Namminersorlutik Oqartussat Nutserisoqarfiani Allaffimmi pisortaq

Namminersorlutik Oqartussat Nutserisoqarfiat suliassat eqqarsaatigalugit pikkorissumik aaqqissuussillaqqissumillu, Namminersorlutik Oqartussanilu nutsigassanut tunngatillugu aqutsisutut inissisimasussamik, allaffimmi pisortassarsiorpoq. Nutserisoqarfiup Namminersorlutik Oqartussat qitiusumik allaffeqarfiani nutsigassat oqaluttaanerillu isumagisarpai, tassunga ilaallutik toqqaannartumik oqaluttaasarnerit. Nutsigassat amerlanersaat kalaallit danskillu oqaasii atorlugit suliassaasarput soorlu inatsisissatut siunnersuutit, Naalakkersuisut isummernissaanut tunngavissiat, nalunaarusiat annertuut, pappiaqqat Inatsisartut ataatsimiinnerini atorneqartartussat kiisalu Naalakkersuisoqarfinnut Aqutsisoqarfinnullu allakkatigut saaffiginnissutit taakkulu akissutitaat. Tamatuma saniatigut tuluttuumiit kalaallisuunngortitsilluni nutserisoqartarpoq kalaallit oqaasiiniillu oqaatsinut allanut ataatsimiinnerni, ataatsimeersuarnerni il.il. oqaluttaasoqartarluni.

Allaffiup pisortaatut nutserisut 12-it siuttuuffigissavatit suliffeqarfiullu suliaasa ataqatigiissarneqartarlutillu kukkunersiorneqartarnissaat akisussaaffigissallugu. Ilutigalugu pisortat peqatigalugit Nutserisoqarfiup avammut kiinnertartorissavaatit allaffiullu ineriartorteqqinnissaanut ilusilersueqataasussaallutit. Nutserisoqarfiup suliffittut kajuminnartuujuarnissaa sulisutullu suliassat eqqarsaatigalugit ineriartortuarnissaat suliat pingaarnerit ilagaat.

Nutserisoqarfimmi qarasaasiat atorlugit atortorissaarutit ineriartortinneqarsimasut eqqarsaatigalugit sulisut pisariaqartinneqartunik sakkussaqartuarnissaat qulakkeerniagassat ilagaat. Nutserisoqarfimmi qarasaasiaq atorlugu nutserissut atorneqartoq sulisut suleriaasiannik allanngortitsisimavoq.  

Suliassat taaneqareersut saniatigut, makku isumagisassavatit:

• Qullersat, naalakkersuisoqarfiit aqutsisoqarfiillu suleqatigalugit suliassanik pingaarnersiuisarneq

• Nutsikkat nassiunneqartinnatik kukkunersiorneqarsimasarnissaat

• Suliat pitsaassusaasa , taaguusersuutit suleriaatsillu ineriartortinnissaat

• Nutsigassanik pisariusunik suliaqartarneq suliakkiisarnerilluunniit

• Nutserisoqarfimmi namminermi aammalu qitiusumik allaffeqarfimmi atuisunik suleqateqarluartarnissat qulakkeernissaat

Illit makku piginnaaneqarfigissagitit naatsorsuutigaarput

• Nutserisutut allamilluunniit assingusumik ilinniagaqarsimassaatit

• Kalaallisuumiit qallunaatuumut paarlattuanillu nutserinermik misilittagaqarluassaatit toqqaanartumik oqaluttaasarnermik/nutsikkanillu kukkunersiuisarnermik misilittagaqarluassaatit.

• Pilersaarusiullaqqissuusaatit, pingaarnersiuillaqqissuullutit sullissanillu tamarmiusunik malinnaasinnaassuseqarlutit

• Aaqqissuusamik sulisinnaassuseqassaatit, akisussaassuseqassaatit suliassallu eqqarsaatigalugit ilisimasaqarluarlutit

• Sulianut tunngatillugu siunersiueqatigillaqqissuusaatit kinguneqartussanillu akisinnaassuseqarlutit

• Suleqatikkuminartuusaatit ulapaarneruttaaq nalaanni.

• Qarasaasianik atuillaqqissuusaatit, taaguusersuutinik aqutsillaqqissuusaatit suleriaatsinillu pitsaasunik ineriartortitsisinnaassuseqarlutit

Aqutsisutut misilittagaqarneq iluaqutaassaaq suliassanillu ataqatigiissaarinermik, suliniutinik aqutsinermik, pitsaassutsinik qulakkeerinnittarnermik oqaatsinillu ineriartortitsinermillu misilittagaqassallutit.

Neqeroorutigivagut: 

• Namminersorlutik Oqartussani atorfik qitiusumik inissisimasoq nutserisarnermullu atatillugu sunniuteqarsinnaanissamut periarfissagissaartoq

• Namminersorlutik Oqartussat qitiusumik nutserisoqarfiani ineriartortitsisinnaanissamut periarfissalik

• Nutserisoqarfiup saqqumilaarnerusumik inissisimalernissaanut suliassaasalu sammivilersornissaanut qitiullutit sulissaatit

• Suliffik suliffigiuminartoq inuiaqatigiinnilu pingaaruteqarluinnartunik suliassalik

• Qangatut nutsereriaaseqarluni suleriaatsinik nutserissutillu nutaat atorlugit sulinissamut periarfissalik

  
  Akissarsiat atorfinitsitaanermullu tunngasut
  Atorfik akissaateqarfimmi LR 36-mi maanna inissisimavoq.  1. april 2026 LR 36-mi tunngaviusumik akissarsiaq tapiillu aalajangersimasut soraarnerusutissianullu illuartittagaq ilanngullu antterussuseqarput qaamammut  Kr. 57.531 ukiumullu Kr. 690.372.
  
  Aallaaviatigut isumaqatigiissutini atugassarititaasut naapertorlugit atorfinitsitsisoqassaaq, qinnuteqartoq tjenestemanditut atorfeqareersimaguni nunatsinni pisortani tjenestemandit pillugit inatsisit malillugit tjenestemandinut atugassarititaasut naapertorlugit atorfinitsinneqarsinnaavoq.
  
  Akissarsianut atorfeqartitaanermullu piumasaqaatit, taakkununnga ilanngullugit atorfinikkiartorluni soraarlunilu angalanermut aamma pequtit nassiunneqarnerinut akiliunneqarsinnaatitaaneq, Namminersorlutik Oqartussat aamma pineqartup kattuffiata isumaqatigiinniarsinnaatitaasup akornanni isumaqatigiissutit piffissami atorfiniffiusumi atuuttut naapertorlugit pissapput. Naalagaaffimmi tjenestemandit aamma AC-nut isumaqatigiissutit arlallit, ilaatigut DJØF-ip Finansministereqarfiullu akornanni isumaqatigiissutit malillugit sulisut Namminersorlutik Oqartussani atorfinitsinneqarnerminnut atatillugu aningaasarsiaqaratik sulinngiffeqarsinnaatitaapput. Nunamut namminermut ministereqarfiup aammattaaq kommuninut immikkoortortanullu Kalaallit Nunaanni Namminersorlutik Oqartussani atorfinitsinneqarnermi aningaasarsiaqarani sulinngiffeqarnissamut qinnuteqaatit tigulluarneqartarnissaannik innersuussutigisimavaa.
  
  Sulinngiffeqarallarnissaq pillugu aalajangersakkat Kalaallit Nunaanni Namminersorlutik Oqartussani inuit atorfinitsinneqartut katissimasaannut /aappaannut aamma atuupput.
  
  Aallaavittut sapaatip akunneranut sulineq akunnernik 40-nik sivisussuseqarpoq, aamma ukiumut akunnerni 320-ini qaammatillu pingasuugaangata akunnerni 80-ini suliartoqquneqarsinnaaneq atorfininnermut attuumapput, ullullu sulinngiffiusussat annaaneqarsimasut ajunngitsorsiassaqarfiginissaat pillugu aalajangersakkat atuutinngillat.
  
  Paasissutissat allat
  Atorfik pillugu annertunerusumik paasisaqarusukkuit una attavigissallugu tikilluaqquneqarputit:
  Aqutsisoqarfimmi pisortaq André Guttesen +299 34 64 36 imaluunniit mail: andg@nanoq.gl
  
  Qinnuteqarnissamut killigititaasoq ulloq 7. juli 2026.
   
  Inissaqarneq
  Atorfimmut atatillugu sulisutut ineqarnissamut innersuussinertaqanngilaq. Qinnuteqartoq Namminersorlutik Oqartussani atorfeqarnini aqqutigalugu sulisutut ineqareeruni sulisutut inissiamik innersuussivigineqarnissamut pisinnaatitaaffik attatiinnarneqassaaq.
  Sulisutut inigisaq atorfeqarnermut tunngasuuvoq, atorfeqarunnaarnermilu qimanneqartussaassalluni.
  
  Qinnuteqaat, imminut ilisaritinneq, CV, ilinniarsimanermut aamma pikkorissarsimanermut uppernarsaatit aamma pappiaqqat attuumassutillit "Qinnuteqaat nassiuguk" toorlugu nassiutikkit.
  
  E-mail-ikkut qinnuteqaatinik tigusineq ajorpugut.