Meeqqanut Atuarfeqarnermullu Ingerlatsivik atuartitsinermik siunnersortimik pissarsiorpoq

Ilinniartitsisut qanimut suleqatiginerisigut meeqqat atuarfianni atuartitsineq allanngortikkusuppiuk pitsanngorsarlugulu? Atuarfimmi atuartitseriaatsinik misilittagaqarpit ilinniartitsisullu atuartunut misissuinermik, misilittaanermik pilersitsiviusumillu atuartitseriaatsimik aallussinissaannik isumassarsiortissinnaavigit kajumissaarlugillu? iPadit ilikkartitsinissamut anguniagassannut sakkussatut atorsinnaavigit? Taava Kommuneqarfik Sermersuumi Atuarfeqarnermut immikkoortortaqarfimmi atuartitsinermut siunnersortitut atorfissaqartippatsigit.

Meeqqanut Atuarfeqarnermut Ingerlatsivik meeqqat atuarfianni atuartitseriaatsinik nutaanik, ilikkariartornermut misissuinerusumik suliniutinullu tunnganerusunik atuutsitsilernissamut, atuartitsinermik siunnersortimik pissarsiorpoq.

Neqeroorutigaavut:

·Ineriartortitsinissamut periarfissaq atuartitseriaatsimillu nutaamik atulersitsinissaq

·Akisussaaffik annertooq suliannullu sunniuteqarsinnaaneq annertooq

·Ullut tamaasa assigiinngitsunik suliassaqarfillit, Nuna tamakkerlugu atuartitsinermi suliniummut annertuumut sunniuteqaqataallutit

·Sulianut tunngasunik ilisimasaqarluartunik suliatigut ataatsimoorfiusumi siunersiueqatigiinnissamut periarfissaqarluarpoq

·Ulluinnarni sulineq pissanganartoq suleqatit pikkorissut tunniusimasullu suleqatigalugit.

·Aqutsisunit tapersersorneqarluarneq

·Ulluinnarni kommuneqarfimmi meeqqat atuarfiini atuartitsivinni aqutsisunillu qanimut suleqateqarneq.

Atorfik suliffissarlu pillugit:

Nuna tamakkerlugu kommunit sinneri peqatigalugit aamma Ilinniarnermik Ilisimatusarfik aamma Ilinniartitaanermut Aqutsisoqarfik peqatigalugit suleqatigiinnut ilaavugut, tassanilu meeqqat atuarfianni ilinniarnerup qaffasissusaata kivinneqarnissaa anguniagaavoq. Nunarsuarmi atuartitsisarnermi pingaarnerit ilagaat atuartut 21. hundredikkunni piginnaasaannik ineriartortitsinissaq - ajornartorsiutinik assigiinngitsunik aaqqiissuteqarsinnaaneq, suleqatigiilluarneq aamma inoqatinut attaveqaatit assigiinngitsut akornanni attaveqaqatigiittarnerit.

Tamatuma saniatigut Kommuneqarfik Sermersuumi nunaqarfinni Kapisilinni, Arsummi aamma Qeqertarsuatsiaani alimasissumik ilinniartitsineq pilersereerparput. Matumani suliniummi kommuneqarfimmi tamani alimasissumik atuartitsinerup atuutilersinneqarnissaa meeqqat atuarfiini nalinginnaasumik ilaatinneqarnissaa siunertaavoq aamma sumiiffinni sulisussarsiornermik faginullu aalajangersimasunut sulisussarsiorneq ajornakusoorfiusunut tapersersuinissaq.

Nunaqarfinni ilinniartitsisuutigut tapersersorneruniarlugit mentoreqartitsineq pilersereerparput. Mentorimik qanimut suleqateqarnikkut ilinniartitsisut ataasiakkaat atuartitsinerminnut tapersersorneqarlutillu ilitsersorneqassapput taamaalillunilu nutaanik piginnaasassanik periutsinillu ineriartortitsinissaminnut periarfissinneqassapput.

Atuartitsinermik siunnersortitut atuartitseriaatsinik suliniutinillu nutaamik Kommuneqarfik Sermersuumi atuarfinni atuutsitsilernissamut pingaaruteqartumik inissisimassaatit.

Suliarisartagassatit:

Atuartitsinermut siunnersortitut suleqatitit marluk allat peqatigalugit kommunimi meeqqat atuarfianukartassaatit ilinniartitsisullu atuartitseriaatsinik suleqateqariaatsinillu nutaanik atuutsitsilernerannik tapersersussallugit. Taamaattumik ukioq atuartitsiviusup ingerlanerani angalasarnissaq naatsorsuutigineqassaaq.

Suliassatit pingaarnerit tassaassapput:

• Ilinniartitsisut ilikkariartortitsinermik ingerlataqarnermik ineriartortitsinerannut peqataaneq.

• Ilinniartitsisut ataasiakkaat suleqatigalugit ilikkariartortitsinermik ingerlataqarnermik aaqqissuussineq naliliinerlu.

• Perorsaanikkut ineriartortitsinerit suliniutinillu nutaanik atuutsitsilernermut atuarfinni pisortanik siunersiueqateqarneq.

• Ilinniartitsisut ulluinnarni ilikkariartortitsinissamut perorsaanikkullu suliaqartarnerannik ilinniartitsineq, ilitsersuineq kaammattuinerlu.

• Kivitsisami allatseqarfimmi pisortamik suliniummillu suleqataasunik allanik qanimut suleqateqarneq.

Atuartitsinermik siunnersortit allat allaffeqatigissavatit, sulinernili piffissaq annerpaaq atuarfinni sulisassaatit, taakkunanilu atuarfeqarnermut aqutsisut ilinniartitsisullu akornanni pissanganartorsiorfiusartumi sulisassaatit.

Kissaatigaarput:

·Atuartitsinerup pamersaanerullu iluani ilinniarsimanissat, IT atorlugu ilikkartitsinissamut assigisaanniluunniit nangitsiviusumik ilinniagaqarsimaneq iluassaaq.

·iPadit atorlugit atuartitsinermi ilikkartitsiniarnermik perorsaariaatsimillu misilittagaqartutit ilisimasaqartutillu.

·Atuarfinni sulisunut ilisimasannik nassuiaasinnaasutit ingerlatitseqqiillutillu.

·Perorsaaneq ilikkartitsiniarnerlu tutsuiginartumik paasisimasaqarfigissavatit ilisimasaqarfigalugillu.

·IT atorlugu atuartitsinerni inoqatit attaveqaataannik suliaqarnermik misilittagaqassaatit

·Aaqqissuussamik suleriuseqartutit, akisussaassuseqartutit aamma aaqqiissutissarsiortuussaatit

·Nammineerlutit sulisinnaasutit suleqateqallaqqittutillu.

∙Marlunnik kalaallisut qallunaatullu oqaaseqartuuguit iluaqutaassaaq, piumasaqaataanngilarli.

Pineqaatissinneqarsimannginnermut aamma meeqqanut pinerliisimannginnermut uppernarsaat:

Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu Kommuni uppernarsaatinik naammaginatutut isigineqartunik pereerpat atorfinninneq aallartinneqarsinnaavoq. Taamaattumik malugeqqussavarput Kommunip uppernarsaatit nammaginartutut isigineqartut, meeqqanik pinerliisimannginnermik uppernarsaat rigspolitiinit, aammalu pineqaatissinneqarsimannginnermut uppernarsaat Politiinit pippagit atorfininnissaq inissinneqassammat.

Meeqqanik pinerliisimannginnermut uppernarsaat Kommunimit aaneqassaaq pineqartumik akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami Politeeqarfimmut aaneqassaaq.

Akissaatinut atorfinitsitaanermullu tunngatillugu atugassarititaasut:

Akissarsiaqarnermut atorfinitsitaanermullu atugassarititaasut Namminersorlutik Oqartussani isumaqatigiissut atuuttoq, atorfininnerup nalaani Namminersorlutik Oqartussat kattuffiullu pineqartup isumaqatigiinniarsinnaatitaasup akornanni isumaqatigiissutit atuuttut naapertorlugit.

Atorfinititsineq qaammatini pingasuni misiliutitaqassaaq.

Inissaq:

Atorfininnermut atatillugu inissiamik innersuussisoqarsinnaanngilaq.

Annertunerusumik paasisaqarusukkuit:

Atorfik ilinnut soqutiginaateqarpat atorfik pillugu tassungalu tunngasumik suliassat itinerusumik paasisaqarfigerusukkukkit uunga saaffiginninnissannut tikilluaqqusaavutit: Fagchef Riikki Grønvold, oqarasuaat +299 36 73 03 imaluunniit e-mail: rigr@sermersooq.gl

Qinnuteqaat:

Qinnuteqaat qulequtserlugu Atorfiup ilisarnaataa 432-25-mik, ilinniagaqarsimanermut uppernarsaat siornatigullu sulisimanermut uppernarsaatit qinnuteqaammut ilanngullugit, qinnuteqaateqarnissamut piffissarititaasup qaangiutinnginnerani qinnuteqartoqassaaq.

Imatut qinnuteqaateqassaatit:

Atorfik qinnuteqarfigerusutat takugukku, uagutsinnut qinnuteqaammik nassiutissavat nittartagarput aqqutigalugu. Atorfimmut qinnuteqarfiginiakkannut link-i, atorfimmi inuttassarsiorneqartumi takusinnaavat.

Malugiuk:

Qinnuteqaatit pappilissatigut mailikkulluunniit tiguneq ajorpagut, inussiarnersumik qinnuteqaatit nittartagaq aqqutigalugu nassiuguk.

Qinnuteqarnissamut killissarititaasoq: maajip 21.-at, 2025

Atorfik una qinnuteqarfigiuk