Kommuneqarfik Sermersooq ikorfartortissarsiorpoq Inussuk AKO Illu

Kommuneqarfik Sermersooq Atuarfik Inussummi aammalu AKO Illumi meeqqamut arfineq pingasunik ukiulimmut, ikorfartortimik tunniusimasumik isumassuisumillu pissarsiorpoq.

Atorfik piffissaq tamakkerlugu atorfiuvoq sapaatip-akunneranut akunnerit 40-t suliffiullutik.

Atuarfik Inussuk

Atuarfik peqataaffigilissavat 1.000-it missaanik atuartulik, 1. - 10. klassinut aamma specialklassinut 9-nut agguataakkat. Atuarfik nutaarluinnaq ineriartortoq, aamma ukiuni aggersuni 21. hunnorujukkunni piginnaasanik, suliniuteqarnermik aallaavilimmik ilinniartitsinermik, suleqatigiinnermik, pitsaanerulersitsinermik aamma atuartut ilinniakkamikkut qaffasissumik inissinnissaannut nukittorsaanermik pingaartitsiviusoq.

Atuarfimmi atuartitsivissanut takorluukkat tassaapput; suliatigut piginnaasanik qaffassaaneq, inuit ataasiakkaani ilinniarnermik atugarissaarnermillu pilersitsineq, nalinginnaasumiit allaanerusumik ilinniarsinnaanermik ikorfartuineq aamma atuartup ataasiakkaap pisariaqartitaanik aallaaveqarluni atuartitsivinnik pilersitsineq, atuartup ilinniarusulerfigisaanik.

Kissaatigaarput Atuarfik Inussuk suliffeqarfiussasoq eqeersimaarfiusoq, tassani pingaarnertut naleqartitat tassaallutik akuersaarneq, ataatsimoorneq ineriartornerlu. Akunnitsinni isumalluartumik akuersaartumillu pissuseqarfigeqatigiinnissaq pingaartipparput, atuarfik suliffeqarfillu pitsaasoq pilersinniarlugu tamatta akisussaaffimmik tiguseqatigiissalluta. Upperaarput qaffasissumik anguniagaqarneq ingerlalluarnerlu ilikkagaqartitsisinnaalluarnissamut ineriartortitsilluarnissamullu pisariaqartuusut, taamaattumillu kikkut tamarmik suliniuteqarnissaat isumalerujussuuvoq - eqqiaasuuppata, aqutsisuuppata, allaffimmiuuppata, isumaginninnermi siunnersortaappata aqqutissiuussisuuppataluunniit, ilinniartitsisuuppata, perorsaasuuppata, ikorfartortaappata pedeliuppataluunniit.

AKO Illu

AKO Illu Atuareernerup nalaani kingornalu uatsinnut pingaaruteqarluinnarpoq toqqissisimaffiusumik pinnguarnermik periarfissaqartitsinissaq aammalu piareersariikkanik sammisaqartitsinissaq aalatitsinertalinnik. AKO Illumi 120-nik meeraqarpoq, sulisoqarlunilu 14-ninik.

Naatsorsuutigaarput illit:

·Ikorfartortitut imaluunniit perorsaasutut ilinniagaqarsimasutit ajornanngippat innarluutit suussusersisat aamma innarluutit pillugit tapiliussatut ilisimasaqartutit. Imaluunniit suliamik ilinniagaqarsimanngitsutit kisianni meeqqanik inuusuttunik sullissinermik misilittagaqartutit ikiorsiinermik suliassanik ingerlatsisinnaallutit

·Tatitusutit, naammagittartoq, inussiarnersoq, suleqatigiuminartoq, aalajaatsoq, akisussaaffimmik ilisimaarinnittoq aamma ataqqinnittoq

·Nammineq akisussaaffimmik tigusisinnaasutit namminersorlutillu sulisinnaallutit

·Suleqatinut angajoqqaanullu suleqateqarumasutit, aamma uagut suliarput pillugu perorsaaneq pillugu oqallinnerni peqataarusussuseqartutit

·Marlunnik (kalaallisut qallunaatullu) oqaaseqartuuguit iluaqutaassaaq, piumasaqaataanngilarli

Pingaarnertut suliassat:

·Meeraq innarluutilik nalinginnaasumik tapersersornera aamma sungiusarnera tarnikkut, timikkut aamma inooqatigiinnermi ineriartornera eqqarsaatigalugit

·Meeraq pillugu iliuusissatut pilersaarummi anguniagassatut inississukkat tunaartaralugit perorsaanikkut tapersersuinermik ingerlatsissasutit

·Ulluinnarni suliassanik ikiuunneq, meeqqerivimmi meeqqap sumiiffiani

·Meeqqap annermik nammineersinnaalernissaanut sungiusarnera

·Suleqatigiit ataatsimiittarnerannut peqataaneq

·Siunnersorneqarnermi peqataaneq

·Killiffik pillugu ingerlatsivimmik angajoqqaanillu ataatsimeeqateqarnerni peqataaneq

·Meeqqap sumiiffiani sulisut sinnerinik suleqateqarneq

·Killiffimmik nalunaarusiamik suliaqarneq

Uagut ilinnut makku neqeroorutigisinnaavagut:

Atorfik unammillernartulik, ikorfartortitut inuttullu ineriartornissamut periarfissalik. Meeqqap ineriartorneranut tunniusseqataanissamut periarfissamik pitsaalluinnartumik pissarsiaqarfiusinnaasoq. Ikorfartortitut siunersiueqateqatigiittarneq aamma suleqatinit pisortaniillu ilitsersorneqarneq, taamaalillutit toqqissisimasumik patajaatsumillu sulisinnaaniassagavit.

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Ikorfartortinut ataqatigiissaarisoq Arnannguaq Schmidt, oqarasuaat +299 36 61 08 imaluunniit e-mail: ikorfartorti@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 1107-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: novembarip 14.-at, 2025

Atorfik una qinnuteqarfigiuk