Isumaginninnermut Aqutsisoqarfik Meeqqanut Inuusuttunullu sullissisunut isumaginninnermi siunnersortimik sulisussarsiorpoq

Nuna tamakkerlugu meeqqanut inuusuttunullu suliassaqarfimmi sullissisunut siunnersuinermik ilitsersuinermillu, pikkorissaanernik allarpassuarnillu tapersersueqataarusuppit? Taamaappat Isumaginninnermut Aqutsisoqarfik Meeqqanut Inuusuttunullu suleqatigiinnut isumaginninnermi siunnersortinik pikkorissumik sulisussarsiorpoq.

Sullissisunut siunnersuinermut Immikkoortortaqarfimmi aamma Meeqqanut Inuusuttunullu suleqatigiinni nuna tamakkerlugu kommunini sullissisunut tapersersuineq suliaraarput. Ilaatigut siunnersuisarpugut ilitsersuisarlutalu aammalu ilitsersuutinik sakkussanillu kommunini sullissisut ulluinnaanni tapersiisinnaasunik suliaqartarluta. Tamatuma saniatigut saqqummiinerit, pikkorissaanerit sanileralugillu ilinniartitsinerit ingerlattarpagut. Neqeroorutinik nutaanik najoqqutassanillu ineriartortitsineq akuleriissillugit suliassaapput, taamatullu allaffissorluni aammalu sillimasuusarnermut kommunit apeqqutissaqaraangamik saaffiginnittarfigisaannut aaqqissuussinitsinni ingerlatsinermi ilaanissaq.

Maannakkorpiaq Kommune Kujalleq utaqqiisaasumik tapersersorparput, tassani suleqatit arlallit suliassanik suliarinninnermi toqqaannartumik ilaatinneqarlutik.

Meeqqanut Inuusuttunullu suliassaqarfimmi isumaginninnermi siunnersortitut, immikkoortortaqarfimmi Meeqqanut Inuusuttunullu suliassaqarfimmut, Ilaqutariittut paarsisartunut suliassaqarfimmut, Ilaqutariinnik aqqutissioqatigiinnermut aammalu Meeqqanut ilaqutariinnullu sullissivimmut suliassaqarfinni suleqatigiikkaat saniatigut suliniutinut aqutsisumik aammalu immikkoortortaqarfimmi pisortamik sulisoqartumi, ilaalissaatit.

Ilaatigut suliassarilissavatit:

• Meeqqanut inuusuttunullu suliassaqarfimmi suliassanik suliarinnittartunut aqutsisunullu siunnersuineq ilitsersuinerlu

• Suliniutinut ineriartortitsinermullu suliassanut ataqatigiissaarineq ikiuuttarnerlu, ilanngullugit ilaatigut isumaginninnermi ilisimasanik periaatsinillu nutarterisarneq paasissutissiisarnerlu

• Sanileralugit ilinniartitsinissanut pilersaarusiorneq ingerlatsisarnerlu aammalu suliatigut ikiuuttarneq

• Pikkorissaanissanik suliaqarlunilu isumasioqatigiissitsinissanik pilersaarusiorneq ingerlatsisarnerlu

• Sulinitsinni paasissutissanik nalunaarsukkanik katersinermik suliaqartuni ilaaneq, assersuutigalugu pikkorissaanernik naliliineq aamma angalanermut nalunaarusianik suliaqarneq

• Sillimasuunermut aaqqissuussinermi allaffissornermilu passussinermi peqataaneq, saniatigullu suliassaalertartut.

Illit pillutit

Isumaginninnermi siunnersortimik suliatigut pikkorissusilimmik, meeqqanut inuusuttunullu suliassaqarfimmi suliassanik suliarinninnermik misilittagalimmik, immaqalu sulisunik nutaanik ilinniartitsinermut atatillugu ilinniartitsinermik misilittagaqareersumik, sulisussarsiorpugut.

Tamatuma saniatigut atuisutut IT-nut pikkoriffeqarluarnissat pingaartinneqassaaq.

Takorloorparput inuttut suliassat assigiinngitsorpassuit ammaffigigitit allanngorartumillu periaaseqarfigisinnaagitit, namminersorlutit sukumiisortaalu pingaartillugit sulisinnaasutit, peqatigisaanik suleqaternut isumasioqataarusussuseqarnissat aammalu tassanngaannartumik ikiorneqarnissamik pisariaqartitsisoqalersinnaasunik avatangiiseqarlutit sulisinnaanissat pingaartipparput.

Naatsorsuutigaarput illit:

• Isumaginninnermi siunnersortitut ilinniarsimasutit meeqqanut inuusuttunullu suliassaqarfiup iluani sullissinerup iluani ukiuni arlalinni misilittagaqartutut, ilanngullugit isumaginninnikkut misissuinernik iliuusissanillu pilersaarutinik suliaqarneq.

• Meeqqanut inuusuttunullu suliassaqarfiup iluani suliassanut pikkorissuusutit, aammalu meeqqanut tunngasunik suliaqarnermi periaatsinik sakkussanillu ilisimannittutit

• IT-nut pikkorissuseqarluartutit aammalu Get Organized ilisimasaqarfigigukku pitsaassalluni, taamaanngippat soorunami sukumiisumik ilinniartinneqassaatit.

• Meeqqanut tapersersuinermut Inatsisartut inatsisaat sukumiisumik ilisimaarigit

• Suliassaqarfiit akimorlugit suleqatigiinnermik misilittagaqartutit, ataqatigiissaarillaqqissuusutit pilersaarusiornerlu pikkoriffigigit

• Attaveqalertarneq attaveqarnerillu allanngutsaaliortarneri pikkoriffigigitit

• Tulleriissaartumik periaaseqarlutit, aaqqissuussaasumik aammalu aaqqiissutissat ineriartortitsinissarlu pingaartillugit sulisartutit

• Suliassanik suliarinninnissamut aallarniisartutit aammalu ilinniartitsineq pikkoriffigigit

• Kalaallisut danskisullu marlunnik oqaaseqartutit.

Tamatuma saniatigut iluaqutaassaaq illit:

• assersuutigalugu aqqutissiuussisunut suliassaqarfiup iluani, naleqquttumik ilinniaqqissimaguit

• aaqqissuussaanermi politikkikkut aqunneqartumi sulineq misilittagaqarfigigukku

• ineriartortitsinermik suliassanik suliaqarneq misilittagaqarfigigukku aammalu nutaanik eqqarsallaqqikkuit.

• alapernaatsuuguit, sioqqutaarisarlutit aammalu nuannersumik suliassanik suliarinninniartaruit aamma suleqatigiilluni pisuni.

Makkua ilinnut neqeroorutigisinnaavagut:

• Immikkoortortaqarfimmi ineriartorfiujuartumi ilaalissaatit

• Suliatigut pikkorissunik avatangiiseqarneq, tassani isumasioqatigiittarneq pingaartipparput aammalu pikkorinnerulerniarluta ikioqatigiittuaannarluta

• Aqutsisoq suliassanik suliarinnissinnaanernut tatiginnittoq, piviusorsiortunik piumasaqaateqartartoq ineriartornissarnillu pingaartitsisoq

• Suleqatit nuannersut, ingerlalluaqatigiinnissamik pingaartitsisut – aamma ulapaarnitsinni

• Persuarsiunngitsumik peqatigiittarneq aammalu nammineq sulinermi killissanut sunniuteqarneq

• Suliffernit angalanissamut aammalu nunap tamakkerlugu misigisaqarfiginissaanut periarfissaqarneq

Uagut pilluta

Isumaginninnermut Aqutsisoqarfik Meeqqanut Inuusuttunullu Naalakkersuisoqarfiup ataani aqutsisoqarfiuvoq. Isumaginninnermut Aqutsisoqarfik immikkoortortaqarfinni 7-ini makkunani agguagaavoq: Pitsaaliuinermut immikkoortortaqarfik Paarisa, Aningaasaqarnermut immikkoortortaqarfik, Ulloq unnuarlu Innersuussinernullu immikkoortortaqarfik, Meeqqat ineriartornerannut immikkoortortaqarfik, Suliassanik suliarinnittartunut siunnersuinermut immikkoortortaqarfik, Innuttaasunut sammisunut immikkoortortaqarfik aamma Allattoqarfik.

Aningaasarsiatigut atorfinitsitaanermilu atugassarititaasut

Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.

Najugaq

Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.

Paasissutissat annertunerusut

Atorfik pillugu annertunerusunik paasisaqarusukkuit, immikkoortortaqarfimmi aqutsisuugallartoq, Paninnguaq Kleemann, attavigisinnaavat oqarasuaatikkut +299 34 60 01 imaluunniit mail pkln@nanoq.gl

Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 

E-mail-ikkut qinnuteqaatinik tigusineq ajorpugut.

Qinnuteqaat nassiuguk