Fakta
Atorfiup suussusaa: Ph.d.-tut atorfik
Suliffeqarfik: Grønlands Universitet / Ilisimatusarfik
Qinnuteqarfissamut killigititaq: apriilip 21.-at, 2026 12:00
Attavissaq: Annemette Nyborg Lauritsen +299 38 56 60
Anguterpalussuseq, isumassuineq avatangiisillu allanngoriartornerat: Kalaallit Nunaanni angutit inuusuttut inuunerat pillugu ilisimatusarnissamik suliniutip iluani atorfimmut ph.d.-ingorniarfiusumut Ilisimatusarfik qinnuteqaqqusivoq.
Atorfik maajip aallaqqaataani imaluunnit tamatuma kingorna piaarnerpaamik inuttalerniarneqarpoq. Ph.d.-tut atorfik qaffasisumik ilinniarsimassutsikkut ukiunut pingasunut killilerneqarsimavoq. Atorfik tamakkiisuuvoq (sapaatip akunneranut akunnerit 40-it). Ph.d.-ngorniarnerup tamakkiisup ingerlanerani qinnuteqartoq Kalaallit Nunaanni Nuummi najugaqassaaq. Naatsorsuutigineqarpoq semesteri ataaseq nunani allani ilisimatuutut tikeraatut ingerlanneqassasoq.
Ph.d-tut atorfik pillugu
Ph.d.-tut aningaasalerneqarneq ilisimatusarnermi suliniutip iluaniippoq, uani sammisami Anguterpalussuseq, isumassuineq avatangiisillu allanngoriartornerat: Kalaallit Nunaanni angutit inuusuttut inuunerat, misissorneqarluni kalaallit angutit (18-29-nik ukiullit) anguterpalussuseq, isumassuineq suminngaaneersuunerlu qanoq ilusilersorlugu isumaqatigiinniutigisarneraat avatangiisit allanngoriartornerannut, illoqarfinngoriartornermi, inuiaqatigiit atugarissaartut allanngornerat nunasiaataasimanerullu kingunerinut atatillugu.
Inuuniarnermi ileqqut soorlu piniarneq aalisarnerlu oqaluttuarisaanerup ingerlanerani angutitut kinaassutsimut inuiaqatigiinnilu inissisimanermi qitiulluinnartut avatangiisit allanngoriartorneranni, suliffeqarnikkut allannguutinit ilinniarnissamullu naligiimmik periarfissaqannginermit tatineqariartuinnarput. Saniatigullu ilisimatusarnerni uppernarsineqarpoq angutit inuusuttut pitsaasumik inuunissaannut attuumasunik ilungersunarluinnartoqartoq, ilaatigut ajattungaanermik, kiserliornermik, atornerluinermik, nakuusernermik imminullu toquttarmik. Taamaakkaluartoq angutit inuusuttut ingammillu ataataasut inuusuttut Issittumi ilisimatusarnermi naalakkersuinikkullu oqallinnermi amigaataasarput.
Suliniummi pingaarnertut siunertaavoq avatangiisaannut malussarissumik itisuumik ilisimalerneqarnissaa, angutit inusuttut allanngornermi taamaattuni qanoq inuunersut, ilaatigut ulluinnarni inuuneranni isumassuineq, akisussaaffik attavigisanilu periutsit qanoq inissisimanersut. Suliniut anguterpalussuseq, isumassuineq atugarissaarnerlu pillugit ilisimatusarnermut ilaassaaq Issittumi inuunermut atatillugu saniatigullu naalakkersuinikkut ingerlatsinikkullu toqqaannartumik ilisimasanik soqutiginartunik pilersitsilluni.
Ilisimatusarnermi qitiusut
Ilisimatusarnermi apeqqut pingaarneq suliniummi najoqqutarineqartussaq tassaavoq:
Inuiaqatigiinni avatangiisinilu allanngoriartortuni angutit inuusuttut kalaallit suiaassutsikkut kinaassutsit qanoq ilusilertarpaat atorlugillu, kinaassuserlu tunngavigalugu ingerlatseriaatsit qanoq assigiinngisitaartigippat taakkulu qanoq assigiinngisitaarpat inuiaqatigiinni inissisimaneq akimorlugu (soorlu ataataaneq), kiisalu illoqarfinni isorliunerusunilu?
Suliniut inuit apersorlugit, (misigsaat eqqarsaataallu paasiniarlugit) misissuinermik aallaaveqarpoq tamatigoorluni, inuunerup oqaluttuassartaa pillugu apeqqarissaarneq, peqataasunit maluginiakkat, eqimattanik sammisaqarneq kiisalu allagaatini tusagassiuutinilu misissuinerulluni. Ornigulluni sulineq annermik Nuummi Qaqortumilu ingerlanneqassaaq. Suliniut anguterpalussuseq pillugu ilisimatusarnerni teoriinik tunngaveqassaaq, isumassuineq pillugu teorimi, kiisalu nunasiaateqarneq avatangiisillu pillugit ilisimatusarnernit, ingerlatsinermut tunngasut apersukkallu aqqusaarsimasaannik inooriaasaannik, attaveqariaasaannillu misissuineq atorneqarluni.
Ph.d.-mi suliniut ilisimatusarnermi suliniutip tamakkiisup qiterisaanut ilaavoq.Taamaattumik qinnuteqartut tunngavissat allassimasut ilisimatusarnermilu anguniakkat iluanni suliniutitut siunnersuutertik piorsassagaat naatsorsuutigineqarpoq.
Ilisimatusarnermi avatangiisit ph.d.-ngorniarnerullu ingerlanissaa
Ph.d.-ngorniarlutik ilinniartut Ilisimatusarfimmut ilinniartutut allatsissapput ilisimatusarfimmilu Issittumi atugarissaannermut Ilinniarfimmi ilisimatusarnermut ingerlatsivimmut attuumassuteqarlutik. Ph.d.-ngorniarnerup ingerlanissaa aaqqissuunneqarsimavoq nunani tamalaani qaffasissumik ilisimatusarnermi suleqatit qanimut suleqatigalugit, ilaatigut Roskilde Universitet, taamaalilluni qulakkeerneqarluni ilisimatusarnermi ilinniarnermi avatangiisit tamatigoortuullutillu nunanut tamalaanut atanissaat.
Ph.d.-ngorniartup Kalaallit Nunaanni nunanilu tamalaani ilisimatuut peqatigalugit suliassaqarfiit assigiinngitsut akimorlugit nukittuumik suleqatigiinnermi peqataassaaq, Kalaallit Nunaannilu ilinniarfiit, suliniaqatigiiffiit inuiaqatigiillu qanimut suleqatigalugit.
Suliassaqarfiit akisussaaffigineqartut suliassallu
Ph.d.-ngorniartup ilitsersorneqarluni suliniummilu eqimattanik suleqateqarluni imaattunut akisussaaffeqassaaq:
- Kalaallit Nunaanni angutit inuusuttut akornanni ilisimatusarnermik tunngavilimmik apersuilluni misissuinermi paasisanik katersuissaaq
- Sumiiffinni suleqatit ingerlatsiviillu suleqatigalugit ornigulluni sulineq pilersaarusiorlugu ingerlallugu
- Ilisimatusarnermi paasisat misissornissaat atuagarsornerlu (teori) tunngavigalugu atortussanik misissuillunilu piorsaanissaq
- Ilisimatuussutsikkut sulianik allaaserisaqarneq ph.d.-ngorniullu suliaralugu
- Ilisimatuussutsikkut angusat ingerlateqqinnissaat ilisimatuussutsikkut eqimattanut kiisalu ingerlatsisunut, aalajangiisartunut sumiiffinnilu inuiaqatigiinnut
Ph.d.-ngorniarluni atorfik ilisimatuutut ilinniarnermi atorfiuvoq. Ph.d.-ngorniartoq sunigusarneqassaaq nunat tamat akornanni ilisimatusarnermi qaffasissutsimik ilisimatusaammillu ingerlatitseqqiinermi misilittagaqalersinneqassaaq, suliamullu tunngasumik ilinniartinneqarnermi.
Piginnaasat
Qinnuteqartut imaattunik piginnaasaqassapput:
- Inuiaqatigiilerinerup iluani atorsinnaasumik kangidatiunissaq (soorlu sociologimi, antropologimi, isumaginninnikkut sulinermi imaluunniit tassunga tunngasumi) qaffasissumik ilinniakkamini angusarissaarluni
- Ilisimatusarnermi periutsinik apersuilluni misissuinermi paasisanik uppernarsarneqarsinnaasunik misilittagaqarluni
- Misissuillaqqissuulluni, suiaassuseq, anguterpalunneq, isumassuineq , atugarissaarneq aamma/imaluunniit issittumi inuiaqatigiit soqutigisaralugit
- Namminersorluni sulisinnaalluni kiisalu nunat tamalaat akornanni suliassaqarfiillu akimorlugit ilisimatooqatigiinni ilaalluni
- Kalaallisut tuluttullu piginnaaneqarluarluni, allattariarsornikkut oqaluttariarsornikkullu
Makku ilaqutaassapput:
- Inuiaqatigiinnik kalaallinik ingerlatsivinnillu ilisimasaqarneq
- Inuiaqatigiinni inukitsuni isorliunerusuniluunniit ornigulluni sulinermik misilittagaqarneq
Naliliineq
Qinnuteqartunik naliliinermi makku pingaartinneqassapput:
- Qinnuteqartup ilinniakkamigut suliffigisimasamigullu suliamut attuumassuteqarnissaa
- Ph.d.-ngorniarnermi siunnersuutip pitsaassusaa, ataqatigiisinneqarsinnaassusaa naammassineqarsinnaaneralu
- Periutsitigut misissuisinnaassutsikkullu piginnaasat
- Qinnuteqartup ph.d.-ngorniumminik ataatsimut isigalugu naammassinnissinnaanera
Suliniummut siunnersuut killiliussanik qaangiissanngilaq (soorlu quppernerit tallimat / naqinnerit 12.000, akornisigut naqqinnerit ilanngullugit, ingerlatsiviup piumasaqaatai apeqqutaatillugit).
Atorfimmut Ph.d-inngorniatut atorfinitsitseriaaseq
Atorfinitsitsinermut atatillugu ataatsimiititaliap qinnuteqaatit tiguneqartut tamaasa suliarissavaat.
Qinnuteqaat
Qinnuteqaat tuluttut, danskisut imaluunniit kalaallisut nassiunneqassaaq makkuninngalu imaqassalluni
- qinnuteqaat tunngavilersugaq
- CV
- Ilinniarsimasatigut angusisimanermut uppernersaatit, ilaatigut angusat allattorsimaffiat
Ph.d.-ngorniarluni suliniummut siunnersuut makkulu:
- Suliniutip allaserineqarnera
- Saqqummiinissamut pilersaarutit
- Ilinniarnissamut pilersaarutit
- Pikkorissarnissamut pilersaarutit
- Missingersuutit
Saniatigut ilisimatusarnikkut imaluunniit ilinniartitsinikkut piginnaasat uppernarsaatitaqartut (tamanna suliniummut attuumassuteqarpat)
Attavigisassat/ paasissutissat:
Atorfik pillugu sukumiinerusunik paasisaqarusukkuit, tikilluaqquneqarputit Institutimi pisortaq Annemette Nyborg Lauritsen oqarasuaat: +299 347360 kiisalu suliamik aqutsisoq professor Steven Arnfjord oqarasuaat +299 347331-imut attavigissallugit. Ilisimatusarfik pillugu paasisaqarnerorusukkuit uani paasisaqarnerusinnaavutit www.uni.gl
Ilisimatusarfik pillugu
Ilisimatusarfik 1987-imi pilersinneqarpoq. Maannakuugallartoq ilinniarneqarsinnaasut assigiinngitsut 13-upput, taamatuttaaq Ilisimatusarfiup neqeroorutigai diplom-imut masterimullu saniatigut ilinniarnerit. Ilisimatusarfik issittumi universitetiuvoq nunarsuup ilaani pilertortumik ineriartorfiusumi nutaanik ilisimasaqalerfiusoq nutaaliorfiusorlu. Siulersuisut tassaapput Ilisimatusarfiup qullersai. Ulluinnarni aqutsineq rektorimit direktørimillu ingerlanneqarpoq. Instituttit sisamaasut Instituttini Siunnersuisoqatigiinnit siunnersorneqartumik siulersorneqarput.
Ilisimatusarfik sisamanik instituteqarpoq:
- Ilinniartitsinermik Ilisimatusarfik
- Inuiaqatigiilerinermik, Aningaasaqarnermik Tusagassiornermillu Ilisimatusarfik
- Kulturimik, Oqaatsinik Oqaluttuarisaanermillu Ilisimatusarfik
- Peqqissaanermik Pinngortitamillu Ilisimatusarfik
Allaffissornikkut aqutsisoqatigiiffik pillugu
Allaffissornikkut aqutsisoqatigiiffiup ilisimatusarfik tamakkerlugu sullitaraa. Ilisimatusarfiup direktørianit aqunneqarpoq. Allaffissornikkut aqutsisoqatigiiffik Ilimmarfimmi immikkoortortaqarpoq. Immikkoortortat ilinniartitsivinni ingerlatsiviusunik qanimut suleqateqartarput soorlu namminneq akunnerminni aamma suleqatigiittartut. Allaffissornikkut aqutsisoqatigiiffimmi suliassat tassaapput: ilinniartut pillugit-, sulisut pillugit allaffissornikkut aqutsineq, Siulersuisunik, Akademisk Rådimik kiisalu ilimmarfimmi sulisunik ilinniartunillu sullissineq. Allaffissornikkut aqutsisoqatigiiffiup Ilimmarfiup illutaanik sanaartornermik nakkutiginninneq aamma ingerlataraa.
Aningaasarsiatigut atorfinitsitaanermilu atugassarititaasut
Akissarsiat atorfininnermilu atugassarititaasut, tassunga ilanngullugit atorfinitsitaanermi soraarnermilu angalanissamut akiliunneqarnissamut pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isumaqatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorlugit ingerlanneqassapput.
Najugaq
Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
Qinnuteqaatit, CV, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit.
E-mail-ikkut qinnuteqaatinik tigusineq ajorpugut.
Qaammatini pingasuni misiliilluni atorfeqarneq
Uani atorfimmi qaammatini pingasuni misiliilluni atorfinitsitsisoqassaaq.
Naalakkersuisut pillugu
Pissanganartunik ujarlerpit sulinerillu aqqutigalugu ulluinnarni inuunermut sunniuteqarnissat kissaatigaajuk, taamaaliornikkullu siunissamik ilusilersueqataallutit? Taava Namminersorlutik Oqartussani sulinissaq ilinnut tulluuppoq. Suliamut tunngatillugu sulisutut piginnaasaqarnissaq, pissutsinut misissuilluarsinnaaneq kiisalu allanngornernut piareersimajuarneq assut pingaartitaraagut. Tamakku saniatigut ulluinnarni suliassannik ilusilersuisinnaanerit uippakajaalertannginnissallu pingaaruteqarput.
Namminersorlutik Oqartussat tassaapput, Qitiusumik Allattoqarfik 650-it missaanik sulisulik naalakkersuisoqarfinnut arfineq-pingasunut aqutsisoqarfinnullu arlalinnut agguataarsimasut. Katilluta inuit 2500-t sinnerlugit Namminersorlutik Oqartussanut atassuteqarpugut. Qitiusumik Allattoqarfiup suliassaraa Naalakkersuisut aalajangernissaannut tutsuiginartumik tunngavissinnissaat kiisalu politikkikkut aalajangikkat piviusunngortinnissaat.
Namminersorlutik Oqartussat pillugit annertunerusumik uani atuarsinnaavutit http://www.naalakkersuisut.gl/job
