Kalaallit Nunaanni siunissami meeqqat atuarfiat ilusilersuiffigeqataaffigerusuppiuk?

Ukiorpaalunni suleqaterput immikkoortortami pisortaq aqutsisoqarfimmi allanik suliaqalissammat Ilinniartitaanermut Aqutsisoqarfik anguniagalimmik suleriallaqqissumillu perorsaanermut immikkoortortamut – siunnersuinermik, perorsaanikkut ineriartortitsinermik, ilinniusiornernik kiisalu meeqqat atuarfiannut atorniartarfimmik siammarterivimmillu ingerlatsiviusumut - pisortassarsiorpoq.

Ilinniartitaanermut Aqutsisoqarfik sulianik GUX-imut, Attammut NUIKI-mullu tunngasunik tigusinerup kingornatigut qanittukkut aaqqissuussaanikkut immikkoortortat marluusiimasut pingasunngortillugit nutartereqqammivoq.  Immikkoortortami pisortanngornikkut pingaartumik meeqqat atuarfianni ineriartornermut sunneeqataasinnaassaatit kiisalu suliniutissanut nutaanut arlalinnut sammiviliisassallutit, suliffeqarfiup iluani immikkoortortat akimorlugit suleqatigiinneq nukittorsarlugu perorsaanikkullu inerisaaneq ilinniartitaaneq pitsaasoq ataqatigiissorlu taperserlugu qulakkeerinneqataassallutit.

 Suliassatit pingaarnerit ukuussapput:

• Immikkoortortaqarfiup suliaanik allaffissornikkullu ingerlatsineranik aqutsineq ineriartortitsinerlu

• Pilersaarusiornikkut ingerlatsinikkullu Ilinniartitaanermut Aqutsisoqarfiup immikkoortortaasa avataanilu suleqatit akornanni ataqatigiilersitsineq

• Ilinniartitaanermut Aqutsisoqarfiup takorluugaanik naammasserusutaanillu eqqummaarillutit suleqataanissat

• Immikkoortortaqarfimmi teams-it siulersornissaat aammalu aqutsisoqarfiup pisortaanut attaveqaataallutillu taakkunani peqataanissat

Ukua akisussaaffigissavatit:

• Meeqqat atuarfiat pillugu inatsisinik piviusunngortitsiniarneq inerisaanerlu

• Sulisunik aqutsineq, aningaasaqarnermik aqutsineq ingerlatsinermullu akisussaasuuneq

• Aqutsisoqarfiup immikkoortortaqarfiisa pingasuusut akornanni suliniutinik aqutsineq ataqatigiissaarinerlu

• Immikkoortortami suliffeqarfimmilu pitsaasumik suleqatigiinnissamik qulakkeerineq

• Immikkoortortaqarfimmik sisamanik minnerusunik immikkut ukkatalinnik teamsilimmik aqutsineq

Illit ujarpatsigit:

• Meeqqat atuarfiannik, inuiaqatigiinnik kalaallinik, kulturiannik ilinniartitaanikkullu aaqqissugaanerannik ilisimasaqarluartoq

• Akademiskiusumik naleqquttumik ilinniagaqartoq – kissaatiginarpoq meeqqat atuarfiannut imaluunniit ilinniartitaaneq pillugu misilittagaqassasutit

• Aqutsinermik misilittagaqarluartoq – pisortat ingerlatsiviiniit misilittagaqarnissat kissaatiginarpoq

• Attaveqaqatigiillaqqissoq, ingerlatannik sunniisinnaallutit angusaqarsinnaassallutit suleqateqallaqqillutillu

• Inunnik, suliffeqarfimmik ilinniakkatigullu ineriartortitsinermik  pilersitserusuttoq

  
  Aqutsisoqarfiup pisortaa taassumalu tullersortaa toqqaannartumik qullersarissavatit aqutsisoqarfimmilu immikkoortortaqarfiit allat qanittumik tatigeqatigiittumillu suleqatigissallugit.
  
  Ilinniagallit suleqatigiilluarnermik pingaartitaqartut ilagilikkit
  Ilinniartitaanermut Aqutsisoqarfimmi ilinniagaqarfinni tamani qaffasissumik pitsaassuseqarnissaq qularnaarniarlugu suliniuteqartuuvugut – meeqqat atuarfiiniit inuusuttut ilinniagaqarfiinut – illillu suliffeqarfimmi allanngoriartorfiusumi pingaaruteqartumik inissisimassaatit ineriartorneq annertuumik sunniuteqarfigissallugu periarfissaqassallutit.
  
  Ilinniartitaanermut Aqutsisoqarfik pillugu
  Ilinniartitaanermut Aqutsisoqarfik tassaavoq suliffeqarfik politikkikkut aqunneqartoq, Naalakkersuisoqarfimmik politikkerinillu sullissisoq kiisalu inerisaanermik  saqqummersitsinernillu suliaqartoq. Ilinniartitaanermut Aqutsisoqarfik maannakkut suliaminik suleriaatsiminillu nutarsaavoq – peqataaffigiumaagassannik.
  
  Suliffeqarfiuvugut amerlasuunik assigiinngitsorpassuarnillu suliaqartuulluta, aqutsisoqarfiit atuutereersut suliaasa nalinginnaasut saniatigut ilaatigut aamma saqqummersitsiveqarpugut, naqiteriveqarpugut, aammalu paasititsiniaanermut atorniartarfimmullu tunngasunik katersugaateqarluta. Aqutsisoqarfiup annerusumik meeqqat atuarfiat, efterskolit højskolillu suliassaqarfigivai, nutaatullu GUX-imut, Attammut NUIKI-mullu tunngassuteqartut suliassaqarfigilerlugit. Suleqatigiit 55-it missaanniippugut, suliffeqarfimmi pingaartorsiorpallaanngitsumi suliat pitsaasuunissaannik pingaartitsisuulluta.
  
  Atorfeqarnermi atukkat
  Atorfik piffissami matumani LR 38-mut inissinneqarsimavoq.
  1. april 2024 LR 38-mi akissarsiat IMAK-imut isumaqagitiissutit malillugit qaamammut  Kr. 59.010 ukiumullu Kr. 708.118.
  
  Atorfinitsitsineq pissaaq Naalakkersuisut Ilinniartitsisullu Meeqqat Atuarfianneersut Kattuffiat, IMAK-ip akornanni, Meeqqat atuarfianni ilinniartitsisut pillugit isumaqatigiissutaat malillugu. Qinnuteqartoq Kalaallit Nunaanni pisortat tjenestemandit pillugit inatsisaat malillugu tjenestemanditut atorfeqareersoq, tjenestemandinut atugassarititaasut atorlugit atorfinitsinneqarsinnaavoq.
  
  Akissarsianut atorfeqartitaanermullu atugassarititaasut, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.
  
  Piffissap suliffiusussap sivisussusissaa aallaavittut sapaatip akunneranut nalunaaquttap akunnerinik 40-nik sivisussuseqarpoq. Atorfimmut atuuttoq tassaavoq, piffissap suliffiusussap qanoq sivisutiginissaa killilersugaanngimmat, aammalu qaangiuttoornermi ajunngitsorsiassat akilerneqarnissaat ullullu sulinngiffissat annaaneqartut ajunngitsorsiassarsissutiginissaat atorneqarsinnaanngillat.
  
  Najugaq
  Atorfimmut atatillugu sulisunut inissiamik innersuussisoqarsinnaanngilaq. Qinnuteqartoq Namminersorlutik Oqartussani atorfeqarnermini sulisutut ineqartinneqareersimaguni sulisutut ineqarsinnaatitaanini tigummiinnarsinnaavaa. Atorfimmut atatillugu ini atorfeqarnermut tunngavoq, taamaalilluni atorfeqarnerup unitsinnerani qimanneqassalluni.
  
  Atorfininnerup aallartiffia
  1. oktober 2026 imaluunniit isumaqatigiissuteqarnikut.
  
  Qinnuteqarneq
  Qinnuteqaatit, CV-it nutartigaq, ilinniarsimasanut pikkorissaatigisimasanullu uppernarsaatit kiisalu paasissutissat allat pisariaqarsinnaasut "qinnuteqaat nassiuguk" toorlugu nassiutikkit. 
  Ulloq qinnuteqarfissaq kingulleq tassaavoq 10. august 2026
  
  Atorfimmut atatillugu paasissutissat annertunerusut uunga saaffiginninnikkut pissarsiarineqarsinnaapput: Aqutsisoqarfimmi pisortaq Kaali Olsen, oqarasuaat +299 34 61 58 e-mail: kaol@nanoq.gl, imaluunniit pisortap tullia Brita Toft Hyldgaard, oqarasuaat +299 34 62 18, e-mail:  brth@nanoq.gl
  
  Kalaallit Nunaat Namminersorlutillu Oqartussat pillugit annertunerusumik paasisaqarusukkuit Naalakkersuisut nittartagaanni taakkua ujartorsinnaavatit - Atorfiit  ataanni. Ilinniartitaanermut Aqutsisoqarfik mail-ikkut qinnuteqaatinik tigusineq ajorpoq.