandidatitut qaffasissusilimmik ilisimatusarfimmi naapertuuttumik ilinniagaqarsimasutit

Oqaatsit oqaatsillu sannai pillugit ilisimasaqarluartutit 

• Oqaatsit oqaatsillu sannaanil ilisimatusaatit iluanni ilinniartitsinermik aamma/imaluunniit ilisimasanik paasissutissiortarnermi misilittagaqartutit.

• Ilitsoqqussatut kalaallisut oqaaseqartutit, kiisalu qallunaatut tuluttullu oqaatsinik qaffasissumik atuisinnaasutit

Suliassat

Suliassatit pingaarnerit tassaassapput:

• Bachelorinngornianik ilinniartitsineq ilaatigut fagini ukunani: Oqaatsit sannai inuiaqatigiinnilu Oqaatsit

• Ilinniartunik bachelorinngornianik ilitsersuineq soraarummeersitsisarnerlu

• Immikkoortortami sulianut tunngasunik aamma ataatsimuualaartitsinernik aaqqissuussinernut pilersaarusioqataasarneq ingerlasseqataasarnerlu

• Immikkoortortap suliassaqarfiata iluani ilisimatuussutsikkut ilisimasanik ingerlatitseqqiisarneq

• Allaffissornikkut suleqatigiillu akornanni suleqatigiinnerni peqataaneq

Qinnuteqaat

Studieadjunktitut atorfininnissamut qinnuteqaat, allaganngorlugu qinnuteqaatip saniatigut, ukuninnga imaqassaaq:

Ilanngussaq 1: Curriculum Vitae

Ilanngussaq 2: Soraarummeersimanernut uppernarsaatit

Ilanngussaq 3: Inuit pingasut tikillugit oqaaseqaatinik aallerfiusinnaasut attaviginissaannut paasissutissanik tunniussineq

Ilanngussaq 4: Saqqummersissimasat aamma/imaluunniit ilaatigut ilisimatuutut misissuilluni paasissutissiornermilu suliat kiisalu ilinniartitsisimanerit allattorsimaffiat

Suliatigut ineriartornissamut atorfik pissanganartunik periarfissiisoq neqeroorutigaarput:

• Sullivik isumassarsiorluarfiusinnaasoq 

• Nammineq suliassarisanut sunniuteqaqataasinnaaneq 

• Suliatigut ilinniartitsinerullu iluanni ineriartornissamut periarfissat 

Atorfinitsitsineq pillugu

Studieadjunktitut atorfeqartitaaneq ukiunik 6-nik sivisussuseqarpoq, tamatumalu kingorna suli ukiut marluk angullugit sivitsorneqarsinnaalluni. Kingornalu studielektoritut ajunngitsumik naliliivigineqarneq tunngavigalugu studielektoritut aalajangersimasumik atorfinitsitsisoqarsinnaavoq.

Atorfinitsitsinermi ingerlatseriaaseq

Qinnuteqaatit tiguneqartut tamarmik atorfinitsitsinermut ataatsimiititaliamit suliarineqassapput.

Atorfik pillugu paasisaqarnerorusukkuit Kulturimik, Oqaatsinik Oqaluttuarisaanermillu Ilisimatusarfiup pisortaa Gitte Adler Reimer oqarasuaammut uunga sianerlutit attavigisinnaavat: +299 38 56 04.

Oqaasilerinermut, Atuakkialerinermut Tusagassiuutilerinermullu Immikkoortortaq pillugu paasisaqarnerusinnaavutit uani: www.uni.gl

Ilisimatusarfik pillugu

Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut 13-upput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.

Ilisimatusarfik sisamanik instituteqarpoq:

• Ilinniartitsinermik Ilisimatusarfik

• Inuiaqatigiilerinermik, Aningaasaqarnermik Tusagassiornermillu Ilisimatusarfik

• Kulturimik, Oqaatsinik Oqaluttuarisaanermillu Ilisimatusarfik

• Peqqissaanermik Pinngortitamillu Ilisimatusarfik

Allaffissornikkut aqutsisoqatigiiffik pillugu

Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilimmarfimmi immikkoortortaqarpoq. Immikkoortortat ilinniartitsivinni ingerlatsiviusunik qanimut suleqateqartarput soorlu namminneq akunnerminni aamma suleqatigiittartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit allaffissornikkut aqutsineq, Siulersuisunik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup illutaanik sanaartornermik nakkutiginninneq aamma ingerlataraa.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qaammatini pingasuni misiliilluni atorfeqarneq

Uani atorfimmi qaammatini pingasuni misiliilluni atorfinitsitsisoqassaaq.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.