KNR-imi periusissialerinermut aamma attaveqaqatigiinnermut siunnersorti

KNR-ip periusissiaata angusaqarfiusumik piviusunngortinneqarnissaa peqataaffigerusuppiuk – aammalu sulisunut tamanut inuiaqatigiinnullu KNR-ip sammiviata paasiuminartumik ersarissumillu saqqummiunneqarnissaa qulakkeerinneqataaffigerusuppiuk? 

KNR periusissialerinermi nukittuumik attaveqaqatigiinnermullu pikkorissumik suleqatissarsiorpoq; pisortaanerup aqutsisoqatigiillu KNR-ip periusissiaanik atuutsitsilernermi aammalu suliffeqarfiup ineriartortinneqarnerani suleqataasussarsiorluni.

Periusissialerinermi aamma attaveqaqatigiinnermut siunnersortitut KNR-ip ineriartortinneqarneranut atatillugu suliniutinut pingaarutilinnut siuarsaaqataassaatit, kiisalu KNR-ip ineriartornera pillugu suliffeqarfiup iluani avataanilu attaveqaqatigiinneq ersarissumik, ataqatigiissumik tatiginartumillu qulakkeerinneqataaffigissallugu.

Atorfik pisortaanerup ataani inissisimavoq, aammalu suliffeqarfiup immikkoortuini tamani aqutsisut suleqatigilluinnassallugit.

Suliassat pingaarnerit

ilaatigut akisussaaffigissavatit:

•KNR-ip periusissiaata atuutsinneqalernerata ataqatigiissaarneqarnissaa aamma suliniutit periusissiallit siuarsarneqarnissaat qulakkiissallugu

• suliniutit killiffiinut suliassanullu tamakkiisumik isiginnilluni akisussaaneq

• anguniakkat, aalajangiinerit ineriartortitsinermilu suliniutit pillugit ataavartumik sulisunut paasissutissiisarneq qulakkiissallugu

• KNR-ip ineriartortinneqarnera, nutarsarneqarnera inuiaqatigiinnilu inissisimanera pillugu avammut attaveqaqatigiinnerup ineriartortinnissaa

• Naalakkersuisut, siulersuisut, suleqatigisat soqutigisaqaqatigiillu allat pillugit attaveqaqatigiinnerup ataqatigiissaarneqarnissaa

• KNR-ip ilisarnaataata, tusaamaneqarnerata Kalaallit Nunaannilu kiffartuussinermik tusagassiuuteqarfittut inissisimanerata ineriartortinneqarneranut peqataaneq

Ujartorparput suleqatissaq, ima piginnaasaqartoq:

• attaveqaqatigiinnermut, naalakkersuinermik ilisimatusarnermut, tusagassiortutut, inuiaqatigiilerinermut imaluunniit assingusumik ilinniagaqarsimasoq

• periusissianik atuutsitsilernermi, suliniutinik aqutsinermi imaluunniit suliffeqarfiup ineriartortinneqarnerani misilittagaqarsimasoq

• periusissialimmik attaveqaqatigiinnermut piginnaasaqarluartoq

• ersarissumik, eqqortumik sunniuteqarluartumillu allassinnaasoq

• suliassat ajornakusoortut aaqqissuussinnaagai siuarsarsinnaallugillu

• nammineerluni sulisinnaasoq akisussaaffimmillu tigusisinnaasoq

• aqutsisut, sulisut avataanilu suleqatigisat suleqatigilluarsinnaagai

Qinnuteqartut kalaallisut, danskisut tuluttullu pitsaasunik oqaatsinik piginnaasaqarnissaat kiisalu Kalaallit Nunaanni kulturimik inuiaqatigiinnillu pitsaasumik ilisimasaqarnissaat pingaartinneqarpoq. Piginnaasat taakku qinnuteqartut tamakkiisumik nalilersorneqarneranni ilaatinneqarput aammalu suliamut piginnaasat peqatigalugit nalilersuinermi tunngavigineqassapput.

Pitsaaqutaassaaq pisortat ingerlatsiviini, politikkikkut suleriaatsinik imaluunniit tusagassiorfinni ilisimasaqarneq.

Akissarsiat atorfinitsitaanermilu atugassarititaasut

Atorfinitsitsineq Naalakkersuisut (Namminersorlutik Oqartussat)kattuffiillu akornanni isumaqatigiissut naapertorlugu pissaaq.

Atorfimmut oqaloqatiginninnerit ataavartumik pissapput.

Atorfinitsitsineq qaammatini pingasuni misilitsiffiusumik pissaaq.

Inissaq

Atorfimmut atatillugu sulisunut inissiamik innersuussisoqarsinnaanngilaq.

Kisianni Namminersorlutik Oqartussani atorfeqarninnut atatillugu sulisunut inissiamik innersuussivigineqareersimaguit, sulisunut inissiamik innersuussivigineqarnissamut pisinnaatitaaffik attatiinnarneqassaaq.

✉️ Atorfik pillugu paasissutissat annertunerusut pisortaanerup Hans Peter Poulsen-imut e-mailikkut hpp@knr.gl-imut saaffiginnilluni pissarsiarineqarsinnaapput.

✉️ Atorfinitsitaanermut tunngasut pillugit apeqqutissaqaruit, HR-imut immikkoortortaqarfimmut e-mailikkut hr@knr.gl-imut saaffiginnissinnaavutit.

Qinnuteqaatit CV-llu nassiullugit tusarfigissallutit qilanaarpugut.