Naalakkersuisut Siulittaasuata Naalakkersuisoqarfiani attaveqaqatigiinnermut immikkoortortaqarfimmi attaveqatigiinnermi suleqataasussarsiorneq

Kalaallit Nunaanni Namminersorlutik Oqartussani Naalakkersuisut attaveqaqatigiillutik sulinerannut nukittorsaaqataarusuttumik inerisaaqataarusuttumillu, soqutiginnittumik pikkorissumillu attaveqatigiinnermi suleqataasussarsiorput. Attaveqallaqqissumik, politikkimik paasinnillaqqissumik suliffeqarfimmilu Naalakkersuisut suliaannik aalajangigaannillu paasissutissiinermi qitiusumik inissisimarusuttumik suleqatissarsiorpugut.

Naalakkersuisut Siulittaasuata Naalakkersuisoqarfia

Naalakkersuisut Siulittaasuata Naalakkersuisoqarfia qitiusumik ataqatigiissaarinniffiusarpoq aqutsisutullu inissisimalluni Naalakkersuisut Siulittaasuata Naalakkersuisunik aamma qitiusumik allaffeqarfiup sapinngisamik pitsaanerpaamik suleqatigiinnerinut tunngaviliinissamik qulakkeerinnittartuusarluni.

Naalakkersuisoqarfik Aqutsisut allaffeqarfiannik, Inatsisiliortut immikkoortortaqarfianik, HR-Ineriartortitsivimmik, Inatsit Tunngaviusussamut immikkoortortaqarfimmik, Naalakkersuinikkut Ingerlatsinermi Immikkoortortaqarfimmik kiisalu Attaveqaqatigiinnermut immikkoortortaqarfeqarpoq, tassanilu atorfik inuttaqanngitsoq inissisimalluni.

Atorfik pillugu

Illit attaveqatigiinnermik suleqataasutut Naalakkersuisut attaveqaqatigiinnermut immikkoortortaqarfianut ilaalissaatit, tassanilu qitiusumik allaffeqarfimmi immikkoortortat assigiinngitsut attaveqaqatigiinnermik suliassaasa inerisarneqarnerini piviusunngortinnerinilu peqataassallutit. Attaveqaqatigiinnermut immikkoortortaqarfik, naalakkersuisoqarfiit aamma naalakkersuinikkut aqutsisut qanimut suleqatigalugit erseqqissumik, tutsuiginartumik aamma sulianik aallaaveqartunik attaveqaqatigiinnermik suliaqartassaatit.

Suliassatit ilaatigut makkuussapput:

• Attaveqatigiinnermik suliniutit aamma attaveqatigiinnermut pilersaarutit inerisarneqarnerini piviusunngortinneqarnerinilu peqataaneq

• Tusagassiorfinnut nalunaarusiorneq, nutaarsiassaliorneq, oqaaseqaasiornerit aamma attaveqaqatigiinnermi atortussanik allanik suliaqarneq

• Suliat aallaavigalugit tusagassiuutilerineq aamma tusagassiorfinnit saaffiginnissutit suliarineqarnerini peqataaneq

• Tusagassiuutinik nakkutiginninneq aamma tusagassiuutitigut takussutissanik misissueqqissaarnerit

• Digitalikkut attaveqaataatit aamma inuit attaveqaqatigiittarfiisa imarisaanik inerisaaneq aamma suliaqarneq

• Qitiusumik immikkoortortat assigiinngitsut attaveqaqatigiinnermik suliassaasa ataqatigiissarneqarnerini peqataaneq

• Suliniutit anginerit, naalakkersuinermik suliallit suliai aamma aaqqissuusat pillugit attaveqaqatigiinnermik sulinermi peqataaneq

Periusissiat suliassallu tamatigoortut ulluinnarni suliarisarumaarpatit aamma sulisoqarfimmi avatangiisit sulianik aallaaveqarluni suleqatigiinnermik, pitsaassutsimik inerisaanermillu tunngasut peqataaffigissavatit.

Illit pillutit

Attaveqallaqqissoq, oqariartuutinik erseqqissumik anguniagalimmillu attaveqarsinnaasartoq ujartorparput. 

Naatsorsuutigaarput illit:

• Attaveqaqatigiinnermut, tusagassiornermut assigisaanulluunniit tunngasumik ilinniagaqarsimassasutit

• Attaveqatigiinnermut imaluunniit tusagassiuutinut tunngasunik misilittagaqassasutit, ajornanngippat suliffeqarfimmi naalakkersuinermik suliallit aqutaanneersumik

• Oqaasertalersuisinnaassuseqarluartutit, matumani naalakkersuinermik suliallit attaveqariaasiannik paasinnilluarsinnaaneq ilanngullugu 

• Naalakkersuinikkut suleriaatsinik aamma politikkip, allaffissornermik suliallit pisortatigoortumillu pisut imminnut ataqatigiinnerinik paasisimasaqarluartuusutit

• Misissueqqissaarinnillaqqissuusutit aaqqissuussaasumillu sulisinnaasutit 

• Suleqatiginnikkusussuseqartuusutit aamma suliffeqarfimmi soqutiginnittorpassualimi sulilluarsinnaasutit

• Sulianik aallartitsisinnaasutit, eqinnaatsuusutit aamma akisussaaffimmik ilisimaarinnittuusutit

• Suliatigut ataatsimoorussilluni nukittuumi sulinermi nuannersumik peqataasassasutit

Inuiaqatigiinni pissutsit pillugit ilisimasaqarluarnissat paasisimasaqarluarsimanissallu naatsorsuutigaavut. Kalaallisut danskisullu oqaaseqaruit iluaqutaassaaq.

Akissarsiatigut atorfinitsitaanermilu atugassarititaasut

Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup akornanni isumaqatigiissut atuuttoq naapertorlugu akissarsiaqartitsisoqassaaq atorfeqartitsillunilu.

Ineqarneq

Atorfimmut atasumik inissaqartitsisoqanngilaq. Qinnuteqartoq Namminersorlutik Oqartussani atorfeqarnini aqqutigalugu sulisutut ineqareeruni sulisutut inissiamik innersuussivigineqarnissamut pisinnaatitaaffik attatiinnarneqassaaq. Atorfimmut atatillugu ini atorfeqarnermut tunngavoq atorfeqarnerullu unitsinnerani qimanneqassalluni.

Paasissutissat amerlanerit

Atorfik pillugu apeqqutissaqaruit pisortaq Simigaq Broberg oqarasuaammut 34 51 44 imaluunniit mailikkut attaveqarfigisinnaavat uunga: SBRO@nanoq.gl.

Sapinngisamik piaartumik isumaqatigiissuteqarnikkulluunniit sulilernissat kissaatigaarput.

Qinnuteqaat, CV, ilinniarsimanermut aamma pikkorissarsimanermut uppernarsaatit aamma pappiaqqat allat pingaaruteqartut "Qinnuteqaat nassiuguk" toorlugu nassiutikkit.

Mailikkut qinnuteqaatinik tigusineq ajorpugut.