Immikkoortortanut sillimmasiissutit pillugit immikkut ittumik imaluunniit pisortatigoortumik siunnersorti

Sillimmasiisarnermik suliassaqarfimmi immikkut ittumik siunnersorti imaluunniit siunnersortaaneq

Periusissiornernik, Risk Management-imik isumaqatiginninniarnernillu suliaqarusuppit – aamma suliassaqarfimmi politikkikkut aningaasaqarnikkullu annertuumik isumalimmi ineriartortitseqataanissat kajungeraajuk?

Ineqarnermut, Attaveqaasersuutinut Isorliunerusunullu Naalakkersuisoqarfimmi Sanaartornermut Immikkoortortaqarfik immikkut ittumik siunnersortimik imaluunniit siunnersortaanermik pikkorissumik tunniusimasumillu, Namminersorlutik Oqartussat sillimmasiisarnerannik isumaginnissinnaasumik pissarsiorpoq. Atorfik annertuumik akisussaaffeqarfiuvoq, periusissiornerit, Risk Management-imut isumaqatiginninniarnerit neqerooruteqartitsinerillu, aningaasaqarneq aammalu attaveqaasersuutinut pisarialinnut upalungaarsimaneq suliassaallutik.

Sanaartornermut Immikkoortortaqarfik pillugu

Sanaartornermut Immikkoortortaqarfiup periusissiornermi suliassaqarfiit arlallit, tamanit politikkikkullu eqqumaffigineqarluartut isumagisarai. Immikkoortortaqarfiup ilaatigut Namminersorlutik Oqartussat sillimmasiissutaat, attaveqaasersuutini suliat annertunerusut, digitaliusumik sanaartornermi suliassanik suliaqarneq aammalu qitiusumik paasissutissaasivinnik, soorlu Illuliornermut Inissianillu Nalunaarsuiffimmik (BBR) aamma Sillimmasiisarnermut Illunullu Paasissutissaasivimmik ingerlatsineq isumagisarai.

Sanaartornermut immikkoortortaqarfik Naalakkersuisoqarfiit allat, kommunit, siunnersortit ingerlatseqatigiiffiillu qanillugit suliassanik isumaginnittuuvoq, aammalu misissueqqissaarnerni, periusissiornerni aamma Naalakkersuisunut Inatsisartunullu aalajangiinissamut tunngavissiornermi tapiliussisarluni. Immikkoortortaqarfimmi sulineq suliat qaffasissumik inissisimanerannit, suliatigut initussuseqarnerannit naalakkersuinikkullu aalajangiisarnermut qanittumik inissisimanerannit sunnersimaneqarpoq.

Suliassatit pingaarnerit

• Namminersorlutik Oqartussat sillimmasiisarnermi suliassaqarfianni tamarmiusumi periusissianik ineriartortitsineq pilersaarusiornerlu.

• Nunani tamalaani sillimmasiissutit, kiisalu akunnermuliuttoqarnermut ajoqusertoqarneranullu allaffissornermi suliassat pillugit neqerooruteqartitsisarnermi isumaqatiginninniarnerit naammassinninnerillu.

• Sanaartornermut suliassaqarfimmi immikkoortortaqarfimmut pisortaq aqqutigalugu siunnersortinut, akunnermuliuttunut aamma Namminersorlutik Oqartussat immikkoortortaqarfiinut attaveqartarneq ataqatigiissaarisarnerlu.

• Aningaasanut Inatsimmut tunngasunik suliaqarneq, kiisalu aningaasaqarnermut misissueqqissaarnernik ajoqusertunullu kisitsisitigut paasissutissanik suliaqarneq pitsaassutsimillu qulakkeerisarneq.

• Namminersorlutik Oqartussat Risk Management-imut pilersaarutaanut pingaarnertut akisussaasuuneq, taakkununngalu politikkit, misissueqqissaarnerit sakkussanillu ineriartortitsinerit ilaapput.

• Illuliornermut Inissianillu Nalunaarsuiffimmik (BBR) aqutsineq aamma aqutsisoqatigiinnut tassunga atasunut peqataaneq.

• IAIN-ip oqartussaaffiisa iluanni attaveqaasersuutinut pisariaqartunut upalungaarsimanermut tapiliussassanik suliaqarneq.

• Naalakkersuinikkut aalajangiinissamut tunngavissiornermi tunuliaquttatut najoqqutassanik suliaqarneq.

Piukkunnaatilik ujartugarput:

• Ilinniagartuutut attuumassutilinnik ilinniagaqarpoq, soorlu cand.scient.pol., cand.scient.adm., cand.merc., cand.oecon. assigisaaluunniit.

• Periusissianik ineriartortitsinermik, aningaasaqarnermik aqutsinermik misissueqqissaarnernillu suliaqarnermik misilittagaqarluarpoq.

• Neqerooruteqartitsinerit ingerlasarnerini ilisimasaqarpoq, ajornanngippallu nunani tamalaani sillimmasiissutinik niueruteqarnermik misilittagaqarpoq.

• Risk Management-imik, politikkikkut ineriartortitsinernik sulianillu ingerlasunik atuutsitsilertarnermik misilittagaqarpoq.

• IT-mut atortunik/paasissutissaasivinnik ineriartortitsinissamut atuutsitsilernissamullu paasisimaarinnittuuvoq.

• Tulleriiaaraluni, misissueqqissaarluni siunnerfeqarlunilu sulisarpoq – aammalu apeqqutit pisariusut suliani suleqatinut naalakkersuinermilu sulianut ersarissumik ingerlateqqissinnaavai.

• Suleqateqarnissamut eqqumasuuvoq, namminersorsinnaavoq, avatangiisinilu soqutiginnittorpassualinni sulinissamik nuannarisaqarpoq.

Neqeroorutigaavut

• Atorfik pissanganartoq unammillernartorlu, politikkikkut aalajangiisarnerit qanillugit suliaqarfiusoq.

• Avatangiisit suliatigut nukittuut, akisussaaffeqarnissamut ineriartortitseqqinnissamullu periarfissaqarfiulluartut.

• Sullivimmi avatangiisit pingaartorsiorfiunngitsut, tunniusimasunik suleqateqarfiusut aammalu ulluinnarni nuannisarnissamut inissaqartitsiffiusut.

• Siunnersortaanertut atorfininnissamut periarfissaqartitsisoqarpoq, piginnaaneqarfiit misilittakkallu uppernarsarneqarsinnaasut apeqqutaatinneqarlutik.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk