Kommune Kujalleq kommunimi pisortaanissarsiorpoq

Kommune anguniagarpassualik pisariusunillu qaangerniagassanik siuttuuffigerusuppiuk? Suliffimmi qullersaavit ingerlatsinermut ineriartortitsinermullu tappissuullutit - allannguinermut siuttuussallutit sapiissuseqarlutit?

Kommune Kujalleq ikaarsaariarfimmi pingaarutilimmi inissisimavoq. Nutaamik qinikkanik kommunalbestyrelsitaarsimalluta kiisalu erseqqissunik angusaqarnissamut politikkikkut piginnaatitsissusigaasimalluta kommunimi pisortaanissarsiorpugut allannguinermi imartuumi aqutsisuusussamik, kiisalu misilittakkani, iliuuseqarsinnaassutsi pisunullu malinnaalluarsinnaassutsi atorlugu siunissamut patajaatsumik toqqammaviliisinnaasumik.

Kommune allanngoriartortoq

Kommune Kujalleq angisuumik nunataqarpoq naleqanngitsumillu avatangiiseqarluni. Kommune 1.300 missaannik sulisoqarpoq ukiumullu 675 mio. kr. missaannik missingersuuteqartarluni.

Ullumikkut ilungersunartunik aningaasaqarnikkut anigorniagassaqarpugut kiisalu nutaamik eqqarsarnissamik pisariaqartitsilluta - tassa aaqqissugaanikkut, pingaarnersiuinikkut aammalu aqutsinikkut. Allaqqunneqarsinnaanngitsumik ilorraap tungaanut saatitsinissaq pisariaqarpoq, tamatumuunakkullu kommunip suliffeqarfiullu tamarmiusup eqqarsaatigilluakkamik attanneqarsinnaasumillu ineriartulernissaa aqqutissiorneqassalluni.

Kommunimi pisortartaap suliffeqarfik ersernerluttumik suliassatigut agguataariffiusimasoq amigartumillu aqunneqarsimasoq tigussavaa - nutaamillu sammivilerneqarnissaannut kiffaanngissuseqassalluni tapersersorneqassallunilu.

Akisussaaffiit suliassallu

Kommunimi pisortaanertut allaffissornikkut siuttuussaatit taavalu borgmesterimut kommunalbestyrelsimullu isummersoqataasartussaassallutit. Aningaasaqarnermik aqutsinermut, isumaliutigilluakkamik aqutsinermut kiisalu ingerlatsiviit akornanni ataqatigiissaarinermut pingaarnerusutigut akisussaasuusaatit. Tamatuma saniatigut illit suliassarissavat:

• Politikkut aalajangiivigisassanik pitsaasumik siumullu aaqqissuulluakkanik pitsaasunik tunniussaqartassaatit.
• Kommunalbestyrelsimut, Aningaasaqarnermut Ataatsimiititaliamut, ataatsimiititalianut borgmesterimullu qaninnertut siunnersortaassaatit.
• Politikkikkut aalajangikkat kommunimut erseqqissumik anguniagassanngortittassavatit.
• Suliassat nukissallu annertunerit pingaarnersiortassavatit - tamatumalu peqatigisaanik aqutsisoqatissatit pilersikkiartuaassavatit pisortatut atorfiit arlallit massakkut inuttaqanngimmata.
• Ilorraap tungaanut saatsitsineq allaqqunneqarsinnaanngitsoq ingerlallugulu tunngavilerluassavat aningaasaqarnikkut iluarseeqinnissaq pingaarnersiuinerlu qitiutillugit.
• Aqutsisoqarneq nukittorsassavat kiisalu kommunimi tamarmi piginnaasatigut qaffassaassallutit.
• Suliffeqarfimmi imartuumi nunamilu siammarsimaqisumi ataqatigiinneq qularnaassavat.
• Aqutsisunik pikkorissunik sulisunillu pinngitsoorneqarsinnaanngitsunik pissarsiornissaq sulisitsiinnarnissarlu peqataaffigissavat.
• Ineriartortitsinermi suliniutissat politikkikkut salliutitaasut erseqqissumik siuariartorfiunissaat pilersissavat.
• Politikkikkut allaffissornikkullu siulersuinerup akornanni suliat aallaavigalugit tatigeqatigiissumik suleqatigiinnissaq tapersersussavat.

Kommuunimi pisortaaneq aamma Aningaasaqarnermut pisortaq qanimut suleqatigiipput, tamannalu suleriaatsitigut aningaasaqarnikkullu iluarsartuusseqqinnermi qitiulluinnarluni.

Pisortaanissarsiorpugut:

• Kommunimi pisortaanertut sulinissamut naleqqutumik tunuliaqutaqarlunilu misilittagaqartumik - pingaarnerpaajuvoq politikkikkut aqutami pisarisumik pilertortumik ingerlatsinikkullu isumannaatsumik akisussaaffimmik tigusisartumik.
• Pisortat suliffeqarfiutaanni aqutsisutut misilittagaqarluartumik - ajornanngippat allannguinernik annertuunik aningaasaqarnermillu aqutsinermik akisussaaffeqarsimasumik.
• Kalaallit Nunaanni kommunimi imaluunniit assingusumi misilittagaqartumik, kiisalu politikkikkut, allaffissornikkut inuillu akornanni suleqatigiinnermik paasisimasaqartumik.
• Suliliinnarlunilu suliniutissanik pingaarnerpaanik suussusersisinnaasumik pingaarnersiorsinnaasumillu - tigussaasumillu iliuusissanngortitsisinnaasumik.
• Inunnut attaveqallaqqissumik kiisalu politikkikkut aqutsisunut, pisortanut sulisunullu qanimut suleqateqarsinnaassuseqartumik.
• Tutsuiginartumik tatiginarlunilu oqartussaassuseqartumik attaveqallaqqissumillu - kalaallisut, danskisut tuluttullu.
• Saqqumilaartumik, akuutitsisartumik erseqqissumillu aqutsisuusumik, sammiviliisinnaasumik, tapersersuinermik pilersitsisinnaasumik sammivimmillu aalajangiussisimasinnaasumik - aamma ilungersunartorsiorfimmi.
• Aningaasaqarnermik paasisimaqarluartumik kiisalu suliffeqarfimmi imartuumi aningaasaqarnikkut oqimaaqatigiinnermik pilersitseqqinnermik misilittagaqartumik.
• Suliffeqarfik politikkikkut aqutaasoq sulilluarfigisinnaassavat, tassanilu isumaqatigiissutit ersarissut, suliassat siumut ingerlanerat uppernarsagaasoq kiisalu tutsuiginartumik attaveqatigiinneq qitiunerpaajussapput.
• Pinerluuteqarsimannginnermut uppernarsaammik takutitsisinnaanissat naatsorsuutigineqarpoq.

Illit:

• Suliffeqarfik ineriartornissamut periarfissalerujussuaq sunniuteqarfigisinnaassavat - kommunimi allannguinissamut piumassuseqarfiusumi malunnaatilimmik allannguisinnaallutit.
• Politikkikkut aqutsisut tunniusimalluartut kiisalu suliffeqarfik allannguinissamut piareersimasoq qanimut suleqatigissavatit.
• Nammineq aqutsisoqatissavit ineriartortinnissaanut periarfissaqassaatit kiisalu siunissamut sammivimmik patajaatsumik pilersitsisinnaallutit.
• Kommunimi anigorniagassaqaqisumi periarfissaqaqisumilu qiutusumik inissisimassaatit.
• Aqutsisutut atorfik kajungernartoq assut namminersorfiusussaq sunniuteqarfiusussarlu.

Neqeroorutigaavut Atorfik pisortanut isumaqatigiissut nutaaq 12. juni 2025-imeersoq naapertorlugu akissarsiaqarfiuvoq.

Atorfik akissaateqarfiit 39-iattut qaffasissusiligaavoq. Akissaateqarfiit 39-ianni akissarsiat aalajangersimasut 2025-imi apriilip aallaqqaataani amerlassuseqarput kr. 85.957 ukiumullu kr. 1.031.484.

Atorfik ukiunut aalajangersimasunut atorfittut inuttalerneqarsinnaavoq.

Atorfimmut atasumik pitsaasumik inissaqartitsisoqarpoq.

Akissarsiatigut atorfeqartitaanermilu atugassarititaasut, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput.

Qinnuteqaat sulisussarsiornerlu

Sulisussarsiorneq Thomsen Consultingimit isumagineqassaaq. Qinnuteqarnissamut killigititaavoq tallimanngorneq 26. september 2025 nal. 12.00. Kommunimi pisortaanertaassap isumaqatigiissusiornerup kingorna piaarnerpaamik atorfininnissaa Kommune Kujallermit kissaatigineqarpoq.

Sulisussarsiornermut tunngatillugu apeqqutit Niels Thomsenimut oqarasuaatikkut +299 586636 / +45 5432 8408-mut saaffiginnissutigineqassapput mailerutigalugilluunniit uunga niels@thomsen.gl

Apeqqutit atorfimmut tunngasorpiaat pillugit saaffigineqassaaq aningaasaqarnermut pisortaq Arne Andersen oqarasuaatikkut +299 23 52 15 mailikkulluunniit arnd@kujalleq.gl

Atorfik una qinnuteqarfigiuk