Maniitsumi peqqissaavik angerlarsimaffimmi peqqissaanermi sundhedsassistentimik pissarsiorpoq

Sundhedsassistentimik ilinniagaqassutsikkut piginnaaneqarluartumik, timikkut nappaatinut tunngasunik misilittagalimmik, Maniitsumi angerlarsimaffinni peqqissaanermi assistentitut namminersorluni sulinissamut kajungertumik, 1. november 2025 sulilersinnaasumik pissarsiorpugut. Atorfik nakorsaatilerisinnaanermut piginnaasaqarnermut uppernarsaateqarnissamik piumasaqaatitaqarpoq.

Maniitsumi peqqissaavimmi angerlarsimaffinni peqqissaanermi assistentitut atorfik ilinniagaqassutsikkut pissanganaatilik, namminersorfiusoq unammillernartorlu neqeroorutigaarput. Atorfinivinnissaq neqeroorutaavoq.

Atorfik sap. ak. nal. ak. 40-ini, ulluinnarni nal. 8-16 suliffiuvoq, piffissap suliffiup iluani suliassatit nammineq aaqqissuutissavatit. Ulluinnarni angerlasimaffinni peqqissaasoq qanimut suleqatigalugu, suleqatigiinnut ikittunut akuussaatit, suliassallu ilussinni aguuataartassavasi, taamatuttaaq nakorsaataasivimmi tarnikkullu nappaatilinnut angerlarsimaffinni peqqissaanermik akimuisunik suliassaqarsinnaasassaaq. 

Innuttaasut angerlarsimaffimmi peqqissaasunit sullinneqartut 140-it 150-illu missigaat, tamarmik assigiinngitsorpassuarnik- ilaatigut nakorsaatinik nakorsagassat aamma/imal. puigornermik ajornartorsiuteqartut piartortullu. Puigortunngortut nammineq angerlarsimaffimminniittut illillu qanigisaasunut pingaarutilimmik tapersersuuffissatit siumortassavatsittaaq. Napaarsimasoq nakorsiartoq imal. angerlarsimaffimminiittoq naapittassavat. 

Suliassat pingaarnerit tassaapput napparsimasunut attaveqarneq, nakorsaatissanik immikkoortiterivinnut poortuineq nakorsaatilerinerlu, nakorsaatit sunniutaannik kingunerluutitaannillu malitseqartitsineq, aap taqqanut naqitsineranik uuttuineq, uummatisiuineq/ekg aaversittarnerillu, ikinik taarsersuineq, nerisat, tupa, imigassaq, timigissarneq, sullulimmik quiffilinnik nakkutilliineq naamikkullu anartarfilinnik isumaginninneq. Tamatuma saniatigut nammineq angerlarsimaffimmi inuunerissuunissamut ikiorsiissutinik aallartitsinissaq siunertaralugu, inunnik isumaginnittoqarfimmi sulianik ingerlatsisunut attaveqarneq, siunnersuineq, ikorfartuineq/supervision qanigisaasunillu, angerlarsimaffinni ikiortinik imal. tapersersortinik tapersersuineq–suliassaq annertuumik pingaartitassaq.

Peqqissaavimmi nakorsat sulisullu allat qanimut pitsaasumik suleqatigineqarput, Teamsilu aqqutigalugu Nuummi nuna tamakkerlugu sullissisunik siunersioqateqarnissaq siunnersorneqarnissarlu periarfissaajuarlunissaaq

Neqeroorutigaagut:

• Suleqatigiittut ikittunnguulluni suliffik namminersorfiusoq ilinniagaqassutsikkut unammilligassalik
• Paasissutissinneqarneq
• Suleqatigiittut siunersioqatigiinnissamut tapersersorneqarnissamullu periarfisagissaarneq.
• Aningaasaliissutit aqqutigalugit, nunatsinni nunattalu avataani ukiumut ataasiarluni piginnaasatigut inerisarnissamut periarfissaqarneq (sulisut piginnaasaannik ineriartortitsinissaq siunertaralugu oqaloqatigiinnermi (MUS) isumaqatigiissutaasussaq)
• Ulluinnarni suliffik nal. 8-16.

Pissarsiariniagarput:

• Sundhedsassistentitut ilinniarsimavoq timikkullu nappaatilinnik peqqissaanermik misilittagaqarluni
• Nakorsaatilersinnaanermut uppernarsaatissartalimmik piginnaaneqarpoq
• Napparsimasunik sullissinermini ilinniagalittut attassuteqarfinnik inerisaasinnaanermut attasiinnarsinnaanermullu piginnaaneqarpoq.
• Suleqatiginnillaqqissuuvoq suliffimminullu, suleqatiminut aqutsisunullu ilumoortuulluni

Uagut:

Maniitsumi peqqissaavik, Peqqinnissaqarfik Qeqqanut ilaavoq 60-illu missaannik- peqqissaavimmut Maniitsullu nunaqarfiinut pingasuusunut agguataarsimasunik- sulisoqartoq.

Peqqissaavik uninngasunut; meeqqaniit utoqarnut- immikkut ilisimasaqarfinnit tamanit- tarnikkut nappaatillit ilanngullugit, 18-inik siniffeqarpoq. Uninngasunut immikkoortortami sulisuupput peqqissaasut tallimat, sundhedsassistentit sisamat peqqissaanermilu ikiortit sisamat.

Peqqissaavimmit isumagineqarputtaaq timikkut nappateqartunut tarnikkullu nappaateqartunut angerlarsimaffimmi peqqissaasoqarneq, meeraaqqerisoqarneq naartusunik isumaginninneq, timimik sungiusaasoqarneq, kinguaassiuutitiut nappaatilinnut nakorsiartitsiveqarneq naartunaveersaarnermulu nakorsiartarfeqarneq kiisalu nakorsanut marluk- pingasunik nakorsiartitsiveqarluni.

Tamatuma saniatigut peqqissaavik aaviisarfeqarpoq, qinnguartaaveqarpoq, peqqissaasunut nakorsiartarfeqarpoq, ajoqusersimasunut nakorsiartitsiveqarpoq nakorsaataasiveqarlunilu. 

Napparsimasunik isumaginninnerup; naleqartitanik- soorlu ataqqinninnermik, torersumik pissuseqarnermik, akuersaarnermik tatiginninnermillu tunngaveqarnissaa pingaarteqaarput. Naleqartitat taakku peqqissaavimmi immitsinnut attaveqatigiinnitsinnut sunniuteqarputtaaq.

Maniitsoq naatsumik oqaatigalugu:

Maniitsoq nunatta kitaniippoq, qaasuitsup killeqarfiata kujataatunginnguani Nuup Sisimiullu akornanni inissisimasoq. Maniitsup eqqaa alutornaqaaq, qaqqanik portusuunik inngittuunik, kangerlunnut qinngortuunut atasunik, iigartartunik sermitalinnik avatangerneqarsimalluni. 

Maniitsoq nunaqarfittaalu 3100-it missaannik inoqarput, taakkunannga 2.500-it missaat illoqarfittaaniillutik sinnerilu nunaqarfittaaniillutik. Nunaqarfiit ukiumut arlaleriarlutik immakkut angallammit tikinneqartarput.

Illoqarfik iluaqusersuutit nutaaliaasut amerlanersaannik peqarpoq, ulluinnarni pisariaqartitanut pisiniarfeqarluni, mittarfeqarluni, sinersortammit sapaatip akunneranut ataasiarluni tikinneqartarluni aasaaneranilu immakkut angallammik sukkasuuliamik Nuummut angalasoqartarluni.

Aasaanerani sunngiffimmi sammineqarsinnaasut ilagaat asimut angalaarneq maanilu ilisarnaataasumik qipoqqaat akornanni angallammik angalaarneq. Ukiukkut arsarninittarpoq ullukkullu sisupiloortoqarsinnaallunilu ujakkaartoqarsinnaavoq.

Tamatuma saniatigut Maniitsumi pissanganartorpassuarnik sammisaqarfiusinnaasumik unnukkut sunngiffimmi atuartoqartarpoq ukiorlu kajallallugu timersuutinik assigiinngitsunik sammisaqartoqarsinnaalluni.

Qinnuteqaat

Qinnuteqaat ilanngussassallu naapertuuttut www.gjob.gl aqqutigalugu PDF-inngorlugit nassiunneqassapput.

Sulilerfissaq: 1. november 2025 immikkulluunniit isumaqatigiissuteqarnikkut

Qinnuteqarfissaq kingulleq: 15. oktober 2025

Qinnuteqartunik oqaloqateqarnerit ataavartumik ingerlanneqassapput 

Attavissaq/at: Atorfik/iit pillugu/it paasissutissat: Aqutsinermut sulisussarsiniarnermullu siunnersorti Ann Birkekær Kjeldsen mailikkut: ABKJ@PEQQIK.GL imal. oqarasuaatikkut: +299547516 / +4554325064 attavigalugu pissarsiarineqarsinnaapput.

Ineqarneq

Kalaallit Nunaanni Peqqinnissaqarfimmi maleruagassat atuuttut naapertorlugit inissamik innersuussisoqassaaq.

Innuttaassuseq

Nunat Avannarliit arlaanni innuttaassuseqanngikkuit, atorsinnaasumik najugaqarnissamut sulinissamullu akuersissummik peqarnissavit atorfininnissamut piumasaqaataanera maluginiaqquneqarpoq. Atorfininnissamut isumaqatigiissuteqarnermi aatsaat najugaqarnissamut sulinissamullu akuersissummik qinnuteqartoqarsinnaavoq.

Akissarsiat atorfininnermilu atugassarititaasut

Akissarsiassani atorfininnermilu atugassarititaasuni, tassunga ilanngullugit atorfinitsitaanermi soraarnermilu angalanissamut akiliunneqarnissamut

pisattallu nassiunneqarnerannut Kalaallit Nunaanni Namminersorlutik Oqartussat kattuffiullu isuma- qatiginniarsinnaatitaasup attuumassuteqarfigisap akornanni isumaqatigiissutaasut atorfininnerup nalaani atuuttut naapertorneqassapput.

Nunatsinni Peqqinnissaqarfik– atitussuseq, unammillerneq ilinniagaqassutsimillu tulluusimaarinninneq

Nunatsinni Peqqinnissaqarfik aaqqisuussaanikkut Peqqissutsimut Naalakkersuisoqarfiup ataani inissisimavoq, qitiusumillu immikkoortunut tallimanut, Dronning Ingridillu Napparsimmavissuani qitiusumik immikkoortunut arfineq pingasunut Kigutileriveqarfimmut, Kalaallit Peqqissartut Illuannut Ingerlatsinermullu qitiusumik immikkoortumut agguagaalluni.

Ilinniagaqassutsikkut unammilligassarsiorpit, alapernaatsuuit assigiinngitsunillu suliaqarnissaq nuannaraajuk, taava nun atsinni Peqqinnissaqarfimmi sulinissaq ilinnut naleqquttuuvoq. Nunatsinni Peqqinnissaqarfik uani: www.peqqik.gl annertunerusumik paasisassarsiorfigisinnaavat.

Nunatsinni sunngiffimmi sammisaqarnissamut periarfissagissaarpoq. Aasami pisulluni angalaarneq, arfersiorneq, aallaaniarneq, aalisarneq angallammillu angalaarneq sammissaqqissuupput. Ukiumi arsarnerit, sisorarneq avannaanilu qimmeqarfimmiikkuit qimusserneq periarfissaapput. Illoqarfinni annerusuni kulturimut tunngasut annertupput, timersoqatigiiffeqarpoq, kusanartulianik saqummersitsisoqartarpoq, nipilersortunik tusarnaartitsisoqartarpoq, kaffisorniartarfeqarpoq neriniartarfeqarlunilu. Nunap immikkoortua atorfiniffissaq pillugu paasissutissanik nittartakkami: www.peqqik.gl-imi annertunerusunik pissarsisinnaavutit. 

Kalaallit Nunaanni Peqqinnissaqarfiup aaqqissuussaaneranut takussitissiaq uani takuuk: Organisationsdiagram Det Grønlandske Sundhedsvæsen

Kalaallit Nunaanni Peqqinnissaqarfik suliffittut pujortarfiunngilaq.

Qinnuteqaatit PDF-inngorlugit allakkiat Gjob.dk aqqutigalugu nassiussat kisiisa tigusinnaavagut.

Qinnuteqaatit mailikkut nassiussat ilinnut tunngatillugu isumannaallisaaniarneq pissutigalugu ingerlaannaq peerneqassapput.

Atorfik una qinnuteqarfigiuk