KNR-ip Radioaviisiani aaqqissuisoqarfimmi ataqatigiissaarisoq

Ullormut nutaarsiassaqartitsineq sunniuteqaqataaffigerusuppiuk nunarpullu tamakkerlugu tusagassiorneq nukittooq qularnaarlugu?

KNR pissarsiorpoq Radioaviisimi aaqqissuisoqarfimmi ataqatigiissaarisumik, aaqqissuisoq immikkoortortamilu tusagassiortut peqatigalugit ullormut nutaarsiassiinerup ineriartortinneranik, pingaarnersiuineranik pitsaassuunissaanillu qularnaareqataasussamik.

Aaqqissuisoqarfimmi ataqatigiissaarisutut nutaarsiassalerinermi qitiusumik inissisimassaatit. Ullormut nutaarsiassat tungaasigut susoqarnera tamakkerlugu isigisinnaassavat, oqaluttuassatigut periarfissat takusinnaallugit qularnaareqataaffigalugulu Radioaviisip nutaarsiassanik soqutiginartunik, tutsuiginartunik naalaartunullu attuumassuteqartunik pilersuinissaa. Saqqummiussivinni allani aaqqissuisut peqatigalugit ulluinnarni nutaarsiassiineq tamakkiisoq akuuffigissavat.

Suliassat pingaarnerit

• Aaqqissuisoqarfik peqatigalugu nutaarsiassiineq.

• Isumassarsiornermi, sammiviliinermi oqaluttuassallu aaqqissuunnerini tusagassiortunik siunersiueqateqarneq.

• Tusagassiat pitsaassusiat qularnaassallugu, tusagassiornermilu pitsaassutip qaffasinnissaa suleqatataaffigalugu.

• Radioaviisip tusagassiornerata saqqummiisarneratalu ineriartortinneqarnissaat peqataaffigalugu.

• Allaffissornikkut allatigullu suliassat ikiuuffigalugit, assersuutigalugu suliffissat aaqqissuunneqarnerat.

• Aaqqissuisip sulinngiffeqarnerani, napparsimanerani allatulluunniit peqannginnerani suliai suliarissallugugit.

Naatsorsuutigaarput

• Tusagassiortutut ilinniagaqarsimassasutit, tusagassiornerlu sukumiisumik paasisimasaqarfigissagit.

• Nutaarsiassiinermik aaqqissuisoqarfimmilu sulinermik misilittagaqassasutit.

• Aaqqissuisoqarfimmi sulinermik piginnaaneqarluassasutit, nutaarsiassanillu pingaarnersiuisinnaassuseqassasutit.

• Suleqatinik siunersiuillaqqissuussasutit, tusagassiornermillu sulinermi ineriartortitsisinnaassasutit.

• Ilusilersukkamik sulisinnaassasutit, ulapaarfiusumilu tamakkiisumik isiginnissinnaassuseqassasutit.

• Eqeersimaartuusutit, akisussaassusermik pingaartitsisoq suleqatiginnillaqqissorlu.

• Pisariaqalerfiani aaqqissuisoqarfimmi pisortatut sulisinnaassasutit.

Neqeroorutigaavut

• Ulluinnaat pissanganartut allanngorartullu, tusagassiornermullu attuumassuteqarluartut.

• Radioaviisip tusagassiornerata sunniuteqarfiginissaanut ineriartortinnissaanullu sunniuteqarnissamut periarfissaqarneq.

• Aaqqissuisoqarfik pimoorussisoq pikkorissunik sulisulik.

• Suliffik inuiaqatigiinni kalaallini tusagassiornerup tungaatigut pingaarutilimmik inissisimasoq.

Atorfeqarnermi atugassarititaasut

Atorfinitsitsineq akissarsiallu Naalakkersuisut peqatigiiffiullu isumaqatiginninniartartup akornanni isumaqatigiissutit naapertorlugit pissaaq.

Atorfik inissaqartitsinngilaq.

Misilinneqarfik qaammatinik pingasunik sivisussuseqarpoq.

Paasissutissat allat
📞 Atorfiup imarisaanut tunngasunik apeqqutissaqaruit aaqqissuisoq Nicole Sander Berthelsen attavigisinnaavat e-mailikkut nsb@knr.gl imalt. oq. +299 36 45 90.

Atorfinitsitsinermut tunngasunik apeqqutissaqaruit sulisoqarnermut immikkoortortaq attavigisinnaavat: hr@knr.gl

KNR-imut tunngasut

KNR tassaavoq tusagassiuut nunatsinni tamanik kiffartuussisuusoq, innuttaasunut tutsuiginartunik, attuumassuteqartunik arlaannaannulluunniillu attaveqanngitsunik nutaarsiassiisartoq. Tusagassiornerup inerartortittuarnissaa, nutaarsiassiinittalu saqqummiussiviit assigiinngitsut atorlugit ineriartortinneqarnissaa ullut tamaasa anguniarparput.