Inuit Innarluutillit Oqaaseqartartorqarfia Tilioq AC-fuldmægtigimik pissarsiorpoq

Inuit pisinnaatitaaffii aamma inuit innarluutillit pillugit suliassaqarfiit soqutigaagit? Taamaappat Tilioq immaqa suliffigisinnaavat.

Inuit Innarluutillit Oqaaseqartartoqarfiata, Naalagaaffiit Peqatigiit Inuit Innarluutillit Pisinnaatitaaffii pillugit Isumaqatigiissutaat naapertorlugu, ulluinnarni sulissutigaa Kalaallit Nunaanni inuit innarluutillit taakkulu qanigisaasa inuit innarluuteqanngitsut naligalugit inuuneqarsinnaanissaat qulakkeerniarlugu. Maannakkut AC-fuldmægtigimik tunniusimasumik, aaqqissuulluakkamik sulisinnaasumik kiisalu suleqatiginnilluarsinnaasumik pissarsiorpugut, ajornanngippallu qinnuteqartoq suliniutinik ingerlatsinermut aamma inuit pisinnaatitaaffiinut tunngasunik sulinermut misilittagaqarluni piginnaasaqarluartuussaaq.

Atorfik pillugu

AC-fuldmægtigip suliniutinik ingerlatsinermigut aamma paasissutissiinermik tunniusimalluni suliaqarnermigut Inuit Innarluutillit Oqaaseqartartuata aamma Tiliup suliaannut pingaarutilimmik tapertaassaaq. AC-fuldmægtigip akisussaaffigissavaa suleqataaffigalugillu inuit innarluutillit pillugit suliniutinik aqutsineq, ineriartortitsineq inuillu innarluutillit pillugit suliaqarfiup malunnaatilimmik sunneeqataaffigissavaa suliniutinik ingerlatsinikkut, paasititsiniaanikkut, aaqqissuussinernik ingerlatsinikkut, sunniiniarnermillu suliaqarnikkut. Allattoqarfimmi sulisut allat qanimut suleqatigalugit Tiliup periusissiaa aamma siunertaa akuerisaasut piviusunngortinneqarnissaat isumagissavat.

Suleqatigiit ikittunnguuvugut, sulisuusugullu tamatta immikkut suliniutinik suliassanillu aalajangersimasunik suliaqarpugut, pisariaqartitallu naapertorlugit suliniutit imminnut ataqatigiissillugit ingerlattarpavut. Inuit Innarluutillit Oqaaseqartartoqarfia maannakkut AC-fuldmægtigi ilanngullugu tallimanik sulisoqarpoq.

Tiliup allatseqarfia Sisimiuni inissisimavoq. Ammaffigaarput nunatsinni piffinni allani qinnuteqartut najugaqarsinnaanerat. Atorfimmut atatillugu angalasarnissaq naatsorsuutigisinnaavat.

Suliassat pingaarnerit / piginnaasat

• Suliniutinik ingerlatsineq, ilanngullugit pilersaarusiorneq, aningaasassarsiortarneq, ataqatigiissaarineq, malinnaaneq, naliliineq aamma nalunaarusiorneq. Tamanna suliniutinut aqutsisoq aamma allatseqarfimmi sulisut allat peqatigalugit ingerlanneqassaaq.

• Paasissutissiinermik suliaqarneq, ilaatigut Tiliup inoqatinut attaveqartarfinni quppernerini paasissutissiisarnikkut.

• Allaaserinninneq, soorlu ataatsimiinnernit imaqarniliat, misissueqqissaarnerit, tusarniaanermut akissutit, policy briefs (aalajangiisartunut innersuussutit), tusagassiorfinnut nalunaarutit, nalunaarusiat, aningaasaateqarfinnut qinnuteqaasiornerit, allakkiallu allat il.il.

• Aaqqissuussinernik aamma sammisaqartitsinernut suliffeqarfittut ingerlattakkatsinnut pilersaarusiorneq aamma ataqatigiissaarineq, ilaatigut tassaasut ukiumoortumik isumasioqatigiinneq aamma ataatsimeersuartitsineq.

• Suliassat takkussuuttut malillugit sullissineq.

Illit pillutit

Erseqqissuliorsinnaassuseqarputit misissueqqissaarsinnaasoq, inuiaqatigiinnilu pitsanngorsaanermik allanngueqataanissamut tunniusimasuullutit kajumissuseqarlutillu. Inuit assigiinngitsuuneri ataqqivatit, nikerartumi sulisinnaassuseqarlutit kiisalu inuit piginnaasamikkut pisinnaasamikkullu assigiinngitsunik tunuliaqutallit suleqatigilluarsinnaallugit. Tiliumut politikerinit, pisortanit inuiaqatigiinniillu naatsorsuutigisat annertusinnaasarput, taamaattumillu pingaaruteqarpoq suliffeqarfimmi allanngorartumi annertuumillu suliaqarfiusumi sullisigasuarsinnaassuseqartutit, suleqatigiillu anguniagaqartut ikioqatigiittullu peqatigerusukkitit.

Taamaattumik neriuutigaarput, illit:

• Kandidatiuvutit, soorlu socialvidenskabimi, inuiaqatigiilerinermi imaluunniit politikkimi kandidatiuguit attuumassuteqartumilluunniit misilittagaqarlutit.

• Uku ilaannut ataatsimut arlalinnulluunniit misilittagaqartutit imaluunniit ilisimasaqartutit: inuttut innarluuteqarneq, inuit pisinnaatitaaffii, suliniutinik ingerlatsineq, nunap inoqqaavisa pisinnaatitaaffii, Naalagaaffiit Peqatigiit, NGO-t assigisaallu.

• Namminersorsinnaassuseqartutit nalimmassarsinnaalluartuusutillu, sulissutigisassanillu aallarniisinnaassuseqarluartutit aamma nutaaliorsinnaasutit.

• Danskisut, kalaallisut ajornanngippallu tuluttut allattariarsornermi oqaluttariarsornermilu pitsaasunik piginnaasaqartutit. Pingaaruteqarpoq paasissutissanik paasiuminaassinnaasunik, akademiskinik aamma inatsisilerinermut tunngasunik imallit paasiuminartumik paasissutissiissutigisinnaassagitit.

Tilioq suliffeqarfiuvoq anginngitsoq, suliffeqarfitsinnullu naleqquttumik atorfinitsitsinissarput pingaartikkatsigu, qinnuteqartut piginnaasaasa aamma misilittagaasa ataatsimut isigineqarnissaat pingaartipparput, qinnuteqartut qulaani taaneqartunit allanik piginnaasaqarluarpalluunniit.

Neqeroorutigaarput

Atorfik pissanganartoq akisussaaffimmik annertuumik imalik, kiisalu suliamut aamma inuttut ineriartornissamut periarfissalik neqeroorutigaarput. Suliassaqarfiup ineriartortitseqataaffiginissaanut sunneeqataanissannut periarfissaqassaatit, qularnanngitsumillu inuit innarluutillit taakkulu qanigisaat pillugit assigiinngitsutigut iluaqutaasumillu allanngueqataasinnaassallutit, suliaqarfiullu suliat pitsaassusaannik qaffassarsinnaassallugu. Tiliumi suleqatigiit akornanni pitsaasumik aamma isumassarsiorfiusumik avatangiiseqarpugut, suleqatigilissavatillu suleqatigiit suleqatigisartakkallu tunniusimasut, isumassarsiorluartut, nutaaliortut, suliassanik isumaqarluartunik pissanganartunillu kiisalu assigiinngiisitaartunik suliaqartut.

Suliffittut pingaartipparput suliffimmi avatangiisit pitsaasuunissaat, tamanik inissaqartitsisut aamma suleqatigiinneq pitsaasoq. Tiliumi sulinerup aamma suliffiup avataatigut inuunerup oqimaaqatigiissuunissaa pingaartipparput, ilaatigut angerlarsimaffimmiit sulisinnaaneq aamma eqaatsumik sulinermik aaqqissuussisinnaaneq aqqutigalugit. Aamma aqutseriaaseq qanilaartuuvoq, ataatsimoorluta aalajangiinerit ingerlattarlutigit. Suliffiuvoq assigiinngissutsinik pingaartitsisoq, suliffimmilu avatangiisit pitsaasuunnissaannik pingaartitsisoq. Neriuutigaarput illit suliffimmi avatangiisit taamaattut attatiinnarneqarnissaannut peqataalluarusuttutit.

Akissarsiat aamma atorfinitsitaanermi atugassarititaasut

Akissarsiat atorfininnermilu atugassarititaasut, Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut.

Atorfik tunngaviusumik piffissaq tamakkerlugu suliffiuvoq, sapaatip akunneranut nalunaaquttap akunneri 40-t, eqaannerusumilli suliffeqarneq imaluunniit assingusumik aaqqiineq periarfissaasinnaalluni.

Inissaq

Atorfimmut atatillugu malittarisassat qaqugukkulluunniit atuuttut naapertorlugit sulisunut Sisimiuni inissiamik pequsersorsimanngitsumik innersuussisoqarsinnaavoq. Inissamik innersuussisoqarsinnaanngilaq, pineqartoq atorfimmut atatillugu ineqareersuuppat, imaluunniit ineqarsimappat kommunep inaataanik Namminersorlutillu Oqartussalluunniit inaataanik. Malittarisassat qaqugukkulluunniit atuuttut naapertorlugit inissiamut innersuussutigineqartumut akiliutit qularnaveeqqutillu akilerneqassapput. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Ineqarnermut akiliut aamma inissiap pitsaassusaa nikerarsinnaapput inissiap qanga sananeqarsimanera, piginnittua il.il apeqqutaallutik. Sulisutut ataavartumik initaarnissaq utaqqinarsinnaavoq, taamaattumik utaqqiisaagallartumik inissiisoqarsinnaasarpoq, tassunga ilanngullugu najugaqatigiiffinnut minnerusunut imaluunniit akunnittarfimmi inissianut inissiisoqarallarsinnaalluni, taakkulu akileraarusersorneqassallutik. Sulisunut inissiani utaqqiisaasumilluunniit inigisani angisuunik uumasuuteqarsinnaaneq, soorlu qimmeqarsinnaaneq qitsuuteqarsinnaanerluunniit, periarfissaqanngilaq.

Qinnuteqarneq

Naatsorsuutigineqarpoq aggustimi imaluunniit septembarimi 2026 atorfinitsitsineq pissasoq, imaluunniit isumaqatigiissuteqarnikkut.

Atorfik pillugu annertunerusumik paasisaqarusukkuit, suliniutinut aqutsisoq Emma Christensen attavigisinnaavat oqarasuaatikkut +299 345085 imaluunniit e-mailikkut: emchr@tilioq.gl.

Qinnuteqaatit CV-mik aamma allagaatinillu allanik tamatumunnga tunngassuteqartunik ilaqartillugu uunga nassiuguk: emchr@tilioq.gl kingusinnerpaamik 21. juuni 2026.

Oqaloqatiginninnerit ingerlanneqarnissaat naatsorsuutigineqarpoq sapaatip akunnerini 26 aamma 27.

Piginnaasaqartut soqutiginnittullu tamarmik, inuttut innarluuteqarneq, ukiut, suiaassuseq, ammip qalipaataa, upperisaq inuiaassuserlu apeqqutaatinnagit, atorfimmut qinnuteqarnissaannik kajumissaarpagut.

Tilioq pillugu annertunerusumik atuarsinnaavutit nittartakkatsinni:

https://www.tilioq.gl/kl/